Read kinyarwanda Abacamanza 9 Bible Online

Abacamanza 9 - kinyarwanda bible

Abacamanza 9

¹Abimeleki[40], mwene Yerubehali, ajya i Sikemu kureba bene nyina kugira ngo avugane na bo, ndetse n’umuryango wose w’inzu ya se n’iya nyina, maze arababwira ati

²«Mubwire mutya abantu b’i Sikemu: icyababera cyiza ni ikihe? Gutegekwa n’abantu mirongo irindwi — abahungu bose ba Yerubehali — cyangwa se gutegekwa n’umuntu umwe gusa? Mwibuke neza ko ndi uwo mu magufwa yanyu n’umubiri wanyu.»

³Nuko bene nyina basubirira abantu b’i Sikemu bose muri ayo magambo ya Abimeleki, maze umutima wabo werekera kuri Abimeleki, kuko bibwiraga bati «Ni umuvandimwe wacu.»

⁴Baherako bamuha amasikeli mirongo irindwi y’umuringa bakuye mu ngoro ya Behali‐Beriti, ari na yo Abimeleki yaguzemo abantu b’imburamukoro n’ibyihebe, bamuherekezaga.

⁵Nuko asubira mu nzu ya se i Ofura maze yica abavandimwe be, bene Yerubehali; abicira icyarimwe ari mirongo irindwi. Harokotse Yotamu, mwene Yerubehali w’umuhererezi wenyine, kuko yari yihishe.

⁶Abanyacyubahiro b’i Sikemu n’ab’i Betimilo[41] bose barakorana, bajya i Sikemu mu nsi y’igiti cy’umushishi, iruhande rw’ibuye rishinze bukingi ryari rihari, maze bimika Abimeleki aba umwami.

⁷Nuko bamenyesha Yotamu ibyabaye, aherako ajya mu mpinga y’umusozi wa Garizimu; arangurura ijwi maze arababwira ati «Nimunyumve, bantu b’i Sikemu, namwe kandi Imana ibumve!

⁸Umunsi umwe, ibiti[42] byafashe inzira bijya kwimika uzabibera umwami. Bibwira igiti cy’umuzeti, biti ’Tubere umwami!’

⁹Umuzeti urasubiza uti ’Ndeke gutanga amavuta yanjye ahesha icyubahiro imana n’abantu, ngo ngiye kwinaniza ntegeka ibindi biti?’

¹⁰Ibiti bibwira umutini, biti ’Ngwino utubere umwami!’

¹¹Umutini urasubiza uti ’Ndeke gutanga uburyohe bwanjye n’imbuto zanjye nziza, ngo ngiye kwinaniza ntegeka ibindi biti?’

¹²Noneho ibiti bibwira umuzabibu, biti ’Ngwino utubere umwami!’

¹³Umuzabibu urasubiza uti ’Ndeke gutanga divayi yanjye ishimisha imana n’abantu, ngo ngiye kwinaniza ntegeka ibindi biti?’

¹⁴Nuko ibiti byose bibwira igihuru cy’amahwa, biti ’Ngwino utubere umwami!’

¹⁵Ariko igihuru cy’amahwa kirabibwira kiti ’Niba koko munyimitse mubishaka kugira ngo mbabere umwami, nimuze mwugame mu gicucu cyanjye. Ariko niba bitabaye ibyo, umuriro uzasohoka mu gihuru cy’amahwa, maze utsembe amasederi yose ya Libani.’»

¹⁶Yotamu akomeza, agira ati «Mwebwe se, ubwo mwimikaga Abimeleki ho umwami, mwabikoranye umurava n’umutima utaryarya? Ese mwabikoze muzirikana Yerubehali n’inzu ye yose, mutibagiwe ineza mukesha ibyo yabakoreye?

¹⁷Koko rero data yarabarwaniriye, ahara amagara ye maze abarokora ikiganza cya Madiyani.

¹⁸None, dore uyu munsi mwahagurukiye inzu ya data; mwishe abahungu be, mwicira icyarimwe abantu mirongo irindwi, maze mwimika Abimeleki, umuhungu w’umugore w’inshoreke ngo abere umwami abanyacyubahiro b’i Sikemu, kuko ari umuvandimwe wanyu!

¹⁹Niba rero ibyo byose mwabikoranye umurava n’umutima utaryarya, mubigirira Yerubehali n’inzu ye yose, Abimeleki nabatere gusendera ibyishimo, namwe mubimusenderezemo!

²⁰Niba kandi bitabaye bityo, umuriro uzasohoka muri Abimeleki maze utsembeho abanyacyubahiro b’i Sikemu na Betimilo; umuriro usohoke kandi mu banyacyubahiro b’i Sikemu na Betimilo, maze utwike Abimeleki!»

²¹Nuko Yotamu arahunga ajya i Beyeri; arahatura kuko hari kure ya Abimeleki, umuvandimwe we.

²²Abimeleki ategeka[43] Israheli mu gihe cy’imyaka itatu,

²³hanyuma Imana itera umwuka mubi muri Abimeleki n’abatware b’i Sikemu, maze abatware b’i Sikemu bagomera Abimeleki.

²⁴Ibyo byabereye kugira ngo Abimeleki ahanirwe ubugome bwe, kuko yishe, akamena amaraso y’abahungu mirongo irindwi ba Yerubehali, abavandimwe be; no kugira ngo abatware b’i Sikemu bahanirwe ko bamwoheje kwica abavandimwe be.

²⁵Abatware b’i Sikemu bashaka gukoshesha Abimeleki, ni ko kugaba udutsiko tw’abantu mu mpinga z’imisozi, bacuza buri wese wahanyuraga; nuko Abimeleki aza kubimenya.

²⁶Ubwo rero Gahali[44] mwene Ebedi agera i Sikemu ari kumwe n’abavandimwe be, maze abatware b’i Sikemu baramwizera.

²⁷Baherako barasohoka, bajya mu mizabibu yabo basarura imbuto maze benga amayoga, hanyuma bategura iminsi mikuru. Bajya mu ngoro y’imana yabo, bararya kandi baranywa, maze bavuma Abimeleki.

²⁸Gahali arababaza ati «Mbese Abimeleki yaba ari muntu ki kuri Sikemu, kugira ngo adutegeke? Ahubwo mwene Yerubehali na Zebuli[45] icyegera cye, si bo bakwiye gutegekwa n’abantu ba Hamori, umukuru wa Sikemu? Ni kuki se ari twe twamugaragira?

²⁹Uwampa gutegeka iki gihugu ngo urebe ukuntu nakwikiza Abimeleki! Namubwira nti ’Ongera ingabo zawe maze uze turwane.’»

³⁰Zebuli, umutegeka w’umugi, yumva ayo magambo ya Gahali mwene Ebedi, nuko ararakara.

³¹Yohereza rwihishwa[46] intumwa kuri Abimeleki kumubwira ziti «Dore Gahali mwene Ebedi n’abavandimwe be bari i Sikemu, bariho baroshya umugi kukugomera.

³²None rero, haguruka iri joro n’abantu muri kumwe, maze mwihishe mu gasozi.

³³Hanyuma nibucya, izuba rikimara kurasa, uzaze maze utere umugi. Igihe Gahali n’abantu bari kumwe na we bazasohoka baje kukurwanya, uzabagenera ikibakwiye.»

³⁴Nuko Abimeleki n’abari kumwe na we bose babyuka mu gicuku, bicamo amatsinda ane maze bihisha bugufi ya Sikemu.

³⁵Gahali mwene Ebedi, arasohoka ahagarara ku irembo ry’umugi. Ako kanya Abimeleki n’ingabo ze bahita bava mu bwihisho.

³⁶Gahali abonye icyo gico cy’abantu, abwira Zebuli ati «Dore igico cy’abantu bamanuka mu mpinga z’imisozi.» Ariko Zebuli aramusubiza ati «Biriya ni ibicucu by’imisozi wita abantu.»

³⁷Gahali arongera ati «Dore abantu bamanuka mu ibanga ry’umusozi, n’abandi baje baturuka ku giti cy’umushishi w’Abapfumu.»

³⁸Zebuli aramusubiza ati «Ka karimi kawe se kagannye he? Si wowe wahoze uvuga ngo ’Mbese Abimeleki yaba ari muntu ki kuri Sikemu, kugira ngo adutegeke? ’Sohoka noneho maze umurwanye.»

³⁹Gahali asohoka arangaje imbere y’abantu b’i Sikemu, arwana na Abimeleki.

⁴⁰Gahali arahunga, Abimeleki aramukurikirana, maze hagwa abantu benshi kugera ku irembo ry’umugi.

⁴¹Hanyuma Abimeleki atura Aruma, naho Zebuli yirukana Gahali n’abavandimwe be, kugira ngo bataguma i Sikemu.

⁴²Bukeye, abatuye mu mugi basohoka bajya mu misozi, maze babimenyesha Abimeleki.

⁴³Nuko Abimeleki afata ingabo ze, azicamo amatsinda atatu, bajya kwihisha ku gasozi. Ngo arabukwe abaturage basohotse mu mugi, abagwa gitumo arabica.

⁴⁴Ubwo Abimeleki n’itsinda ryari kumwe na we baraza bigarurira amarembo y’umugi, naho amatsinda abiri asigaye atera abari mu gasozi, maze barabica bose.

⁴⁵Abimeleki arwana umunsi wose n’abantu b’uwo mugi, hanyuma arawigarurira, yica abaturage bawo bose; umugi awunyanyagizaho umunyu[47].

⁴⁶Abatware b’i Migidali‐Sikemu babyumvise bateranira mu buvumo bwari mu nsi y’ingoro ya Eli‐Beriti.

⁴⁷Abimeleki aza kumenya ko abatware b’i Migidali‐Sikemu bahakoraniye.

⁴⁸Nuko Abimeleki n’ingabo ze barazamuka bajya ku musozi wa Salimoni. Abimeleki ni ko gufata ishoka, ayitemesha ishami ry’igiti, arariterura arishyira ku rutugu rwe, maze abwira ingabo ze, ati «Ibyo mubonye nkoze, namwe nimwihutire kubikora.»

⁴⁹Buri muntu mu bo bari kumwe, na we atema ishami, nuko bakurikira Abimeleki. Hanyuma ya mashami bayarunda kuri bwa buvumo, barayakongeza maze ubuvumo burakongoka n’abari baburimo bose. Abaturage b’i Migidali‐Sikemu na bo baricwa, bapfa ari abagabo n’abagore bagera ku gihumbi.

⁵⁰Nuko Abimeleki arahaguruka yerekeza i Tebesi[48]; arayigota kandi arayigarurira.

⁵¹Muri uwo mugi hakaba umunara uzitiye, aho abantu bose, abagabo n’abagore ndetse n’abakuru b’umugi bari bahungiye. Bamaze gufunga inzugi, barazamuka bajya ahitaruye ku gisenge cy’umunara.

⁵²Abimeleki aza gutera umunara, arawusatira kugera ku rugi, kugira ngo awutwike.

⁵³Nuko umugore amutera ingasire mu mutwe, maze amumena agahanga.

⁵⁴Ako kanya Abimeleki ahamagara umutwaje intwaro, aramubwira ati «Kura inkota yawe maze unsonge, hato bataza kunnyega bavuga ngo ’Yishwe n’umugore!’» Nuko umutwaje inkota aramusogota, arapfa.

⁵⁵Abayisraheli babonye ko Abimeleki apfuye, baragenda buri muntu asubira iwe.

⁵⁶Nguko uko Imana yahannye Abimeleki, kubera ibibi byose yakoreye se, yica abavandimwe be mirongo irindwi.

⁵⁷N’abantu b’i Sikemu, Imana yarabahannye kubera ubugome bwabo. Nuko imivumo Yotamu mwene Yerubehali yabavumye, irangira ityo.