Read kinyarwanda Abehebureyi 11 Bible Online

Abehebureyi 11 - kinyarwanda bible

Abehebureyi 11

¹Ukwemera[46] ni ishingiro ry’ibyo twizeye, kukatubera n’icyemezo cy’ibitagaragara.

²Ukwemera ni ko kwahesheje abakera[47] gushimwa n’Imana.

³Ukwemera kutwumvisha ko ibyaremwe byatunganijwe n’Ijambo ry’Imana, bityo rero ko ibigaragara bikomoka ku bitagaragara.

⁴Ukwemera kwatumye Abeli ahereza Imana igitambo gitambutse icya Kayini. Kwamugaragajeho rero kuba intungane kuko Imana yashimye amaturo ye. Ku bw’uko kwemera, n’ubwo yapfuye bwose, aracyavuga na n’ubu.

⁵Ukwemera kwatumye Henoki ajyanwa, maze ahonoka urupfu, akaba rero nta wongeye kumubona, kuko Imana yamwijyaniye; koko mbere y’uko ajyanwa yari yaragaragaweho ko yanogeye Imana.

⁶Nuko rero nta we ushobora kunyura Imana adafite ukwemera, kuko uwegera Imana wese agomba kwemera ko ibaho kandi igahemba abayishakashaka.

⁷Aho Nowa amariye kumenyeshwa ibyari bitaraba, ukwemera kwatumye adashidikanya maze aremekanya ubwato bwo kurokoreramo umuryango we. Ubwo ahamya isi icyaha, maze asigara ari ingenerwamurage y’ubutungane buturuka ku kwemera.

⁸Ukwemera kwatumye Abrahamu yumvira Imana, agenda agana igihugu yari agiye guhabwa ho umurage, kandi agenda atazi iyo ajya.

⁹Ukwemera kwatumye atura nk’umushyitsi mu gihugu yasezeranijwe, acumbika mu ihema, hamwe na Izaki na Yakobo, ari bo basangiye amasezerano.

¹⁰Abrahamu uwo yari ategereje umurwa wubatse ku kibanza gikomeye, watekerejwe kandi ukubakwa n’Imana ubwayo.

¹¹Ukwemera kwatumye na Sara, wari ugeze mu zabukuru, ahabwa ubushobozi bwo gusama inda, kuko yari yizeye ubudahemuka bw’Uwabagiriye amasezerano.

¹²Ni na yo mpamvu umuntu umwe, ndetse wari wegereje urupfu yakomotsweho n’imbaga ingana n’inyenyeri zo mu kirere kandi itabarika nk’umusenyi wo ku nkombe y’inyanja.

¹³Abo bose bapfanye ukwemera, na none bataragera ku byiza basezeranijwe, ariko basa n’ababirabukwa, babiramukiriza kure, bahamya ko ari abagenzi n’abashyitsi kuri iyi si.

¹⁴Abavuga batyo baragaragaza rwose ko bari mu gushakashaka igihugu cy’iwabo nyakuri;

¹⁵kuko iyo baza kuba bakumbuye icyo baturutsemo, bari bagifite umwanya uhagije wo gusubirayo.

¹⁶Mu by’ukuri bari barangamiye ikindi gihugu cyiza, ari cyo iwabo ho mu ijuru. Ni na yo mpamvu Imana itagira ipfunwe ryo kwitwa Imana yabo, kuko ari Yo yabateguriye umurwa.

¹⁷Ukwemera kwatumye, mu gihe cy’igeragezwa, Abrahamu atura Izaki ho igitambo; atura umwana we w’ikinege, kandi yari yarahawe amasezerano,

¹⁸abwirwa ati «Izaki ni we uzaguhesha urubyaro ruzakwitirirwa.»

¹⁹Yiyemezaga ko Imana ishobora no kuzura uwapfuye, bituma asubizwa umwana we, biba n’amarenga y’ibizaza.

²⁰Ukwemera kwatumye Izaki aha Yakobo na Ezawu umugisha uzabafasha mu gihe kizaza.

²¹Ukwemera kwatumye Yakobo, igihe yari agiye gupfa, aha umugisha buri muhungu wa Yozefu, nuko apfukama yishingikirije inkoni ye.

²²Ukwemera kwatumye Yozefu wendaga gupfa atangaza imitahukire y’abana ba Israheli, kandi agena n’uko bazagenzereza amagufa ye.

²³Ukwemera kwatumye Musa, amaze kuvuka, ahishwa n’ababyeyi be amezi atatu yose, kuko bari banyuzwe n’uburanga bwe, ntibatinya guca ku itegeko ry’umwami.

²⁴Ukwemera kwatumye Musa, aho amariye gukura, yigurutsa kwitwa umwana w’umukobwa wa Farawo,

²⁵ahitamo kuburagizwa hamwe n’umuryango w’Imana aho kwishimishiriza mu byaha by’igihe gito.

²⁶Yiyumvisha ko kwifatanya n’ugusuzugurwa k’umuryango watowe bitambukije kure agaciro ubukire bwose bwo mu Misiri, kuko amaso ye yari arangamiye indi ngororano.

²⁷Ukwemera kwatumye yimuka mu Misiri ntiyakangwa n’uburakari bw’umwami, nuko ntiyahindagana amera nk’umuntu wizigiye Utaboneshwa amaso.

²⁸Ukwemera kwatumye ahimbaza Pasika, maze asiga amaraso ku nzu z’Abayisraheli, kugira ngo Umunyacyorezo atarimbura abana b’imfura.

²⁹Ukwemera kwabambukije Inyanja Itukura nko ku butaka bwumutse, mu gihe Abanyamisiri babiganye, bo bararohama.

³⁰Ukwemera kwatumye inkuta zizitiye Yeriko zihirika, bamaze kuzizenguruka iminsi irindwi yose.

³¹Ukwemera kwatumye Rahabu w’ihabara atarimburwa hamwe n’ibyigomeke, kuko yakiranye amahoro intasi za Israheli.

³²Mbese mvuge nte kandi? Nta gihe nabona cyo kuvuga bihagije ibya Gideyoni, Baraki, Samusoni, Yefute, Dawudi, Samweli, n’Abahanuzi.

³³Ukwemera kwabo kwatumye batsinda amahanga, bategekana ubutabera, buzurizwa amasezerano, bazibiranya urwasaya rw’intare,

³⁴bazimya ubukana bw’umuriro, bahonoka ubugi bw’inkota, bashinga intege bakirutse indwara, bagira ubutwari igihe cy’intambara, bakumira ingabo z’abanyamahanga.

³⁵Hari n’abagore bazuriwe abana babo bari bapfuye. Hari n’abahisemo gutanyaguzwa, banga kubabarirwa, kugira ngo bazashyikire ubugingo bwisumbuye bw’abazutse.

³⁶Abandi bemeye agashinyaguro n’ibiboko, ndetse n’ingoyi n’uburoko.

³⁷Hari abatewe amabuye, basatuzwa urukero, batemaguzwa inkota; hari abatorongeye, bagenda bambaye impu z’intama n’iz’ihene, ari abatindahare, bapfukiranwa kandi batotezwa,

³⁸— abatari bagenewe kuba ab’isi — babuyeraga ku gasi no mu misozi, bahungira mu bigugu no mu masenga y’isi.

³⁹Abo bose, n’ubwo Imana yashimye ukwemera kwabo, ntibashoboye gushyikira iyuzuzwa ry’amasezerano;

⁴⁰kuko Imana yari iduteganyirije ibyiza biruseho, ntiyashatse kubageza ku ndunduro yabyo, tutari kumwe.