Read kinyarwanda Icya mbere cya Samweli 22 Bible Online

Icya mbere cya Samweli 22 - kinyarwanda bible

Icya mbere cya Samweli 22

¹Dawudi ava aho ngaho, ahungira mu buvumo[58] bw’i Adulamu. Abavandimwe be na bene wabo barabimenya, baramanuka bamusangayo.

²Nuko iruhande rwe hateranira abanyabyago, abanyamyenda n’abarenganywa, bose ababera umutware. Abari kumwe na we bari bageze kuri magana ane.

³Dawudi yongera kuva aho ngaho ajya i Misipa y’i Mowabu, abwira umwami w’i Mowabu, ati «Ndakwinginze ngo wemerere data na mama baze mubane, kugeza igihe nzamenyera icyo Imana izangenera.»

⁴Nuko se na nyina abazanira umwami w’i Mowabu babana na we, bamarana igihe cyose Dawudi yari akiri mu buhungiro bwe.

⁵Umuhanuzi Gadi aza kubwira Dawudi, ati «Wiguma mu buhungiro bwawe, ahubwo genda, ujye mu gihugu cya Yuda.» Nuko Dawudi arahava, ajya mu ishyamba ry’i Hereti.

⁶Nyuma y’aho Sawuli aza kumenya ko Dawudi n’abo bari kumwe babonetse. Ubwo Sawuli akaba yari i Gibeya, yicaye mu nsi y’umunyinya wari mu mpinga, afite icumu rye mu ntoki n’abagaragu be bamukikije.

⁷Sawuli abwira abagaragu be bamushagaye, ati «Munyumve neza, Babenyamini mwe! Harya ngo namwe mwese, mwene Yese, azabaha imirima n’imizabibu, azabagire abatware b’ingabo ijana n’ab’ibihumbi,

⁸kugira ngo mwese muhuze umugambi wo kungambanira? Igihe umuhungu wanjye anywanye na mwene Yese, nta n’umwe muri mwe wigeze amburira, ibyo bikagaragaza ko mutakinyitayeho. Ubona ngo habure n’umwe umbwira, igihe umuhungu wanjye anteje umugaragu wanjye, kugira ngo antege imitego nk’uko ubu bimeze!»

⁹Ubwo Dowegi w’Umunyedomu yari ahagaze hamwe n’abagaragu ba Sawuli, asubiza umwami, ati «Mperutse kubona mwene Yese; yari i Nobu kwa Ahimeleki mwene Ahitobi.

¹⁰Nuko Ahimeleki asiganuza Uhoraho ibimwerekeyeho, amuha n’ibyo kurya. Yamuhaye kandi n’inkota ya Goliyati, Umufilisiti.»

¹¹Umwami abyumvise, ahamagaza Ahimeleki umuherezabitambo, mwene Ahitobi n’umuryango we wose, hamwe n’abaherezabitambo bose b’i Nobu; maze baramwitaba.

¹²Bageze ibwami, Sawuli aravuga ati «Ntega amatwi, mwana wa Ahitobi!» Na we arasubiza ati «Karame Nyagasani.»

¹³Sawuli aramubaza ati «Ni iki cyatumye muhuza umugambi wo kungambanira, wowe na mwene Yese? Wamuhaye imigati n’inkota, wasiganuje Uhoraho kubera we, kugira ngo ampagurukire kandi antege imitego nk’uko bimeze uyu munsi.»

¹⁴Ahimeleki asubiza umwami, ati «Mbese mu bagaragu bawe bose, hari n’umwe ukwiye kwiringirwa nka Dawudi? Ni umukwe w’umwami, ni we ukurwanaho kandi yubahwa n’urugo rwawe rwose!

¹⁵Ese ugira ngo uwo munsi, ni bwo natangiye gusiganuza Uhoraho kubera we? Ibyo ntibikambeho! Nyabuneka, Mutegetsi wanjye, ibyo ntiwari ukwiye kubihora umugaragu wawe n’umuryango we wose, kuko ari nta cyo yari abiziho na gito.»

¹⁶Umwami aravuga ati «Ahimeleki, urapfa wowe n’umuryango wawe wose!»

¹⁷Umwami aherako abwira abarinzi be, ati «Nimuhindukire mwice abaherezabitambo b’Uhoraho, kuko na bo bashyigikiye Dawudi: bari bazi ko ari mu buhungiro, ntibamenyesha aho ari.» Ariko abagaragu be banga kwica abaherezabitambo b’Uhoraho.

¹⁸Nuko umwami abwira Dowegi, ati «Wowe hindukira, maze wice abo baherezabitambo.» Dowegi Umunyedomu arahindukira arabica. Uwo munsi hapfa abantu mirongo inani na batanu, bose bambaye umusanganyagihimba, uboshye muri hariri.

¹⁹Aho i Nobu, umugi w’abaherezabitambo, amarira ku nkota abagabo, abagore, abana bato n’abakiri ku ibere, ndetse n’inka, indogobe n’intama, byose bishirira ku nkota.

²⁰Nyamara umwe mu bahungu ba Ahimeleki mwene Ahitobi witwaga Abiyatari aratoroka, ni ko guhunga asanga Dawudi.

²¹Nuko amenyesha Dawudi ko Sawuli yishe abaherezabitambo b’Uhoraho.

²²Dawudi abwira Abiyatari[59], ati «Urya munsi nari nzi ko Dowegi Umunyedomu ahari, ntekereza ko atazabura kubibwira Sawuli. Ni jyewe watumye urugo rwa so rwose rurimbuka.

²³Gumana nanjye, witinya; kandi nihagira ushaka kugirira nabi ubugingo bwawe, ntazaba aretse n’ubwanjye. Humura rero, nubana nanjye nta cyo uteze kuba.»