Read kinyarwanda Timote, iya 2 3 Bible Online

Timote, iya 2 3 - kinyarwanda bible

Timote, iya 2 3

¹Umenye neza kandi ko mu minsi y’imperuka[13] hazaza ibihe by’amakuba.

²Koko hazagwira abantu bikunda ubwabo, n’abafite inyota nyinshi y’ibintu, n’abirasi, n’abikuza, n’abanyarubwa, n’ibyigomeke ku babyeyi, n’indashima, n’inkorashyano,

³n’abagome, n’abazirampuhwe, n’abanyamazimwe, n’abatihanganira abandi, n’indakoreka, n’abanzi b’ibyiza,

⁴n’abagambanyi, n’ibishihanyi, n’abahumwe amaso n’ubwirasi, n’abakunda ibyishimo by’umubiri aho gukunda Imana,

⁵n’abiha isura y’ubusabaniramana, ariko mu by’ukuri bahakana ishingiro ryabwo. N’abo ngabo rero urabirinde.

⁶Ndetse n’ubu, bene abo babarimo; navuga nk’abacengera mu ngo[14], bagashuka abagore b’abapfayongo[15] baheranywe n’ibyaha, bagatwarwa n’ingeso mbi zose,

⁷maze n’ubwo bahora baharanira kwigishwa, ugasanga badashobora na busa kumenya ukuri.

⁸Nk’uko kera Yanesi na Yambure[16] barwanije Musa, ni na ko abo ngabo barwanya ukuri, kuko ari abantu bafite umutima ucuramye, ntibagire ukwemera guhamye.

⁹Ariko ntibazashobora kubikomeza, kuko amaherezo ubusazi bwabo buzatahurwa na bose, nk’uko ubwa bariya bombi bwagaragaye.

¹⁰Naho wowe, wakomeje kunkurikira muri byose: mu nyigisho zanjye, mu migenzereze yanjye, mu migambi yanjye, mu kwemera kwanjye, mu kwihangana kwanjye, mu rukundo n’ubudacogora byanjye,

¹¹mu bitotezo n’ibyago naboneye Antiyokiya, n’Ikoniyo n’i Lisitiri[17]. Mbega ibitotezo nabonye! Ariko byose Nyagasani yabinkuyemo.

¹²Ni koko, abashaka bose kubaho muri Kristu barangwa n’ubuyoboke, ntibazabura gutotezwa.

¹³Naho abagiranabi n’abahendanyi, bo ntibazabura kugenda barushaho gukora nabi ubudahwema bataretse guhenda abandi no guhendwa ubwabo.

¹⁴Ariko wowe, gumya kwibanda ku byo wigishijwe kandi wakiriye udashidikanya. Uzi neza uwo ubikomoraho;

¹⁵kandi kuva mu buto bwawe wamenye Ibyanditswe Bitagatifu; ni byo bishobora kukubera isoko y’ubuhanga bukuganisha ku mukiro ubikesheje kwemera Kristu Yezu.

¹⁶Icyitwa Igitabo gitagatifu cyose cyahumekewemo[18] n’Imana kandi gifite akamaro mu byerekeye kwigisha, no kuvuguruza ubuyobe, gukosora no gutoza umuntu iby’ubutungane;

¹⁷bityo umuntu w’Imana wese akabasha kuba igihame kandi akabona intwaro zimufasha gukora icyiza cyose.