Read kinyarwanda Abanyagalati 6 Bible Online

Abanyagalati 6 - kinyarwanda bible

Abanyagalati 6

¹Bavandimwe, niba hagize ufatirwa mu cyaha, mwebwe abayoborwa na Roho, nimumuhane ariko mumworoheye. Nawe ubwawe witonde, maze utazavaho ushukwa.

²Nimwakirane imitwaro yanyu, bityo muzaba mwumviye byuzuye itegeko rya Kristu.

³Naho uwakwirebamo kuba akataraboneka, kandi nta cyo ari cyo, uwo yaba yibeshya.

⁴Ahubwo buri muntu asuzume ibikorwa bye bwite. Niba hari icyo abonye yakwiratana, abikore ku giti cye atigereranya n’abandi.

⁵Kuko buri wese azitwarira uwe muzigo.

⁶Uwigishwa ijambo, nahe ku bye byose urimwigisha[48].

⁷Ntimuzibeshye: Imana ntireregwa. Icyo umuntu azaba yarabibye ni cyo azasarura.

⁸Ubibira umubiri, azawusaruraho urupfu. Naho ubibira roho, azayisaruraho ubugingo bw’iteka.

⁹Nitwihatire gukora icyiza tutadohoka, bityo, niba tudacogoye, tuzasarura igihe kigeze.

¹⁰Nuko rero, ubwo tukibifitiye umwanya, nitugirire neza abantu bose, cyane cyane abo dusangiye ukwemera.

¹¹Nimwitegereze noneho izi nyuguti nini: ni jye ubwanjye ubandikira n’ukuboko kwanjye[49].

¹²Abashaka gushimwa biratana ibikorwa by’umubiri, abo ngabo ni bo babahatira kugenywa, gusa ngo badatotezwa bahorwa umusaraba wa Kristu.

¹³Nyamara n’abigenyesha, na bo ubwabo ntibakurikiza amategeko, none barashaka ko mugenywa kugira ngo birate ibyabaye mu mubiri wanyu[50].

¹⁴Naho jyewe nta kindi nakwiratana kitari umusaraba wa Nyagasani wacu Yezu Kristu: ni wo iby’isi bimbambiweho, nanjye nkaba mbibambiweho.

¹⁵Kuko nta cyo bimaze kugenywa cyangwa kutagenywa, ahubwo ukuba ikiremwa gishya.

¹⁶Abakurikiza iri tegeko bose, bahorane amahoro n’impuhwe, bo na Israheli y’Imana[51].

¹⁷Ahasigaye, ntihakagire undushya, dore ngendana mu mubiri wanjye inguma za Yezu[52].

¹⁸Ineza y’Umwami wacu Yezu Kristu isakare imitima yanyu, bavandimwe. Amen.