Read kinyarwanda Abehebureyi 2 Bible Online

Abehebureyi 2 - kinyarwanda bible

Abehebureyi 2

¹Ni yo mpamvu tugomba guhugukira cyane ibyo twumvise, niba tudashaka kugenda tuyobagurika.

²Tuzirikane ukuntu ijambo ryavuzwe kera n’abamalayika[11] ryabaye impamo, n’ukuntu abarirenzeho bakarisuzugura bikururiye igihano kibakwiye.

³Twebwe rero twazarokoka dute niba turangaranye umukiro wa bene ako kageni, wabanje kwamamazwa na Nyagasani ubwe, nyuma natwe abawumvise tukawuhamya,

⁴kandi Imana ubwayo iwukomeresha ibimenyetso, ibitangaza n’ibikorwa by’impangare by’amoko yose, n’ingabire Roho Mutagatifu atanga nk’uko abishaka.

⁵Abamalayika si bo bahawe kugenga isi izaza tuvuga. Umwanditsi wa zaburi abihamya agira ati

⁶«Umuntu ni iki kugira ngo wirirwe umwibuka? Mwene Muntu ni iki kugira ngo wirirwe umwitaho?

⁷Wamucishije bugufi y’abamalayika ho gato; umutamiriza ikamba ry’ikuzo n’icyubahiro;

⁸ibintu byose ubishyira mu nsi ye[12].» Ubwo byose yamuhaye kubigenga, nta kintu na kimwe rero kitamweguriwe. Icyakora kuri ubu ntibiragaragara ko byose byamuyobotse,

⁹nyamara dore icyo tubona: Yezu uwo, wagizwe muto ku bamalayika mu gihe kigufi, ubu kubera ko yababaye agapfa, tumubona atamirije ikamba ry’ikuzo n’icyubahiro. Bityo, ku bw’ineza y’Imana, urupfu yigabije rwagiriye buri muntu akamaro.

¹⁰Mu by’ukuri, byari bikwiye ko Imana, Yo irema byose ikabibeshaho, igira ikirenga Umwana wayo — ari we uburokorwe bwose buturukaho —, imunyujije mu bubabare, ngo ibonereho kwigarurira abana batabarika basangira ikuzo ryayo.

¹¹Koko rero utagatifuza n’abatagatifujwe basangiye inkomoko, bigatuma adashidikanya kubita abavandimwe,

¹²avuga ati «Nzogeza izina ryawe mu bavandimwe banjye; nzagusingirize rwagati mu ikoraniro[13].»

¹³Akongera ati «Ni we nzashyiramo amizero yanjye[14].» Kandi ati «Dore ndi hano, jyewe n’abana Imana yampaye[15].»

¹⁴None rero, ubwo abana bafitanye ubumwe bw’amaraso n’umubiri, Yezu na We yasangiye na bo ubwo bumwe kugira ngo mu rupfu rwe atsiratsize umugenga warwo, ari we Sekibi,

¹⁵maze abohore abatinyaga urupfu rubahoza mu bucakara igihe cy’ubuzima bwabo bwose.

¹⁶Koko ntiyaje atabaye abamalayika, ahubwo yaje atabaye inkomoko y'Abrahamu.

¹⁷Kubera iyo mpamvu yagombaga kwishushanya n’abavandimwe be muri byose, akaba Umuherezagitambo Mukuru[16] w’umunyampuhwe, kandi wishyikira ku Mana ngo ahanagure ibyaha by’imbaga.

¹⁸Ubwo We yababaye kandi akageragezwa, ashobora no gutabara abageragezwa.