Read kinyarwanda Abanyakolosi 2 Bible Online

Abanyakolosi 2 - kinyarwanda bible

Abanyakolosi 2

¹Nifuza rero ko mumenya intambara ikomeye mbarwanira, mwebwe n’abo muri Lawodiseya, ndetse n’abandi batigeze bambona n’amaso yabo.

²Icyo mparanira ni uko imitima yabo ihumurizwa, bakibumbira mu rukundo, kandi bakagera ku bumenyi bwuzuye bw’ibanga ry’Imana, ari ryo Kristu,

³We nganzo iganjemo icyitwa ubuhanga n’ubumenyi cyose[15].

⁴Ibyo mbibabwiriye kugira ngo hatagira ubashukisha amagambo y’amaryohereza.

⁵N’ubwo tutari kumwe bwose, mbahozaho umutima nejerejwe n’uko iwanyu ibintu byose biri mu buryo, n’uko kandi mukomeza kwemera Kristu mutadohoka.

⁶Bityo rero, nimukomeze mujye mbere muri Kristu Yezu Umwami wacu, mbese nk’uko mwamubwiwe[16];

⁷mushore imizi muri We, kandi mube ari We mwishingikirizaho, mukomejwe n’ukwemera babatoje, mushimira Imana ubudahwema.

⁸Muramenye ntihazagire ubashukisha bene za nyigisho z’ubuhendanyi bita ubuhanga bwahebuje, zihuje n’ibitekerezo by’ubuyobe bw’abantu, zigashingira ku by’isi, ariko zinyuranye na Kristu.

⁹Koko rero ni We ubusendere bwose bwa kamere‐Mana butuyemo mu buryo bw’umubiri,

¹⁰kandi namwe ubwanyu abasenderezamo ibyiza byose, We mutware w’Ibikomangoma n’Ibihangange byose.

¹¹Mwagenywe muri We[17]; ariko iryo genywa si rya rindi rikorwa n’abantu, ahubwo ni igenywa mwakorewe na Kristu, ari ryo ribakiza irari ry’imibiri yanyu.

¹²Igihe mubatijwe, mwahambanywe na Kristu, kandi muzukana na we, kuko mwemeye ububasha bw’Imana yamuzuye mu bapfuye.

¹³Mwebwe mwari mwarapfuye muzize ibyaha byanyu n’umubiri wanyu wandavuye, none Imana yabashubije ubugingo hamwe na We, itubabarira ibicumuro byacu byose.

¹⁴Yasibanganyije urwandiko rwadushinjaga[18] imyenda twarimo kubera amategeko tutakurikije, irarushwanyaguza irubamba ku musaraba.

¹⁵Yanyaze Ibikomangoma n’Ibihangange, ibakoza isoni ku mugaragaro, ibakurubana nk'ingaruzwamuheto inyuma ya Kristu utahanye intsinzi ku bw'umusaraba we.

¹⁶Nuko rero ntihakagire ubacira urubanza mu byerekeye ibiribwa cyangwa ibinyobwa, cyangwa se kubera iminsi mikuru, imboneko z’ukwezi n’amasabato[19].

¹⁷Ibyo byose ni amarenga y’ibyagombaga kuzaza, ariko ukuri nyako ni Kristu.

¹⁸Ntihakagire kandi ababavutsa amahoro bakurikiza utugenzo tudafite akamaro, bagasenga abamalayika, bakirata ko babonekewe, bakurikije ibitekerezo byabo by’amanjwe.

¹⁹Bene abo bitandukanyije n’Umutwe uhuza kandi ukagaburira umubiri wose, ukawukuza ubigirishije imitsi n’ingingo, nk’uko Imana ibishaka.

²⁰[20] Ubwo mwapfanye na Kristu, mukagobotorwa ku by’isi, ni iki cyatuma mugenza nk’aho mukiri ab’isi,

²¹mugakurikiza bene iyi miziro, ngo «Wifata iki!», cyangwa «Ntusomeho!», cyangwa «Ntukoreho!»

²²Kandi ibyo byose bizashira mukibikoresha! Ngayo amategeko n’inyigisho z’abantu!

²³Koko, ibyo byose wagira ngo birimo ubwenge, cyangwa ngo bigamije gushimisha Imana mu kwicisha bugufi no kwigomwa, nyamara nta kamaro bifite na gato ko gucubya irari ry’umubiri.