Read kinyarwanda Abanyafilipi 4 Bible Online

Abanyafilipi 4 - kinyarwanda bible

Abanyafilipi 4

¹Nuko rero, bavandimwe banjye nkunda kandi nkumbuye cyane, mwebwe byishimo byanjye n’ingororano yanjye, nimukomere mutyo muri Nyagasani, nkoramutima zanjye!

²Ndasaba Evodiya kandi ndinginga Sintike[18] ngo bashyire hamwe muri Nyagasani.

³Nawe rero, Sizugo[19], mugenzi wanjye w’indahinyuka, ndakwinginga ngo ubafashe, kuko bantabaye mu kogeza Inkuru Nziza, hamwe na Kilimenti n’abandi bangobotse; none amazina yabo akaba yanditse mu Gitabo cy’ubugingo.

⁴Muhore mwishima muri Nyagasani; mbisubiyemo, nimwishime[20].

⁵Ubugwaneza bwanyu nibumenyekane ku bantu bose. Nyagasani ari hafi.

⁶Ntimugire ikibahagarika umutima, ahubwo nimumenyeshe Imana icyo mukeneye cyose, muyisenga, muyinginga, munayishimira.

⁷Maze amahoro y’Imana arenze icyitwa ubwenge cyose, ahore mu mitima no mu bitekerezo byanyu, muri Kristu Yezu.

⁸Ahasigaye, bavandimwe, icyitwa icy’ukuri cyose kimwe n’igikwiye kubahwa, igitunganye, ikitagira inenge, igikwiye gukundwa no kuratwa, mbese icyitwa ingeso nziza cyose kandi gikwiriye ishimwe, abe ari cyo muharanira.

⁹Ibyo nabigishije kandi mwemeye, ibyo mwanyumvanye kandi mwambonanye, mujye mubikora, maze Imana y’amahoro izahorane namwe.

¹⁰Narishimye cyane muri Nyagasani mbitewe n’uko ishyaka mumfitiye ryiyongereye; icyakora, murarisanganywe, uretse ko mwari mwarabuze uko muringaragariza.

¹¹Ibyo simbivuga kubera ubukene ndimo, kuko nimenyereje kunyurwa n’ibyo mfite.

¹²Nzi kubaho ntunzwe na bike, nzi no kubaho muri byinshi. Muri byose, buri gihe, nitoje guhaga no gusonza, gukira no gukena.

¹³Nshobora byose muri Kristu untera imbaraga.

¹⁴Icyakora mwagize neza muntabara mu kaga.

¹⁵Mwebwe kandi, Banyafilipi, murabizi: Inkuru Nziza ikimenyekana iwanyu, ubwo nari nturutse i Masedoniya, nta Kiliziya n’imwe yangobotse ngo imfashe mu byo nari nkeneye, keretse mwebwe mwenyine.

¹⁶N’ubwo nari ndi i Tesaloniki[21], mwanyoherereje imfashanyo, ndetse ubugira kabiri.

¹⁷Mumenye ariko ko nta maturo mparanira; icyo nkurikiranye ni uko inyungu yanyu yiyongera.

¹⁸Ubu mfite ibya ngombwa byose, ndetse birarenze, byasendereye igihe Epaforoditi anshyikirije amaturo yanyu, yo mubavu mwiza n’igitambo kinyura Imana.

¹⁹Kandi Imana yanjye, mu bukungahare n’ikuzo byayo, izabasenderezaho ingabire zayo mu byo mukeneye byose, muri Kristu Yezu.

²⁰Nihakuzwe Imana Umubyeyi wacu iteka ryose. Amen.

²¹Mutashye uwatagatifujwe wese muri Yezu Kristu. Abavandimwe turi kumwe barabatashya.

²²Abatagatifujwe bose barabatashya, ariko cyane cyane abo mu ngoro ya Kayizari[22].

²³Muhorane ineza y’Umwami wacu Yezu Kristu.