Read kinyarwanda Abacamanza 5 Bible Online

Abacamanza 5 - kinyarwanda bible

Abacamanza 5

¹[20] Uwo munsi Debora na Baraki mwene Ahinowamu, baririmba bavuga bati

²«Ubwo muri Israheli biteguye intambara, ubwo imbaga ubwayo yayitabiriye, nimushimire Uhoraho.

³Bami nimwumve, namwe batware, nimutege amatwi! Ngiye kuririmbira Uhoraho, ngiye kurata Uhoraho, Imana ya Israheli.

⁴Uhoraho, ubwo wavuye mu gihugu cya Seyiri, ugasohoka mu mayaga ya Edomu, isi yahinze umushyitsi, ijuru rirareta, ibicu birekura ibitonyanga,

⁵imisozi itengagurikira imbere y’Uhoraho, imbere y’Uhoraho, Imana ya Israheli.

⁶Mu gihe cya Shamugari[21], mwene Anati, no mu gihe cya Yayeli, abantu bari bararetse kugenda urushorerane, n’abagendaga banyuraga mu mayira aziguye.

⁷Nta batware bari bakiriho, abatware bari ingume muri Israheli, kugeza ubwo wowe, Debora, ukangutse, ukangutse, mubyeyi muri Israheli.

⁸Bihitiragamo izindi mana; mu migi itanu nta wari kuhabona ingabo n’imwe, habe n’icumu na rimwe mu Bayisrahel ibihumbi mirongo ine.

⁹Umutima wanjye uri kumwe n’abatware ba Israheli, n’abo mu mbaga bitanze ku bwende bwabo. Nimushimire Uhoraho!

¹⁰Mwebwe abicaye ku ndogobe z’imyeru, mwe abicaye ku mikeka, namwe abari ku rugendo, nimuririmbe!

¹¹Ku mabuga aho bagabanira amazi, aho ni ho bazaratira ugutsinda k’Uhoraho, ugutsinda Israheli ikesha imbaraga ze. Nuko umuryango w’Uhoraho umanuka, ukajya ku marembo y’umugi.

¹²Kanguka, kanguka, Debora we! Kanguka, kanguka, maze utere indirimbo! Haguruka nawe, Baraki mwene Ahinowamu, maze uganze abari bakwigaruriye!

¹³Nuko abarokotse baramanukana bishyira abanyacyubahiro, umuryango w’Uhoraho ukoranira iruhande rwe nk’intwari.

¹⁴Abakomeye b’i Efurayimu[22] bari mu kabande bakurikirwa na Benyamini bivanga mu ngabo zabo. Umuryango wa Makiri watanze abatware, naho inzu ya Zabuloni itanga abagaba b’ingabo.

¹⁵Abatware mu ba Isakari bari kumwe na Debora, na Baraki yirukanka abasanga mu kibaya. Naho abo mu nzu ya Rubeni[23] bari mu mpaka z’urudaca.

¹⁶Ni iki cyakwicaje hagati y’ibiraro, uteze amatwi imyirongi abashumba bavugiriza amashyo yabo? Ni byo koko, mu nzu ya Rubeni ni ho habereye impaka z’urudaca!

¹⁷Muri Gilihadi bituriye hakurya ya Yorudani, naho abo kwa Dani, ni iki cyatumye mwigumira mu mato? Abo kwa Asheri bigumiye ku nkombe z’inyanja, maze batura bugufi y’ibyambu byabo.

¹⁸Abo kwa Zabuloni bahaze amagara yabo bahinyura urupfu, kimwe n’abo kwa Nefutali, ntibatinya aho rukomeye.

¹⁹Haduka abami bararwana, nuko abami ba Kanahani barwanira i Tanaki ku isoko y’i Megido; ariko nta munyago, nta na feza bahakuye.

²⁰Hejuru mu kirere, inyenyeri[24] na zo zitabira intambara, ku bw’ingendo yazo zirwanya Sisera.

²¹Umugezi wa Kishoni warabahururanye, Kishoni, umugezi wa kera cyane! None, bugingo bwanjye, genda gitwari usatira urugamba.

²²Nuko amafarasi ahita yanduruka, atabagura ibitaka n’ibinono byayo.

²³Nimuvume Merozi[25], ni ko Umumalayika w’Uhoraho avuze. Nimuvume abaturage bayo, kuko batavunnye Uhoraho, batatabaye Uhoraho hamwe n’intwari!

²⁴Yayeli, muka Heberi w’Umukeniti, nahabwe umugisha mu bagore; mu bagore bose batuye mu mahema nahabwe umugisha!

²⁵Sisera yamusabye amazi, we amuha amata; amuhereza ikivuguto mu nkongoro ya gipfura.

²⁶Arambura ukuboko afata urubambo, ukw’indyo gusingira inyundo y’abakozi; ayikubita Sisera amumena umutwe; aramujanjagura, maze amuhinguranya imisaya.

²⁷Arikuba yitura hasi arambaraye; imbere ye ni ho yaguye. Aho yaguye yikubye, ni ho yapfiriye.

²⁸Nyina wa Sisera ahanze amaso mu idirishya[26], ahanze amaso mu idirishya aganya agira ati ’Kuki igare rye ritinze kugera hano? Kuki amagare ye agenda buhoro, ategereje iki?’

²⁹Umunyabwenge muri bagenzi be aramusubiza ati

³⁰’Aho ntibabonye iminyago bakaba bayigabana: umukobwa umwe cyangwa babiri kuri buri muntu, umunyago w’imyenda y’amabara kuri Sisera, umutako umwe cyangwa ibiri iboshye yo kwambika ijosi rye!’

³¹Abanzi bawe bose, Uhoraho, baragapfa urwa Sisera, naho incuti zawe zimere nk’izuba rirasanye ingufu.» Nuko igihugu kimara imyaka mirongo ine mu mutuzo.