Read kinyarwanda Abanyakolosi 3 Bible Online

Abanyakolosi 3 - kinyarwanda bible

Abanyakolosi 3

¹Ubwo mwazukanye na Kristu, nimuharanire ibyo mu ijuru, aho Kristu ari, yicaye iburyo bw’Imana;

²nimurangamire iby’ijuru, aho kurarikira iby’isi.

³Koko mwapfanye na Kristu, none ubugingo bwanyu bwihishe hamwe na We mu Mana.

⁴Aho Kristu azigaragariza, We bugingo bwanyu, icyo gihe namwe muzagaragara muri kumwe na We, mu ikuzo ryisesuye.

⁵Nimucike rero ku bibarimo byose bibatera gutwarwa n’iby’isi, nk’ubwiyandarike n’ubusambanyi, ingeso mbi n’irari ribi, ibyifuzo bibi n’ubugugu butuma musenga ibintu nk’ibigirwamana!

⁶Ngibyo ibirakaza Imana.

⁷Nguko uko namwe mwagenzaga kera, mugikora ibyo.

⁸Noneho ubu, namwe ibyo byose nimubizinukwe: uburakari, umwaga, ubugome, ibitutsi, n’ibigambo bibi bibava mu kanwa.

⁹Nimuherukire aho kubeshyana, kuko mwasezereye muntu w’igisazira hamwe n’imigenzereze ye,

¹⁰mugahinduka muntu mushya, uwo Umuremyi ahora avugurura amwishushanya, agira ngo amugeze ku bumenyi nyakuri.

¹¹Icyo gihe rero ntihaba hakivugwa Umugereki cyangwa Umuyahudi, uwagenywe cyangwa utagenywe, umunyeshyanga cyangwa Umushiti[21], umucakara cyangwa uwigenga; ahubwo haba havugwa gusa Kristu, uba byose muri bose.

¹²Naho mwebwe, ntore z’Imana, mukaba abatagatifu bayo ikunda byimazeyo, nimugire umutima wuje impuhwe, ubugiraneza, ubwiyoroshye, ituze, n’ukwiyumanganya.

¹³Nimwihanganirane kandi, niba umwe agize icyo apfa n’undi mubabarirane. Nk’uko Nyagasani yabababariye, namwe nimugenze mutyo.

¹⁴Ariko ikiruta ibyo byose, nimugire urukundo ruzabahuriza mwese mu butungane.

¹⁵Kandi amahoro ya Kristu naganze mu mitima yanyu, kuko ari yo mwahamagariwe ngo mube umubiri umwe. Kandi mujye muhora mushimira.

¹⁶Ijambo rya Kristu niribaturemo, risagambe rwose. Mujye mwigishanya kandi muhanane, mubigiranye ubwitonzi. Mujye mushimira Imana mu mitima yanyu, muyiririmbira zaburi, ibisingizo n’izindi ndirimbo mubwirijwe na Roho Mutagatifu.

¹⁷Ari ibyo muvuze, ari n’ibyo mukoze, byose mujye mubigira mu izina rya Nyagasani Yezu, abe ari we mwisunga mushimira Imana Data.

¹⁸[22] Bagore, mujye mworohera abagabo banyu nk’uko bikwiye, mubigirira Nyagasani.

¹⁹Bagabo, namwe nimukunde abagore banyu, mwoye kubabera abanyamwaga.

²⁰Bana, nimwumvire ababyeyi banyu muri byose, kuko ari byo binyura Nyagasani.

²¹Babyeyi, namwe ntimugatonganye abana banyu ubutitsa, mutazabakura umutima.

²²Bagaragu, nimwumvire muri byose ba shobuja bo kuri iyi si, mudakorera ijisho, nk’aho ari abantu mushaka gushimisha, ahubwo mubigirane umutima utaryarya, mwubaha Nyagasani.

²³Icyo mukoze cyose, mujye mugikora mwimazeyo nk’abakorera Nyagasani, atari ugukorera abantu,

²⁴muzirikana ko muzahembwa na Nyagasani umurage yageneye abe. Nyagasani Kristu ni We mukorera.

²⁵Ugira inabi wese azayiturwa, kandi bose bazagenzerezwa kimwe.