Read kinyarwanda Yozuwe 14 Bible Online

Yozuwe 14 - kinyarwanda bible

Yozuwe 14

¹Dore ibyo Abayisraheli barazwe mu gihugu cya Kanahani, ibyo umuherezabitambo Eleyazari, Yozuwe mwene Nuni, n’abakuru b’amazu yo mu miryango ya Israheli babahayeho umurage.

²Bahabwaga umunani wabo hakoreshejwe ubufindo, nk’uko Uhoraho yari yatumye Musa kugira ngo abitegeke imiryango cyenda na kimwe cya kabiri cy’umuryango, itari yarawuhawe.

³Koko rero indi miryango ibiri na kimwe cya kabiri cy’undi muryango, Musa yari yarabahaye umunani wabo hakurya ya Yorudani. Abalevi, bo, nta munani bahawe mu bandi.

⁴Bene Yozefu bari bagabanijwemo imiryango ibiri, uwa Manase n’uwa Efurayimu; naho Abalevi nta wundi mugabane bahawe mu gihugu, uretse imigi yo kubamo n’imirima rusange yayo, kubera amatungo n’ibintu byabo.

⁵Abayisraheli bagenjeje nk’uko Uhoraho yategetse Musa[33], maze bigabanya igihugu.

⁶Bene Yuda baza kwa Yozuwe i Giligali, maze Kalebu mwene Yefune w’Umukenizi aramubwira ati «Uzi neza ibinyerekeyeho[34] Uhoraho yabwiriye Musa, umuntu w’Imana, i Kadeshi‐Barineya.

⁷Ubwo Musa, umugaragu w’Imana, ari i Kadeshi‐Barineya, yanyohereje gutata iki gihugu, nari mfite imyaka mirongo ine kandi mugezaho ibyo yari yantumye nta buryarya.

⁸Nyamara abavandimwe twazamukanye baciye rubanda intege, naho jyewe, nkurikira ubutizigama Uhoraho, Imana yanjye.

⁹Uwo munsi Musa yarahiye atya ’Ndahiye yuko igihugu wakandagiyemo kizaba umunani wawe, n’uw’abana bawe ubuziraherezo, kuko wakurikiye ubutizigama Uhoraho, Imana yanjye.’

¹⁰None dore, Uhoraho yanyihereye kuramba nk’uko yabinsezeranyije. Aho Uhoraho abwiriye Musa iryo jambo, igihe Israheli yari mu butayu, hashize imyaka mirongo ine n’itanu; none dore ubu nujuje imyaka mirongo inani n’itanu.

¹¹Ingufu nsigaranye, ni nk’izo nari mfite ubwo Musa anyohereje mu butumwa; imbaraga mfite ubu zirangana n’izo nari mfite icyo gihe, haba mu kurwana, haba no mu gukora.

¹²Uriya musozi rero, Uhoraho yavuze uwo munsi hita uwumpa. Uwo munsi kandi wumvise ko hari hatuye Abanaki, hakaba n’imigi minini ikomeye; Uhoraho namfasha nk’uko Uhoraho yabivuze, nzahabanyaga.»

¹³Yozuwe aha Kalebu, mwene Yefune, umugisha, amuha Heburoni ho umunani.

¹⁴Ni cyo gituma Kalebu, mwene Yefune w’Umukenizi, yahawe Heburoni ho umunani kugeza na n’ubu, kuko yakurikiye n’ubutizigama Uhoraho, Imana ya Israheli.

¹⁵Izina rya mbere rya Heburoni ryari KiriyatiAruba: Aruba uwo yari yarabaye umugabo w’ikirangirire mu Banaki. Ahasigaye igihugu kiratuza, intambara irahosha.