Read kinyarwanda Icya mbere cya Samweli 8 Bible Online

Icya mbere cya Samweli 8 - kinyarwanda bible

Icya mbere cya Samweli 8

¹[20] Samweli ageze mu zabukuru, yegurira abahungu be ubucamanza kuri Israheli.

²Umuhungu we w’imfura yitwaga Yoweli, naho uw’ubuheta akitwa Abiya, nuko bagacira imanza i Berisheba.

³Ariko abahungu be ntibakurikize amatwara ye, ahubwo bashukwa n’inyungu, bakakira ruswa mu manza kandi bakarenga ku mategeko.

⁴Abakuru b’imiryango ya Israheli bose barakorana, maze basanga Samweli i Rama.

⁵Baramubwira bati «Dore urashaje kandi abahungu bawe ntibagukurikiza. None rero utwimikire umwami, ajye atuyobora nko mu yandi mahanga yose.»

⁶Ibyo bibabaza cyane Samweli, ubwo bavugaga bati «Twimikire umwami ajye atuyobora.» Nuko Samweli atakambira Uhoraho.

⁷Uhoraho abwira Samweli, ati «Tega amatwi abo bantu n’ibyo bakubwira byose. Si wowe banze, ahubwo ni jye. Ntibashaka ko mba umwami wabo.

⁸Barakugenzereza nk’uko bangenjeje kuva umunsi mbakuye mu Misiri kugeza uyu munsi, ubwo banyimuraga bakayoboka izindi mana.

⁹None rero, umva icyo bakubwira; ariko kandi unabasobanurire neza uburyo uwo mwami bashaka azabategeka.»

¹⁰Nuko imbaga yasabaga umwami, Samweli ayisubiriramo amagambo yose Uhoraho yavuze.

¹¹Arababwira ati «Dore uko umwami musaba azabategeka: azafata abahungu banyu, abagire abanyamagare ye n’abanyamafarasi ye, maze bazajye birukanka imbere y’igare rye.

¹²Azabagira abatware b’abantu igihumbi, n’ab’abantu mirongo itanu, abagire abahinzi b’imirima ye n’abasaruzi b’imyaka ye, bamucurire intwaro zo kurwanisha n’ibyuma byo gushyira ku mafarasi ye.

¹³Azafata abakobwa banyu ho abakozi b’imibavu, abanyagikoni n’abatetsi b’imigati.

¹⁴Azabatwara imirima yanyu, imizabibu n’imizeti yanyu y’inyamibwa, azabigabire abagaragu be.

¹⁵Azafata umugabane wa cumi w’imbuto zanyu n’uw’imizabibu yanyu, maze abigabire abanyarugo be n’abagaragu be.

¹⁶Azabanyaga abagaragu n’abaja banyu, n’inyamibwa zo mu basore banyu, n’indogobe zanyu, maze abikoreshe imirimo ye.

¹⁷Azafata umugabane wa cumi w’amatungo yanyu, namwe ubwanyu muzahinduke abacakara be.

¹⁸Nuko uwo munsi muzacure imiborogo mutewe n’uwo mwami mwihitiyemo, nyamara uwo munsi Uhoraho ntazabasubiza.»

¹⁹Ariko iyo mbaga yanga kumvira Samweli, baravuga bati «Icyo dushaka ni umwami,

²⁰kugira ngo natwe tuzamere nk’andi mahanga[21] yose. Umwami wacu azatuyobora, azatujye imbere, anaturengere mu ntambara turwana.»

²¹Samweli atega amatwi ayo magambo yose ya rubanda, maze ayageza kuri Uhoraho.

²²Nuko Uhoraho abwira Samweli, ati «Bemerere, ubimikire umwami.» Samweli ni ko kubwira Abayisraheli, ati «Nimugende, buri muntu asubire mu mugi we.»