Read kinyarwanda Yohani, iya 1 5 Bible Online

Yohani, iya 1 5 - kinyarwanda bible

Yohani, iya 1 5

¹Umuntu wese wemera ko Yezu ari Kristu, yabyawe n’Imana; kandi n’umuntu wese ukunda Imana Umubyeyi, akunda n’uwabyawe na Yo.

²Dore icyo tumenyeraho ko dukunda abana b’Imana: ni uko dukunda Imana kandi tugakurikiza amategeko yayo.

³Dore gukunda Imana icyo ari cyo: ni uko twakurikiza amategeko yayo. Kandi amategeko yayo ntavunanye,

⁴kuko icyabyawe n’Imana cyose gitsinda isi. Intsinzi kandi yaganje isi, ni ukwemera kwacu.

⁵Ni nde utsinda isi atari uwemera ko Yezu ari Umwana w’Imana?

⁶Uwo nyine ni We waje ku bw’amazi n’amaraso[19], aba Yezu Kristu. Yaje, atari ku bw’amazi yonyine, ahubwo ku bw’amazi n’amaraso; ni Roho ubihamya, kuko uwo Roho nyine ari ukuri.

⁷Ubwo rero hari ibintu bitatu byo kubihamya:

⁸Roho, amazi n’amaraso, kandi byose uko ari bitatu birahuje.

⁹Niba twakira ubuhamya bw’abantu, ubuhamya bw’Imana bwo burushijeho, kuko ari ubuhamya Imana yatanze ku Mwana wayo.

¹⁰Uwemera Umwana w’Imana aba yakiriye muri we ubwo buhamya. Naho utemera Imana aba ayigize umubeshyi, kuko atemera bwa buhamya Imana yatanze ku Mwana wayo.

¹¹Dore rero ubwo buhamya: Imana yaduhaye ubugingo buhoraho, kandi ubwo bugingo buri mu Mwana wayo.

¹²Ufite Mwana, aba afite ubugingo; naho udafite Umwana w’Imana, nta bugingo aba afite.

¹³Nabandikiye ibyo byose kugira ngo mwebwe, abemera Umwana w’Imana, mumenye ko mufite ubugingo buhoraho.

¹⁴Dore rero amizero dufite muri We: nitugira icyo tumusaba, gihuje n’ugushaka kwe, azatwumva.

¹⁵Ubwo rero tuzi ko atwumva mu byo tumusabye ibyo ari byo byose[20], tunamenyereho ko dutunze ibyo twamusabye.

¹⁶Niba umuntu abonye umuvandimwe we akora icyaha, ariko icyaha kitajyana mu rupfu, namusabire; maze Imana imuhe ubugingo, niba koko icyaha yakoze kitajyana mu rupfu. Habaho icyaha kijyana mu rupfu: uwakoze icyo si we mvuze ko mugomba gusabira.

¹⁷Ubugome bwose ni icyaha, ariko icyaha kibonetse cyose ntikijyana mu rupfu.

¹⁸Tuzi ko umuntu wese wabyawe n’Imana atongera gucumura ukundi, ahubwo Umwana w’Imana aramurinda, maze Sekibi ntamugireho ububasha.

¹⁹Tuzi yuko turi ab’Imana, naho ab'isi bose bakagengwa na Sekibi.

²⁰Tuzi kandi ko Umwana w’Imana yaje, akaduha ubushishozi, kugira ngo tumenye Nyir’ukuri. Kandi turi muri Nyir’ukuri, tubikesha Umwana we Yezu Kristu. Ni We Nyir’ukuri[21], akaba Imana n’ubugingo buhoraho.

²¹Twana twanjye, nimwirinde ibigirwamana.