Read kinyarwanda Yozuwe 19 Bible Online

Yozuwe 19 - kinyarwanda bible

Yozuwe 19

¹Ubwa kabiri, ubufindo bwerekanye ko haramukiwe Simewoni, umuryango wa bene Simewoni, hakurikijwe amazu yabo. Umunani wabo wari rwagati mu mugabane wa bene Yuda.

²Mu munani wabo bahawe: Berisheba, Sheba, Molada,

³Hasari‐Shuwali, Bala, Esemu,

⁴Elitoladi, Betuli, Horima,

⁵Sikilagi, Betimarikaboti, Hasori‐Susa,

⁶Betilebawoti, Sharuheni: imigi cumi n’itatu n’imidugudu yayo;

⁷Hayini, Rimoni, Eteri na Ashani; imigi ine n’imidugudu yayo.

⁸Bahawe n’imidugudu yose ikikije iyo migi kugera i Bahalati‐Beyeri, ari yo Ramati y’epfo. Uwo ni wo mugabane wa bene Simewoni, ukurikije amazu yabo.

⁹Umunani wa bene Simewoni wafashwe ku wa bene Yuda, kuko umugabane wa bene Yuda wari munini kuri bo. Uko rero ni ko bene Simewoni babonye umunani wabo rwagati muri bene Yuda.

¹⁰Ubwa gatatu, ubufindo bwerekana bene Zabuloni, nk’uko amazu yabo ameze. Urubibi rw’umunani wabo rwageraga i Saridi,

¹¹rukazamuka rugana mu burengerazuba n’i Maryala, rugakora kuri Dabesheti, hanyuma ku kagezi gateganye na Yokineyamu.

¹²Kuva i Saridi, rwarahindukiraga rukerekeza mu burasirazuba, aho izuba rirasira, ku rubibi rwa Kisiloti‐Taboru, rugakomeza rugana i Daberati maze rukazamuka n’i Yafiya.

¹³Kuva aho, rukanyura mu burasirazuba i Gatiheferi, i Itakasini, rugakomeza n’i Rimoni maze rugahindukira rugana i Neya.

¹⁴Mu majyaruguru, urubibi rwazengurukaga Hanatoni, rugaherera ku mukokwe w’i Yefitaheli;

¹⁵hamwe na Katati, Nahalali, Shimironi, Yideyala, Betelehemu: imigi cumi n’ibiri n’imidugudu yayo.

¹⁶Uwo ni wo munani wa bene Zabuloni, bakurikije amazu yabo: iyo ni yo migi yabo n’imidugudu yayo.

¹⁷Ubwa kane, ubufindo bwaguye kuri Isakari, abahungu ba Isakari bakurikije amazu yabo.

¹⁸Urubibi rwabo rwaganaga i Yizireyeli, Kesuloti, Shunemu,

¹⁹Hafarayimu, Shiyoni, Anarahati,

²⁰Rabiti, Kishyoni, Ebesi,

²¹Remeti, Eniganimu, Enihada, Betipasesi.

²²Urubibi rwakoraga kuri Taboru, Shahasima, Betishemeshi maze rukagarukira kuri Yorudani: imigi cumi n’itandatu n’imidugudu yayo.

²³Uwo ni wo munani wa bene Isakari nk’uko amazu yabo angana: iyo ni yo migi yabo n’imidugudu yayo.

²⁴Ubwa gatanu, ubufindo buhira umuryango wa bene Asheri nk’uko amazu yabo angana.

²⁵Urubibi rwabo rwari Helekati, Hali, Beteni, Akishafi,

²⁶Alameleki, Ameyadi, Misheyali; rwageraga kuri Karumeli mu burengerazuba, n’i Shihori‐Libinati.

²⁷Hanyuma rukagarukira mu burasirazuba rugana i Betidagoni, rugakora kuri Zabuloni no ku mukoke w’i Yifitaheli, mu majyaruguru ya Betemeki na Nehiyeli; rugakomeza ibumoso rugana i Kabuli,

²⁸Eburoni, Rehobu, Hamoni na Kana, kugera kuri Sidoni nini.

²⁹Urubibi rwahindukiraga rwerekera i Rama, kugera ku kigo cy’i Tiri, maze rugakomeza rugana i Hoza no ku nyanja, mu karere ka Akizibu;

³⁰hamwe na Ako, Afeki, Rehobu: imigi makumyabiri n’ibiri n’imidugudu yayo.

³¹Uwo ni wo munani w’umuryango wa bene Asheri bakurikije inzu zabo, iyo ni yo migi yabo n’imidugudu yayo.

³²Ubwa gatandatu, ubufindo bufata bene Nefutali bakurikije amazu yabo.

³³Urubibi rwabo rwaheraga i Helefi no kuva i Eloni, runyuze i Sananimu, i Adami‐Nekebu, i Yebuneyeli kugera i Lakumu, rukagarurwa na Yorudani.

³⁴Urubibi rwahindukiraga rwerekera mu burengerazuba i Azinoti‐Taboru, rukahava rukomeza i Hukoki. Rwakoraga kuri Zabuloni mu majyepfo no kuri Asheri mu burengerazuba, hanyuma rugakora kuri Yorudani mu burasirazuba.

³⁵Imigi yabo izitiwe yari: Sidimu, Seri, Hamati, Rakati, Kinereti,

³⁶Adama, Rama, Hasori,

³⁷Kedeshi, Edereyi, Enihasori,

³⁸Yireyoni, Migideli, Horemu, Betanata, Betishemeshi: imigi cumi n’icyenda n’imidugudu yayo.

³⁹Uwo ni wo munani w’umuryango wa bene Nefutali bakurikije amazu yabo, iyo ni yo migi yabo n’imidugudu yayo.

⁴⁰[36] Ubwa karindwi, ubufindo bwerekana umuryango wa bene Dani, bakurikije amazu yabo.

⁴¹Urubibi rw’umunani wabo rwari Soreya, Eshitayoli, Irishemeshi,

⁴²Shalabimu, Ayaloni, Yitila,

⁴³Eloni, Timuna, Ekironi,

⁴⁴Eliteke, Gibetoni, Balati,

⁴⁵Yehudi, Beneberaki, Gatirimoni,

⁴⁶amazi ya Yarukoni, Rakoni, ndetse n’intara iteganye na Yafa.

⁴⁷Ariko iyo ntara, bene Dani ntibayigarurira, ahubwo barazamuka batera Leshemu, maze barayitsinda. Abaturage baho babamarira ku icumu, maze barahigarurira. Barahatuye kandi Leshemu bayita Dani, bayitiriye umukurambere wabo, Dani.

⁴⁸Uwo ni wo munani w’umuryango wa bene Dani, bakurikije amazu yabo, iyo ni yo migi yabo n’imidugudu yayo.

⁴⁹Bamaze kugabanya igihugu bakurikije imbibi zacyo, Abayisraheli bahaye Yozuwe mwene Nuni, umunani muri bo.

⁵⁰Nk’uko itegeko ry’Uhoraho ryabivugaga, bamuhaye umunani yari yarasabye, ari wo Timunati‐Seraki, mu misozi ya Efurayimu. Umugi arawuvugurura, maze awuturamo.

⁵¹Iyo ni yo migabane, Eleyazari umuherezabitambo, Yozuwe mwene Nuni, n’abakuru b’imiryango y’Abayisraheli batanze bakoresheje ubufindo, imbere y’Uhoraho i Silo, ku muryango w’ihema ry’ibonaniro. Barangiza batyo kwigabanya igihugu.