Read kinyarwanda Abanyatesaloniki, iya 2 3 Bible Online

Abanyatesaloniki, iya 2 3 - kinyarwanda bible

Abanyatesaloniki, iya 2 3

¹Ahasigaye, bavandimwe, mudusabire[6] kugira ngo ijambo rya Nyagasani rikomeze gukwira hose, ryamamare nk’uko bimeze iwanyu.

²Musabe kandi kugira ngo turokoke abantu b’abagome n’abagiranabi: koko rero kwemera si ibya bose.

³Nyagasani ni indahemuka: azabakomeza, abarinde Nyakibi.

⁴Kandi ku bwa Nyagasani ntidushidikanya ko ibyo tubategeka, mubikora mukazanabikomeza.

⁵Nyagasani nayobore imitima yanyu, ayitoze gukunda Imana no kwiyumanganya nka Kristu.

⁶Bavandimwe, mu izina rya Nyagasani Yezu Kristu, tubategetse kwirinda umuvandimwe wese w’inyandagazi[7], udakurikiza inyigisho n’umuco mudukomoraho.

⁷Muzi neza ukuntu mugomba kudukurikiza: nta bwo twigeze tuba inkorabusa iwanyu,

⁸nta n’umwe twigeze dusaba umugati wadutunze; ahubwo ijoro n’amanywa, mu mvune n’imiruho, twarikoreraga ubwacu, kugira ngo hatagira n’umwe muri mwe tugora.

⁹Si ukuvuga ko tutari tubifitiye uburenganzira, ahubwo twashakaga kubabera urugero mukurikiza.

¹⁰Igihe twari iwanyu, twabahaye uyu mugambi, tuti «Niba hari udashaka gukora, ajye areka no kurya!»

¹¹None dusigaye twumva ko muri mwe harimo abandaraye, ntibagire icyo bakora, ahubwo bakivanga muri byose.

¹²Abameze batyo tubategetse kandi tubasabye ibi ngibi; muri Nyagasani Yezu Kristu: nibajye bakora mu ituze, batungwe n’umugati baruhiye ubwabo.

¹³Namwe, bavandimwe, ntimukadohoke mu gukora neza.

¹⁴Niba kandi hari utumvira ibyo tuvuze muri iyi baruwa, muramumenye, mumugendere kure, kugira ngo akorwe n’isoni.

¹⁵Icyakora ntimukamufate nk’umwanzi, ahubwo mumugire inama bya kivandimwe.

¹⁶Nyagasani Nyir’amahoro ubwe nabagwirize amahoro, aho muri hose n’igihe cyose. Nyagasani abane namwe mwese.

¹⁷Iyi ndamutso, ni jyewe ubwanjye Pawulo uyiyandikiye[8]. Kandi mu mabaruwa yanjye yose ni cyo kizabemeza ko ari jyewe: ni uko nandika!

¹⁸Muhorane iteka ineza y’Umwami wacu Yezu Kristu.