Read kinyarwanda Ibyahishuwe 2 Bible Online

Ibyahishuwe 2 - kinyarwanda bible

Ibyahishuwe 2

¹Andikira umumalayika wa Kiliziya ya Efezi, uti «Ufashe inyenyeri ndwi mu kiganza cy’iburyo, akagenda rwagati mu matara arindwi ya zahabu, aravuga ati

²’Ibikorwa byawe, umuruho wawe n’ubwiyumanganye bwawe ndabizi, kimwe n’uko utashobora kwihanganira abagome. Wagerageje abiyitaga intumwa kandi atari zo, maze usanga ari ababeshyi.

³Ufite ubwiyumanganye koko: warababaye ku mpamvu y’izina ryanjye, kandi ntiwacika intege.

⁴Nyamara mfite icyo nkugayaho: ni uko utakinkunda nka mbere.

⁵Ibuka rero aho wahanantutse ukagwa. Gira wisubireho kandi ukore ibikorwa nk’ibya mbere. Naho ubundi, ngiye kuza, maze niba utisubiyeho nzakure itara ryawe mu mwanya waryo.

⁶Nyamara hari icyo ngushima: ni uko wanga ibikorwa by’Abanikolayi[16], nk’uko nanjye ubwanjye mbyanga.’

⁷Ufite amatwi arumve icyo Roho abwira za Kiliziya. Uzatsinda, nzamuha kurya ku giti cy’ubugingo, kiri mu busitani bw’Imana.»

⁸Andikira umumalayika wa Kiliziya y’i Simirina, uti «Uwibanze n’Uwimperuka, wa wundi wapfuye, none akaba ari muzima, aravuga ati

⁹’Nzi neza amagorwa yawe n’ubukene bwawe — nyamara uri umukungu —, kandi nzi ko uvugwa nabi n’abiyita Abayahudi; nta bwo ari bo rero, ahubwo ni ikoraniro rya Nyakibi.

¹⁰Ntutinye ibigiye kukubabaza. Dore Sekibi agiye kujugunya mu buroko bamwe muri mwe kugira ngo abagerageze, maze muzagire amagorwa y’iminsi cumi[17]. Urabe indahemuka kugeza ku rupfu, maze nzakwambike ikamba ry’ubugingo.’

¹¹Ufite amatwi arumve icyo Roho abwira za Kiliziya. Uzatsinda, nta bwo azigera ababazwa n’urupfu rwa kabiri.»

¹²Andikira umumalayika wa Kiliziya y’i Perigamo, uti «Wa wundi ufite inkota ityaje amugi yombi, aravuga ati

¹³’Nzi neza aho utuye: ni ho hari intebe ya Sekibi[18]. Ariko kandi, wakomeje kwizirika ku izina ryanjye, ntiwanyihakana, kabone no mu gihe cya Antipasi, umugaragu wanjye udahemuka wiciwe iwanyu, aho Sekibi atuye.

¹⁴Nyamara mfite icyo nkugayaho: ni uko iwawe hari bamwe bakihambira ku nyigisho za Balamu, wa wundi wagiraga inama Balaki ngo ashuke Abayisraheli, ngo barye inyama zatuwe ibigirwamana, kandi ngo bohoke mu buhabara[19].

¹⁵Iwawe na none, hari abakihambira ku nyigisho z’Abanikolayi.

¹⁶Gira wisubireho rero, bitabaye ibyo ngiye kuza bidatinze, maze mbarwanye n’inkota y’akanwa kanjye.’

¹⁷Ufite amatwi arumve icyo Roho abwira za Kiliziya. Uzatsinda, nzamuha manu yahishwe[20], muhe akabuye kererana, kandi kuri ako kabuye hazaba handitseho izina rishya[21] ritagira undi urizi, uretse urihawe.»

¹⁸Andikira umumalayika wa Kiliziya y’i Tiyatira uti «Umwana w’Imana, wa Wundi ufite amaso arabya nk’umuriro ugurumana, n’ibirenge bisa n’umuringa w’agaciro gakomeye, aravuga ati

¹⁹’Nzi neza ibikorwa byawe, urukundo rwawe, ukwemera kwawe, ukwitangira abandi kwawe n’ubwiyumanganye bwawe. Ibikorwa byawe biheruka, bishumbije ibya mbere ubwinshi.

²⁰Nyamara mfite icyo nkugayaho: ni uko worohera Yezabeli, uwo mugore wiyita umuhanuzikazi, maze akayobya abagaragu banjye, abigisha kohoka mu buhabara no kurya inyama zatuwe ibigirwamana.

²¹Namuhaye igihe kugira ngo yisubireho, ariko ntashaka kwisubiraho ngo areke ubuhabara bwe.

²²None dore ngiye kumujugunya ku buriri bw’amagorwa akaze, we na bagenzi be bafatanije ubuhabara, keretse niba bisubiyeho bakareka ibyo bikorwa byabo.

²³Abana be nzabagabiza urupfu, maze Kiliziya zose zimenye ko ari jyewe usesengura imitima n’impyiko, kandi ko nzitura buri wese nkurikije ibikorwa bye.

²⁴Ariko kandi mbibabwire, mwebwe ab’i Tiyatira, mutigeze muyoboka iryo dini, ntimunamenye ibyo bita ’amabanga ya Sekibi’, sinzabagerekaho undi mutwaro.

²⁵Gusa rero, ibyo mutunze mubikomereho, kugeza igihe nzazira.

²⁶Uzatsinda, akazaba yarakomeje kugenza uko nshaka kugeza ku ndunduro, nzamuha ububasha ku mahanga,

²⁷ayategekeshe inkoni y’icyuma, ayajanjagure nk’umena ibibindi by’ibumba,

²⁸mbese nk’uko nanjye ubwo bubasha nabuhawe na Data; kandi nzamuha n’inyenyeri yo mu rukerera[22].’

²⁹Ufite amatwi arumve icyo Roho abwira za Kiliziya.»