Read kinyarwanda Abanyagalati 5 Bible Online

Abanyagalati 5 - kinyarwanda bible

Abanyagalati 5

¹Kristu yaratubohoye kugira ngo tugire ubwo bwigenge[43]. Nimwemarare rero, mwirinde ko umutwaro w’ubucakara wakongera kubagonda ijosi[44].

²Ngaha jyewe Pawulo ndabibabwiye: muramutse mwigenyesheje, Kristu nta cyo yaba akibamariye.

³Nongeye kandi kwerurira umuntu wese wigenyesha, ko agomba gukurikiza amategeko iyo ava akagera[45].

⁴Muzaba mwitandukanije na Kristu rero, nimushakira ubutungane mu mategeko; muzaba mwivukije ineza.

⁵Naho twebwe, ni ku bwa Roho no mu kwemera dutegereje ubutungane twizeye.

⁶Kuko, ku muntu uri muri Kristu, nta cyo bivuze kuba yaragenywe cyangwa atagenywe; igifite akamaro ahubwo, ni ukwemera kujyana n’urukundo[46].

⁷Ko mwirukaga neza, ni nde ubabambiye ngo mudakurikiza ukuri?

⁸Igishuko nk’icyo nticyaturuka ku Uwabahamagaye.

⁹N’ubundi agasemburo gake gatutumbya irobe ryose.

¹⁰Jyewe ndabizeye muri Nyagasani, nzi ko mutatekereza ukundi. Naho ubatera guhagarika imitima, uwo azatsindwa n’urubanza, uwo ari we wese.

¹¹Naho jyewe, bavandimwe, niba nkigisha ukugenywa, naba se kandi ngitoterezwa iki? Ubwo rero, umusaraba nta we waba ugiteye kwibaza.

¹²Mbese abo babatera guhagarika umutima, bakwishahuye bakamaraho!

¹³Mwebweho, bavandimwe, mwahamagariwe ubwigenge. Gusa rero ubwigenge ntibukabere umubiri urwitwazo, ahubwo umwe abere undi umugaragu mugirirana urukundo.

¹⁴Kuko amategeko yose abumbiye muri iri jambo rimwe rukumbi ngo «Uzakunde mugenzi wawe nkawe ubwawe[47]».

¹⁵Naho niba mushihana, mugacagagurana, muramenye ntimuzamarane.

¹⁶Mureke mbabwire: Roho nabayobore, ni bwo mutazakora ibyo umubiri urarikira.

¹⁷Kuko umubiri urarikira ibirwanya Roho, na Roho igakurikirana ibyo umubiri wangira. Ibyo byombi koko birazirana ku buryo namwe mutagenza uko mwishakiye kose.

¹⁸None rero, niba muyoborwa na Roho, nta bwo mukigengwa n’amategeko.

¹⁹Ibikorwa by’umubiri birigaragaza : ubusambanyi, ubuhabara, ubwomanzi,

²⁰gusenga ibigirwamana, kuroga, kwangana, gukurura intonganya, ishyari, uburakari, kwikuza, amazimwe, amakimbirane,

²¹inzika, ubusinzi, ubusambo, n’ibindi nk’ibyo. Ndababuriye nk’uko nigeze kubibabwira : abakora bene ibyo, nta murage bazahabwa mu Ngoma y'Imana.

²²Naho imbuto ya Roho ni urukundo: ibyishimo, amahoro, kwihangana, ubugwaneza, ubuntu, ubudahemuka,

²³imico myiza, kumenya kwifata. Nta tegeko ribuza imigirire nk’iyo.

²⁴Aba Kristu Yezu babambye ku musaraba umubiri wabo n’ingeso mbi ndetse n’irari.

²⁵Niba tubeshejweho na Roho, nituyoborwe na Roho.

²⁶Twoye kurarikira ikuzo ry’amanjwe, twirinde gushotorana no kugirirana ishyari.