Read kinyarwanda Ibyahishuwe 12 Bible Online

Ibyahishuwe 12 - kinyarwanda bible

Ibyahishuwe 12

¹Ikimenyetso gikomeye kigaragara mu ijuru: yari umugore[48] wisesuye izuba, ukwezi kuri mu nsi y’ibirenge bye, naho ku mutwe atamirije ikamba ry’inyenyeri cumi n’ebyiri.

²Yari atwite, kandi ariho atakishwa n’ibise n’imibabaro y’iramukwa.

³Nuko ikindi kimenyetso kigaragara mu ijuru: cyari Ikiyoka nyamunini[49] kandi gitukura nk’umuriro, kikagira imitwe irindwi n’amahembe cumi, n’amakamba arindwi kuri iyo mitwe uko ari irindwi.

⁴Umurizo wacyo usakuma igice cya gatatu cy’inyenyeri uzihananturira ku isi. Icyo Kiyoka rero gihagarara imbere y’uwo Mugore wari wegereje kubyara, kugira ngo giconcomere umwana ukivuka.

⁵Nuko abyara umwana w’umuhungu: ugomba kugenga amahanga yose n’inkoni y’icyuma. Maze uwo mwana we ajyanwa ku Mana[50] no ku ntebe yayo y’ubwami.

⁶Hanyuma Umugore ahungira mu butayu[51], aho Imana yamuteguriye umwanya, kugira ngo abe yo agaburirwa mu minsi igihumbi na magana abiri na mirongo itandatu.

⁷Nuko mu ijuru intambara irarota: Mikayeli[52] n’abamalayika be barwana na cya Kiyoka; na cyo kirabarwanya hamwe n’abamalayika bacyo,

⁸ariko ntibabasha gutsinda, kandi ntibongera ukundi kugira umwanya wabo mu ijuru.

⁹Cya kiyoka nyamunini kirahananturwa: ya Nzoka ya kera na kare, ari yo bita «Sekibi na Sekinyoma», wa wundi uyobya isi yose. Nuko gihananturirwa ku isi hamwe n’Abamalayika bacyo.

¹⁰Hanyuma numva ijwi riranguruye rituruka mu ijuru riti «Ngiki igihe cy’ubucunguzi kirageze, igihe cy’ububasha n’ubwami by’Imana yacu, n’ubutegetsi bwa Kristu wayo: kuko Kareganyi, wahoraga arega abavandimwe bacu ku Mana yacu amanywa n’ijoro, ahanantuwe.

¹¹Nyamara bo bamutsindishije amaraso ya Ntama n’ijambo babereye abahamya. Bemeye guhara amagara yabo, kugeza ku rupfu.

¹²Kubera iyo mpamvu, ijuru niryishime, namwe abarituye munezerwe! Naho mwebwe, isi n’inyanja mwiyimbire, kuko Sekibi yamanutse abasanga n’uburakari bwinshi, kandi akaba azi ko ashigaje igihe gito[53].»

¹³Ikiyoka rero kibonye ko gihananturiwe ku isi, kiruka gikurikiranye wa Mugore wari wabyaye umwana w’umuhungu.

¹⁴Ariko wa Mugore ahabwa amababa abiri nk’aya kagoma nini cyane, kugira ngo aguruke ajya mu butayu kure ya ya Nzoka, ahantu yari yateguriwe ngo ahamare igihe, n’ibihe, n’inusu y’igihe, agaburirwa.

¹⁵Nuko ya Nzoka ivundereza ibintu bimeze nk’uruzi rw’amazi[54] inyuma ya wa Mugore, kugira ngo atwarwe n’imivu y’ibyo bizi,

¹⁶nyamara isi iramutabara; ubutaka burabumbuka maze bumira rwa ruzi ruvunderejwe na cya Kiyoka.

¹⁷Kubera uburakari cyari gifitiye uwo Mugore, icyo Kiyoka kijya kurwanya abasigaye mu bamukomokaho, abubahiriza amategeko y’Imana kandi bagakomera ku buhamya bwa Yezu.

¹⁸Hanyuma kibunda mu musenyi wo ku nyanja.