Read kinyarwanda Ibyahishuwe 13 Bible Online

Ibyahishuwe 13 - kinyarwanda bible

Ibyahishuwe 13

¹Nuko mbona Igikoko kizamuka mu nyanja[55], gifite amahembe cumi n’imitwe irindwi[56], kikagira kuri ya mahembe amakamba cumi, naho ku mitwe yacyo hariho izina rituka Imana[57].

²Igikoko nabonaga cyasaga n’ingwe, amaguru yacyo ameze nk’ay’ikirura, n’urwasaya rwacyo ari nk’urw’intare. Nuko cya Gikoko gihabwa ububasha bwacyo, intebe yacyo n’ubutegetsi burambuye na cya Kiyoka.

³Umwe muri ya mitwe yacyo wasaga n’uwakomeretse[58] bwo gupfa, ariko uruguma rwacyo ruhita rukira. Nuko isi yose iratangara, ihita iyoboka cya Gikoko.

⁴Ubwo batangira kuramya cya Kiyoka, kuko cyahaye cya Gikoko ububasha, kandi baramya n’icyo Gikoko bavuga bati «Ni nde wagereranywa n’iki Gikoko, cyangwa se ni nde washobora kukirwanya?»

⁵Nuko gihabwa umunwa wo kwirata no gutuka Imana, gihabwa n’ububasha bwo gukora icyo gishaka igihe cy’amezi mirongo ine n’abiri[59].

⁶Cyabumburiraga umunwa gutuka Imana, no gutuka izina ryayo, Ingoro yayo n’abatuye ijuru.

⁷Gihabwa kandi kurwanya abatagatifujwe no kubatsinda, gihabwa n’ububasha ku miryango yose, ibihugu byose, indimi zose n’amahanga yose.

⁸Nuko abatuye isi bose baragisenga, abo bose kuva isi yahangwa, bafite amazina atanditswe mu gitabo cy’ubugingo cya Ntama wishwe.

⁹Ufite amatwi, arumve!

¹⁰Uwagenewe kubohwa, azatabwa muri yombi byanze bikunze, n’uwagenewe kwicwa n’inkota, azicishwa inkota. Igihe rero kirageze cyo kugaragaza ubwiyumanganye n’ukwemera by’abatagatifujwe.

¹¹Nuko mbona nanone ikindi Gikoko kizamuka ku isi[60]. Cyari gifite amahembe abiri nk’intama, ariko kikavuga nk’Ikiyoka.

¹²Cyakoreshaga ububasha bwose bw’Igikoko cya mbere mu maso yacyo, kigategeka isi n’abayituye gusenga Igikoko cya mbere, cyari cyakize uruguma rwajyaga kugihitana.

¹³Icyo Gikoko cya kabiri gikora ibintu byinshi bitangaje, kugeza n’aho kimanurira ku isi umuriro wo ku ijuru, abantu bose babireba.

¹⁴Bityo kiyobya abatuye isi kubera ibyo bitangaza cyari cyahawe gukora mu maso y’Igikoko cya mbere; kibwira abatuye isi kwimika ishusho yubahiriza cya Gikoko cyari cyakomerekejwe n’inkota, none kikaba ari gitaraga.

¹⁵Nuko gihabwa ububasha bwo guha ubuzima iyo shusho y’Igikoko cya mbere, ku buryo iyo shusho ibasha ubwayo kuvuga, maze igategeka kwica umuntu wese wanze gusenga ishusho y’Igikoko.

¹⁶Nuko abantu bose, abato n’abakuru, abakire n’abakene, abacakara n’abigenga, gihabwa kubashyiraho ikimenyetso ku kiganza cy’iburyo cyangwa ku gahanga,

¹⁷kugira ngo hatagira umuntu n’umwe wemererwa kugura cyangwa kugurisha ikintu adafite ikimenyetso cy’izina ry’Igikoko cyangwa umubare uranga izina ryacyo.

¹⁸Ubu rero ni igihe cy’ubushishozi: umunyabwenge arasobanukirwe n’umubare uranga Igikoko, kuko uwo mubare uhwanye n’izina ry’umuntu. Uwo mubare ni magana atandatu na mirongo itandatu na gatandatu[61].