Read kinyarwanda Abanyagalati 4 Bible Online

Abanyagalati 4 - kinyarwanda bible

Abanyagalati 4

¹Dore icyo nshaka kuvuga: igihe cyose uwagenewe umurage akiri muto, nta ho aba atandukaniye n’umugaragu n’ubwo aba ari we mutware wa byose,

²ahubwo agumya kugengwa n’abamurera n’abashinzwe ibintu bye kugeza igihe se yategetse[32].

³Natwe ni uko: igihe twari tukiri bato, twategekwaga n’ibigenga isi[33], twari abagaragu,

⁴ariko igihe cyagenwe kigeze, Imana yohereje Umwana wayo, avuka ku mugore, kandi avuka agengwa n’amategeko,

⁵kugira ngo acungure abari bakigengwa n’amategeko, maze duhabwe kuba abana Imana yihitiyemo.

⁶Kandi koko muri abana b’Imana, yo yohereje Roho[34] w’Umwana wayo mu mitima yanyu ngo arangurure ijwi agira ati «Abba, Data[35].»

⁷Bityo rero ntukiri umugaragu, ahubwo uri umwana; kandi ubwo uri umwana, Imana iguha kuba n’umugenerwamurage.

⁸Kera mutaramenya Imana, mwari abacakara bakorera ibidafite kamere y’Imana.

⁹Ubu ngubu ariko muzi Imana, ndetse na Yo irabazi[36]. Mwongeye mute kugarukira ibyo bintu bitagira intege, bitagira uko byigira na byo? Mwakwiyemeza mute kongera kubibera abagaragu bundi bushya?

¹⁰Mwubahiriza imihango n’imiziririzo yerekeye iminsi, amezi, ibihembwe n’imyaka[37].

¹¹Munteye agahinda, nkibaza niba ntaravunikiye ubusa iwanyu.

¹²Bavandimwe, ndabinginze, nimumere nkanjye ubwo nanjye nigize nkamwe[38]. Nta kibi mwigeze mungirira.

¹³Muzi ko nari ndwaye[39] igihe nje kubigisha Inkuru Nziza bwa mbere na mbere.

¹⁴Uwo muruho mwatewe n’umubiri wanjye, ntimwigeze muwuhungana ishozi cyangwa ngo muwuvumire ku gahera[40]. Ahubwo mwanyakiriye nk’umumalayika w’Imana, nka Kristu Yezu ubwe.

¹⁵Ubu uri he wa munezero? Jyewe ndahamya rwose ko, iyo biba ibishoboka, muba mwarinogoyemo amaso yanyu ngo muyanyihere.

¹⁶Ubu se noneho mbaye umwanzi wanyu kuko mbabwije ukuri?

¹⁷Abo bantu babitayeho cyane, nyamara si icyiza babashakira, kuko bashaka kudutandukanya ngo abe ari bo mwikundira.

¹⁸Ni byiza kugira urugwiro, iyo murutewe n’umutima mwiza kandi mukarugira iteka, atari igihe ndi kumwe namwe gusa.

¹⁹Twana twanjye, ndacyari ku gise mbabyara kugeza igihe Kristu abaremwemo.

²⁰Iyaba ubu ngubu nari ndi kumwe na mwe, nari kumenya imvugo nakoresha kuko ibyanyu binshobeye.

²¹Ngaho nimumbwire mwebwe mushaka kugengwa n’amategeko: mbese ntimwumvise amategeko?

²²Koko rero biranditswe ko Abrahamu yagize abahungu babiri; umwe yavutse ku muja, undi ku mugore utigeze ubuja.

²³Ariko uw’umuja yavutse ku bwa kamere mubiri, naho uw’umugore utari umuja avuka ku bw’isezerano.

²⁴Ibyo ni incamarenga. Abo bagore bashushanya amasezerano uko ari abiri: rimwe ryo ku musozi wa Sinayi, rikabyarira ubuja, ni Hagara.

²⁵Hagara ashushanya umusozi Sinayi wo muri Arabiya, ashushanya kandi Yeruzalemu y’ubu ngubu kuko ari umuja, we n’abana be.

²⁶Naho Yeruzalemu yo mu ijuru irigenga, ni yo umubyeyi wacu.

²⁷Koko rero byanditswe ngo «Ishime mugore w’ingumba, wowe utigeze ubyara, rangurura maze uvuze impundu, wowe utamenye ububabare bw’igise, kuko abana b’intabwa baruta ubwinshi ab’ubana n’umugabo[41]».

²⁸Mwebwe rero, bavandimwe, muri abana b’isezerano nka Izaki.

²⁹Kandi uko byabaye icyo gihe, uwavutse ku bwa kamere mubiri yatotezaga uwavutse ku bwa roho, na n’ubu ni ko bimeze.

³⁰Nyamara se Ibyanditswe bibivugaho iki? «Irukana umuja n’umuhungu we, umwana w’umuja ntagahabwe umurage hamwe n’umwana w’umugore wigenga».

³¹Bityo rero, bavandimwe, ntituri abana b’umuja, turi abana b’umugore wigenga[42].