Read kinyarwanda Abanyagalati 1 Bible Online

Abanyagalati 1 - kinyarwanda bible

Abanyagalati 1

¹Jyewe Pawulo intumwa, itari iy’abantu cyangwa kubw’umuntu, ahubwo ku bushake bwa Yezu Kristu n’Imana Umubyeyi wacu wamuzuye mu bapfuye,

²n’abavandimwe bose turi kumwe, kuri za Kiliziya zo mu Bugalati:

³tubifurije ineza n’amahoro biva ku Mana Umubyeyi wacu, no kuri Nyagasani Yezu Kristu,

⁴witangiye ibyaha byacu ngo aturokore iyi si mbi, akurikije ugushaka kw’Imana, ari Yo Umubyeyi wacu.

⁵Nahabwe ikuzo uko ibihe bihora bisimburana. Amen.

⁶Ntangazwa n’ukuntu, mu kanya gato, mutangiye gucika ku wabahamagariye ineza ya Kristu, mugashikira indi Nkuru Nziza[1].

⁷Si uko haba hari indi Nkuru Nziza ibaho. Ni uko hadutse abantu bashaka ko muhagarika imitima, bashaka no guhindura Inkuru Nziza ya Kristu.

⁸Ariko rero, hagize ubigisha Inkuru Nziza itari iyo twabigishije, kabone n’aho yaba umwe muri twe, cyangwa umumalayika umanutse mu ijuru, arakaba ikivume!

⁹Mbese nk’uko twababwiye, kandi n’ubu ngubu mbisubiyemo: uzabigisha Inkuru Nziza itari iyo mwakiriye, arakaba ikivume!

¹⁰Mbese ubu ngubu nkurikiranye gushimwa n’abantu cyangwa n’Imana? Aho ntimugira ngo mparanira kuneza abantu? Mbaye nkigamije kuneza abantu[2], sinaba nkiri umugaragu wa Kristu.

¹¹Mbibamenyeshe rero, bavandimwe, iyo Nkuru Nziza nabigishije si iy’umuntu,

¹²si n’umuntu nyikesha, kandi si umuntu wayinyigishije: ni Yezu Kristu wayimpishuriye[3].

¹³Mwumvise kandi imigirire yanjye kera nkiri mu kiyahudi: ko natotezaga bikabije Kiliziya y’Imana nshaka kuyitsemba.

¹⁴Kandi benshi mu bo tungana, dusangiye n’ubwoko nabarushaga gukurikiza idini ya kiyahudi, nkabasumbya ishyaka mu guharanira umuco karande w’abasokuruza.

¹⁵Nyamara umunsi Uwanyitoranyirije nkiri mu nda ya mama, yampamagaye[4] kubw’ineza ye

¹⁶ngo ampishurire Umwana we, kugira ngo mwamamaze mu mahanga, ako kanya nahise mpaguruka nta we niriwe ngisha inama,

¹⁷habe no kuzamuka i Yeruzalemu ngo nsange abantanze kuba intumwa; ahubwo nagiye muri Arabiya[5], nyuma ngaruka i Damasi.

¹⁸Nyuma y’imyaka itatu, ni bwo nazamutse i Yeruzalemu kureba Petero, tumarana iminsi cumi n’itanu.

¹⁹Nta yindi ntumwa twabonanye, uretse Yakobo umuvandimwe[6] wa Nyagasani.

²⁰Ibi mbandikira, dore ndi mu maso y’Imana, simbeshya.

²¹Hanyuma naje mu ntara ya Siriya na Silisiya.

²²Kiliziya za Kristu ziri mu Yudeya zari zitarambona,

²³usibye ko zumvaga bavuga ngo «wa wundi wadutotezaga kera, asigaye yamamaza ukwemera yahoze arwanya.»

²⁴Nuko zigasingiza Imana kubera jye.