Read kinyarwanda Abanyafilipi 2 Bible Online

Abanyafilipi 2 - kinyarwanda bible

Abanyafilipi 2

¹Niba rero inkunga yanyu iri muri Kristu, niba koko mutera imbere mu rukundo, niba koko muhuriye kuri Roho Mutagatifu, niba kandi mufite umutima w’impuhwe,

²ngaho nimunsenderezemo ibyishimo, mutekereza kimwe, muhuje urukundo, muhuje n’umutima, murangamiye bimwe.

³Ntimukagire icyo mukora mubitewe n’ishyari cyangwa ukwikuza, ahubwo mwicishe bugufi, buri muntu yibwire ko abandi bamuruta.

⁴Mwoye guharanira ibyanyu gusa, ahubwo mwite no ku by’abandi.

⁵[8] Nimugire mu mitima yanyu amatwara ahuje n’aya Kristu Yezu ubwe:

⁶N’ubwo we yari afite imimerere imwe n’iy’Imana, ntiyagundiriye kureshya na Yo.

⁷Ahubwo yihinduye ubusabusa, yigira nk’umugaragu[9], maze mu migirire ye agaragaza ko ari umuntu. Nuko aho amariye kwishushanya n’abantu,

⁸yicisha bugufi kurushaho, yemera kumvira, ageza aho gupfa, apfiriye ndetse ku musaraba.

⁹Ni cyo cyatumye Imana imukuza, imuha Izina risumbye ayandi yose,

¹⁰kugira ngo nibamara kumva izina rya Yezu, bose bamupfukamire, mu ijuru, ku isi n’ikuzimu,

¹¹kandi indimi zose zamamaze ko Yezu Kristu ari We Nyagasani, biheshe Imana Se ikuzo.

¹²None rero nkoramutima zanjye, ubwo mutahwemye kumvira igihe nari mpari, n’ubu ngubu ndahari mubikomeze ndetse murusheho; ngaho nimushishikarire uburokorwe bwanyu mufite ubwoba kandi mudagadwa,

¹³kuko Imana ari yo ibatera gushaka no gukora ikiyishimisha.

¹⁴Mukore byose mutinuba kandi mutagingimiranya,

¹⁵kugira ngo mube indakemwa n’indahinyuka, mube n’abana b’Imana bazira inenge rwagati mu bantu b’indyarya kandi bararutse, mukamurika muri bo nk’inyenyeri mu kirere,

¹⁶kubera iryo jambo ry’ubugingo[10] mwifitemo. Bityo ku munsi wa Kristu, bizambere ikuzo kuba ntarirukiye ubusa kandi ntaravunikiye ubusa.

¹⁷Kandi n’aho byaba ngombwa ko mena amaraso yanjye, akamishwa ku gitambo[11] no ku ituro ry’ukwemera kwanyu, byanshimisha, kandi nasangira namwe mwese ibyo byishimo.

¹⁸Bityo, namwe nimwishime, kandi muhimbarwe hamwe nanjye.

¹⁹Icyakora nizeye muri Nyagasani Yezu kuboherereza bidatinze Timote, kugira ngo nanjye nimenya amakuru yanyu, nshyire umutima hamwe.

²⁰Mu by’ukuri nta wundi mfite duhuje umutima, wakwita ku byanyu koko:

²¹kuko abandi bose bakurikira ibiri ibyabo, aho gukurikira ibya Yezu Kristu.

²²Naho we, muzi agaciro ke, n’ukuntu yagokeye Inkuru Nziza hamwe nanjye nk’uko umwana agokana na se.

²³Nizeye kumuboherereza, nkimara kubona aho ibyanjye byerekeye.

²⁴Byongeye nizeye rwose muri Nyagasani ko nanjye nzaza iwanyu bidatinze.

²⁵Ariko nasanze ari ngombwa kuboherereza Epaforoditi, umuvandimwe wanjye dusangiye umurimo n’intambara, mwari mwanyoherereje ngo anyunganire mu byo nkeneye,

²⁶kuko yari abakumbuye mwese, akanashavuzwa n’uko mwumvise ko yarwaye.

²⁷Ni koko, yararwaye yenda gupfa, ariko Imana iramubabarira; nyamara si we yababariye gusa, emwe nanjye, kugira ngo noye guhora nicwa n’agahinda.

²⁸Nihutiye rero kumuboherereza, kugira ngo nimumubona mwongere kwishima, nanjye kandi ako gahinda ngakire.

²⁹Nimumwakirane rero ibyishimo muri Nyagasani, kandi mugirire icyubahiro umuntu nk’uwo.

³⁰Yari agiye gupfa azize umurimo wa Kristu[12], yitanga atizigamye kugira ngo abasimbure mu byo mutari mubashije kumfasha.