Read kinyarwanda Yakobo 1 Bible Online

Yakobo 1 - kinyarwanda bible

Yakobo 1

¹Jyewe Yakobo, umugaragu w’Imana n’uwa Nyagasani Yezu Kristu, ku batoranyijwe n’Imana bo mu miryango cumi n’ibiri[1], batuye mu mahanga, ndabaramutsa.

²Bavandimwe, amagorwa y’amoko yose munyuramo, mujye muyakirana ibyishimo byinshi,

³mumenye kandi ko ibigerageza ukwemera kwanyu bibyara ubwiyumanganye.

⁴Ariko rero ubwo bwiyumanganye bugomba kuba bugaragara, kugira ngo mube abantu bahamye kandi nyabo, mbese batagira amakemwa.

⁵Niba muri mwe hari ubuze ubuhanga[2], abusabe Imana izabumuha, Yo iha bose ku buntu kandi itagombye kugondozwa.

⁶Ariko rero, ajye asabana ukwemera atabanje kujijinganya; kuko ujijinganya asa n’umuvumba mu nyanja ihubanganyijwe n’umuyaga.

⁷Bene uwo muntu ntakibwire ko hari icyo Nyagasani yakwihera

⁸umuntu w’imberabyombi, uhindagurika mu nzira ze zose.

⁹Umuvandimwe w’umukene niyishimire ikuzwa rye[3],

¹⁰n’umukire yishimire ugucishwa bugufi kwe[4], kuko umukire azahita nk’ururabyo rw’icyatsi.

¹¹Izuba ryararashe n’ubushyuhe bwaryo bwinshi, ryumisha icyatsi, ururabyo rurahunguka, maze ubwiza bwarwo burayoyoka. N’umukire rero azarabirana atyo mu byo akora byose.

¹²Hahirwa umuntu uba intwari mu bigeragezo, kuko namara kugeragezwa, azahabwa ikamba ry’ubugingo Imana yasezeranyije abayikunda.

¹³Nihagira ugwa mu gishuko, ntakavuge ati «Ni Imana inshuka», kuko Imana idashobora koshya gukora ikibi cyangwa ngo igire uwo ishuka[5].

¹⁴Buri muntu ashukwa n’irari rye bwite rimukurura, maze rikamwoshya.

¹⁵Iyo iryo rari rimaze gusama, ribyara icyaha, n’icyaha cyamara gukura kikabyara urupfu.

¹⁶Ntimukibeshye rero, bavandimwe nkunda.

¹⁷Icyitwa ingabire y’agaciro cyose, n’ituro rishyitse iryo ari ryo ryose, bikomoka mu ijuru ku Mubyeyi w’urumuri[6], we udahinduka kandi ntatume habaho umwijima uturutse ku mihindagurike y’ibihe.

¹⁸Ni ku bwende bwe bwite yatwibyariye akoresheje ijambo rye ry’amanyakuri, kugira ngo tube imena mu biremwa bye.

¹⁹Mubimenye rero, bavandimwe nkunda, ko muri impuguke. Nyamara, buri muntu arabangukirwe mu gutega amatwi, ariko ntagahubuke mu kuvuga; atinde no kurakara,

²⁰kuko uburakari bw’umuntu budakora igihuje n’ubutungane bw’Imana.

²¹Nimwitandukanye rero n’icyitwa ubwandure cyose, n’icyitwa agasigisigi k’ubugira nabi kose, mwakirane urugwiro ijambo ryababibwemo kandi rishobora kubakiza.

²²Mube abantu bagaragaza mu bikorwa ijambo ry’Imana, kuko kwishimira kuryumva byonyine ari ukwibeshya[7].

²³Koko rero, niba umuntu ateze amatwi ijambo ariko ntarikurikize, amera nk’umuntu urebera mu ndorerwamo isura yavukanye:

²⁴iyo amaze kwireba, aragenda, agahita yibagirwa uko yasaga.

²⁵Naho uwibanda ku itegeko rihamye, ari ryo ry’ubwigenge, kandi akaryizirikaho, atari uryumva akaryibagirwa, ahubwo ari urikurikiza; uwo nguwo azagira amahirwe mu bikorwa bye.

²⁶Niba hari uwibwira ko ari umuyoboke w’Imana, ariko ntashobore gutegeka ururimi rwe, aba yibeshya, n’iyobokamana rye riba ari ubusa.

²⁷Iyobokamana risukuye kandi ritagira amakemwa mu maso y’Imana Data ni iri ngiri: ni ugusura imfubyi n’abapfakazi mu magorwa yabo, kwirinda ubwandu bwose bwo kuri iyi si, kugira ngo ube umuziranenge.