Read kinyarwanda Abacamanza 18 Bible Online

Abacamanza 18 - kinyarwanda bible

Abacamanza 18

¹Muri iyo minsi, nta mwami wariho muri Israheli. Hagati aho, umuryango wa Dani washakaga igihugu waturamo, kuko kugeza icyo gihe bo nta cyo bagiraga, mu miryango yose ya Israheli.

²Abadani bafata abantu batanu b’intwari mu muryango wabo, babohereza mu karere ka Soreya na Eshitayoli kugira ngo bitegereze igihugu kandi bakimenye neza. Barababwira bati «Nimugende mumenye neza icyo gihugu.» Abo bantu batanu bagera mu karere k’imisozi miremire y’i Efurayimu, bahingukira ku rugo rwa Mika, baraharara.

³Nuko igihe bari bugufi y’urugo rwa Mika, bamenya ijwi ry’uwo musore w’Umulevi. Ngo bamugere iruhande, baramubaza bati «Ni nde wakuzanye hano? Urahakora iki? Ni iki cyatumye uhaguma?»

⁴Arabasubiza ati «Mika yankoreye ibintu byinshi: yananshyizeho ngo mubere umuherezabitambo.»

⁵Baramubwira bati «Nuko rero, baza Imana kugira ngo tumenye niba uru rugendo rwacu ruzaba ruhire.»

⁶Umuherezabitambo arabasubiza ati «Nimugende amahoro! Urugendo murimo rushyigikiwe n’Uhoraho!»

⁷Ba bantu batanu baragenda, bagera i Layishi. Basanga abaturage b’aho bibereye mu mutekano nk’Abasidoni, bari batuje kandi bizerana. Byongeye kandi, nta mwami n’umwe wateraga icyo gihugu, nta n’uwajyagayo kugira ngo abategeke. Abaturage b’i Layishi bari kure y’Abasidoni, ntawabategekaga.

⁸Ba bantu batanu baragaruka, basanga abavandimwe babo i Soreya n’i Eshitayoli, maze abavandimwe babo barababaza bati «Murabitekerezaho iki?»

⁹Barabasubiza bati «Duhaguruke! Tuzamuke tubatere, kuko igihugu twakibonye kandi kikaba ari cyiza cyane. Ariko kandi, dore mwibereye aho nta cyo mukora! Uwo mwete muke wanyu ntubabuze kugenda ngo mwinjire muri icyo gihugu kandi ngo mucyigarurire.

¹⁰Nimukinjiramo, muzahasanga abantu bizerana. Igihugu kiragutse kandi Imana yakibeguriye. Ni ahantu hatabuze ikintu na kimwe mu byiza byo ku isi.»

¹¹Nuko Abadani bagera ku bantu magana atandatu biteguye intambara, barahaguruka bava i Soreya n’i Eshitayoli.

¹²Barazamuka baca ingando i Kiriyati‐Yeyarimu, muri Yuda. Ni yo mpamvu aho hantu hitwa Ingando ya Mahanedani kugeza na n’ubu. Ni ahagana mu burengerazuba bwa Kiriyati‐Yeyarimu.

¹³Bavuye aho ngaho, banyura mu karere k’imisozi miremire y’i Efurayimu, maze bahingukira ku rugo rwa Mika.

¹⁴Ba bantu batanu bari baragiye gutata igihugu cya Layishi bafata ijambo, babwira abavandimwe babo, bati «Ese muzi ko muri uru rugo, harimo uruhago rw’amabuye y’ubufindo n’udushushanyo tweguriwe Imana, hakaba n’ikindi kigirwamana n’ishusho ry’icyuma gishongeshejwe? None rero, mumenye hakiri kare icyo muri bukore.»

¹⁵Nuko ba bantu batanu baca ku ruhande, binjira mu nzu ya wa musore w’Umulevi wari mu rugo rwa Mika, bamubaza amakuru ye,

¹⁶naho ba bantu magana atandatu bo mu muryango wa Dani bari bahagaze ku marembo, bose bitwaje intwaro z’intambara.

¹⁷Nuko ba bantu batanu bari baragiye gutata igihugu bazamuka mu nzu yo hejuru, barinjira maze bafata rya shusho ry’ikigirwamana, uruhago rw’amabuye y’ubufindo, udushushanyo tweguriwe Imana n’ishusho ry’icyuma cyashongeshejwe. Naho umuherezabitambo, yari ahagaze ku marembo hamwe na ba bantu magana atandatu bitwaje intwaro z’intambara.

¹⁸Abari binjiye mu rugo kwa Mika bari basahuye rya shusho ry’ikigirwamana, uruhago rw’amabuye y’ubufindo, udushushanyo tweguriwe Imana n’ishusho ry’icyuma gishongeshejwe. Umuherezabitambo ni ko kubabaza, ati «Murakora iki aho ngaho?»

¹⁹Baramusubiza bati «Ceceka, kandi ushyire urushyi ku munwa wawe, maze udukurikire, utubere umubyeyi n’umuherezabitambo. Kuri wowe ibyaba byiza ni ibihe: ari ukuba umuherezabitambo w’urugo rw’umuntu umwe, cyangwa uw’umuryango wose wa Israheli?»

²⁰Umuherezabitambo arabyishimira, aherako afata uruhago rw’amabuye y’ubufindo, udushushanyo tweguriwe Imana na rya shusho ry’ikigirwamana, maze ajyana n’iyo mbaga imushagaye.

²¹Abadani barahindukira, babanza abana, amatungo n’imitwaro imbere, maze baragenda.

²²Bamaze kugera kure yo kwa Mika, ni bwo abaturage bari batuye mu ngo zegeranye n’urwo kwa Mika bakoraniye hamwe maze barabakurikira.

²³Uko basakuzaga inyuma y’Abadani, na bo barahindukiraga bakabaza Mika, bati «Ni iki cyatumye ukoranya aba bantu?»

²⁴Akabasubiza ati «Mwanyaze umuherezabitambo n’imana nari narikoreshereje, maze murigendera. Icyo nasigaranye se ni iki? None mutinyutse kumbaza ngo ’Mbaye iki?’»

²⁵Abadani baramubwira bati «Ntitwongere kukumva! Cyangwa se abanyamujinya muri twe baguhitane, maze upfe n’abo mu rugo rwawe bose.»

²⁶Abadani bikomereza inzira yabo, naho Mika abonye ko bamurusha imbaraga, arahindukira yisubirira iwe.

²⁷Abadani rero bamaze kunyaga ibyo kwa Mika n’umuherezabitambo we, bagera i Layishi muri ba baturage b’aho bari batuje kandi bizeranaga, maze babatsembesha inkota; naho umugi barawutwika.

²⁸Ntihaboneka umuntu ushobora kuwurengera, kuko wari kure ya Sidoni kandi ntugire n’uwutegeka. Uwo mugi uri mu kibaya gihereranye na Betirehobu. Nuko bahiyubakira undi mugi, barahatura.

²⁹Uwo mugi bawitirira Dani, izina rya sekuruza wabo, wabyawe na Israheli, ariko mbere uwo mugi witwaga Layishi.

³⁰Nuko Abadani bashinga rya shusho ry’ikigirwamana; Yehonatani mwene Gerishomu, umwuzukuru wa Musa, aba umuherezabitambo w’umuryango wa Dani. Abahungu ba Yehonatani bakomeza uwo murimo kugeza igihe abaturage b’igihugu bajyanywe bunyago.

³¹Nuko bahashinga iryo shusho ry’ikigirwamana Mika yari yarakoresheje, kirahaba kugeza igihe cyose Ingoro y’Imana yamaze i Silo.