Read kinyarwanda Ibyahishuwe 18 Bible Online

Ibyahishuwe 18 - kinyarwanda bible

Ibyahishuwe 18

¹[77] Hanyuma mbona undi mumalayika umanutse mu ijuru afite ububasha bukomeye, maze isi imurikirwa n’ububengerane bw’ikuzo rye.

²Nuko atera hejuru mu ijwi riranguruye ati «Iraridutse! Iraridutse Babiloni, umurwa w’icyamamare: yahindutse intaho ya za Sekibi, indiri ya za roho mbi zose, n’iy’ibisiga byose byahumanye kandi by’ibivume.

³Kuko yuhiye amahanga yose divayi y’uburakari bukaze bw’ubuhabara bwayo, abami b’isi bakohoka mu buhabara hamwe na yo, kandi abacuruzi b’isi bagakungahazwa n’ubukire bwayo butagira ingano.»

⁴Nuko numva irindi jwi ryavugiraga mu ijuru, riti «Nimusohoke muri uwo murwa, muryango wanjye, hato mutaza kugira uruhare ku byaha byawo, bityo mugasangira na wo ibyorezo byawugenewe;

⁵kuko ibyaha byawo byirundanyije kugera ku ijuru, maze Imana ikibuka ibikorwa bibi byawo.

⁶Nimuwugenzereze uko wabagenjeje, ibyo wabakoreye mubikube kabiri. Inkongoro wabagereyemo divayi yawo, muyiwugereremo incuro ebyiri, divayi iruta iyo wabahaye!

⁷Uko wisheshekajeho ikuzo n’ubukire, abe ari ko muwuteza imibabaro n’icyunamo, kuko wibwiye mu mutima, uti ’Ndadamaraye nk’umwamikazi, nta bwo ndi umupfakazi kandi sinteze kuzabona icyunamo.’

⁸Kubera ibyo, ibyorezo byawugenewe bizawugwirira umunsi umwe : urupfu, icyunamo, n’inzara kandi uzasenywe n’umuriro, kuko Nyagasani Imana, ari Nyirububasha, akaba yawuciriye urubanza.»

⁹Nuko abami b’isi bohokanye na wo mu buhabara bwawo no mu bukire byawo, bazawuririre, baboroge, igihe bazaba babonye umwotsi w’umuriro uwutwika.

¹⁰Bazahagarara ahitaruye kubera gutinya iyo mibabaro yawo, maze bavuge bati «Mbega ibyago! Mbega ibyago ubonye, Murwa w’icyamamare, Babiloni murwa w’igihangange! Isaha imwe gusa irahagije kugira ngo urubanza rwawe rurangire.»

¹¹Abacuruzi b’isi na bo bazawuririra, bajye mu cyunamo, kuko nta we uzaba akigura ibicuruzwa byabo:

¹²ibicuruzwa bya zahabu n’ibya feza, amabuye y’agaciro n’amasaro, imyambaro y’ubwoya n’iy’imihemba, iya hariri n’iy’umutuku; amoko y’ibiti bihumura, ibyakozwe mu mahembe y’inzovu, mu biti by’imbonekarimwe, mu muringa cyangwa mu butare, mu mabuye y’agaciro;

¹³ibiti n’ibyatsi bihumura, imibavu n’ububane, divayi n’amavuta, ifu n’ingano, ibimasa n’intama, amafarasi n’amagare, abacakara n’imbohe.

¹⁴Imbuto umutima wawe wakundaga zarakwitaruye, ikiryohera icyo ari cyo cyose n’igishimisha ijisho bigushizeho, kandi ntuzongera kubibona ukundi.

¹⁵Abacuruzi bari bakungahajwe n’ubwo bucuruzi, bazahagarara ahitaruye kubera gutinya iyo mibabaro. Bazarira baboroge,

¹⁶maze bavuge bati «Mbega ibyago! Mbega ibyago ubonye, Murwa w’icyamamare wari wambaye imyambaro y’ubwoya, imihemba n’itukura, ukarabagirana kubera imitako ya zahabu, amabuye y’agaciro n’amasaro.

¹⁷None ubwo bukungu bwawe bukaba bwazimiye mu isaha imwe!» Nuko abasare bose, n’abagendera mu mato hafi aho bose, n’ababeshwaho n’inyanja bose, bakaba bahagaze ahitaruye,

¹⁸babonye umwotsi w’inkongi yawo barasakabaka bati «Ni uwuhe murwa wari uhwanye n’uyu murwa w’icyamamare!»

¹⁹Nuko bisiga umukungugu mu mutwe, batera hejuru barira kandi baganya bati «Mbega ibyago! Mbega ibyago ubonye, Murwa w’icyamamare! Ubukire bwawe bwari bwarakungahaje abafite amato mu nyanja bose; ariko none dore warimbutse mu isaha imwe gusa!»

²⁰Ishime juru, unezezwe n’uko uyu murwa uridutse. Mwishime namwe abatagatifujwe, intumwa n’abahanuzi, kuko Imana igihe iwuciriye urubanza, yagaragaje ityo ubutungane bwanyu.

²¹Nuko wa mumalayika w’igihangange afata ibuye rimeze nk’urusyo ruremereye, maze arihananturira mu nyanja avuga ati «Babiloni, umurwa w’icyamamare, na yo izahananturwa ityo, kandi ntibazongera kuyibona ukundi.

²²Ntibazongera ukundi kumva iwawe amajwi y’abacuranzi b’inanga n’abaririmbyi, abavuza imyirongi n’uturumbeti; nta muhanga mu bukorikori ubwo ari bwo bwose uzarangwa iwawe, n’ijwi ry’urusyo ntirizumvikana iwawe ukundi.

²³Urumuri rw’itara ntiruzabonesha iwawe ukundi, ntibazongera kumva iwawe ijwi ry’umukwe n’umugeni, kuko abacuruzi bawe bari ibikomerezwa by’isi, ubupfumu bwawe bukaba bwarayobeje amahanga yose,

²⁴kandi bakaba barasanze iwawe amaraso y’abahanuzi, ay’abatagatifujwe, n’ay’abandi bose bishwe ku isi.»