Read kinyarwanda Abanyatesaloniki, iya 1 1 Bible Online

Abanyatesaloniki, iya 1 1 - kinyarwanda bible

Abanyatesaloniki, iya 1 1

¹Jyewe Pawulo, na Silivani, na Timote kuri Kiliziya[1] y’Abanyatesaloniki, yibumbiye ku Mana Data no kuri Nyagasani Yezu Kristu: tubifurije ineza n’amahoro.

²Iyo tubibutse mu masengesho yacu, ntiduhwema gushimira Imana kubera mwebwe mwese.

³Duhora twibuka ibikorwa byiza n’ukwemera kwanyu, n’imiruho muterwa n’urukundo rwanyu, n’ukuntu mwiringiye Umwami wacu Yezu Kristu mudatezuka imbere y’Imana Umubyeyi wacu.

⁴Bavandimwe, nkoramutima z’Imana, tuzi neza ko muri mu bo yatoye.

⁵Koko rero, Inkuru Nziza tubamenyesha, nta bwo yabagejejweho mu magambo gusa, ahubwo twayamamaje dushize amanga, twishingikirije ububasha butyaye[2] bwa Roho Mutagatifu. Muzi neza ukuntu twabagenjereje tugamije kubagirira akamaro.

⁶Namwe mwaratwiganye, mwigana na Nyagasani, maze mu bitotezo byinshi, mwakirana ijambo ry’Imana ibyishimo bikomoka kuri Roho Mutagatifu.

⁷Byatumye mubera urugero abemera bose bo muri Masedoniya n’abo muri Akaya.

⁸Koko rero, ijambo rya Nyagasani, rihereye iwanyu, ntiryasakaye muri Masedoniya no muri Akaya gusa, ahubwo inkuru y’ukuntu mwemeye Imana yamamaye hose, ku buryo nta cyo twakwirirwa tubivugaho.

⁹Bose kandi bavuga uko twakiriwe iwanyu, n’ukuntu mwayobotse Imana, mugata ibigirwamana, kugira ngo mukorere Imana nzima kandi nyakuri,

¹⁰kandi mutegereze Umwana wayo Yezu yazuye mu bapfuye, We uzaza ava mu ijuru ngo adukize uburakari[3] bugiye kuza.