Read kirikeni Chukusakị 1 Bible Online

Chukusakị 1 - kirikeni bible

Chukusakị 1

¹Sakị mị ḅụ, Tamụnọ Ḅe so mị na sẹkiri mị na tẹmẹ sịkị,

²sẹkiri mị ọrụtọnkẹ, gbọrịye sọnị pịkị anịa ḅie ofori-ẹ. Owoi abaji mị kanakana se anị gbẹịn gbitipumamẹ, se Tamụnọ Ḅe ọ̀ tẹmẹ[1] mị mengi mị ọgọnọ nwẹngịmaḅọrọmẹ.

³Anịsịkị Tamụnọ Ḅe kụrọ pịrịmẹ, “Ye enekuḅu ḅịa paka”—enekuḅu pịkị ḅịa pakamẹ.

⁴Tamụnọ Ḅe ori ọrị enekuḅu mị anị iḅimẹ. Se enekuḅu mị ḅụ kanakana mị pusikimamẹ,

⁵seni ọ̀ nwọse enekuḅu mị chịnmẹ “Enekaka” anịsịkị kanakana mị “Ḍin”. Anị ḅọrọso se saso na dede na simemẹ—anị tatarị ene mị-ẹ.

⁶Anịsịkị Tamụnọ Ḅe pịkị kụrọ pịrịmẹ “Ye mengi mị pua se mama kịrịkịrị pẹkẹrẹ ḅụ sime”—anị pịkị ọkọ sime mẹ. Anịḅụ Tamụnọ Ḅe ò kpomgbo mịẹmẹ, anị ọgọnọ sime mengi mị ḅụ chukuju sime mengi mị pusikimamẹ.

⁸Kpomgbo mị ọ̀ nwọse anị chịnmẹ “So.” Anị ḅọrọso se saso na dede na simemẹ—anị maịn karama ene mị-ẹ.

⁹Anịsịkị Tamụnọ Ḅe kụrọ pịrịmẹ “Ye so mị chuku ḅie sime mengi mị ḅo gboloma gbọrị anga sime, mịẹse kiri pakaḅịa ḅara”—anị pịkịna ọkọ sime mẹ.

¹⁰Ọ̀ nwọse paka nyọ mị chịnmẹ “Kiri” anịsịkị ḅo gboloma mengi mị ọ̀ nwọse anị chịnmẹ “Tọrụ.” Se Tamụnọ Ḅe ori ọrị kiri mị anị iḅimẹ.

¹¹Se ọ̀ kụrọ pịrịmẹ, “Ye kiri mị ịnyanya chụa, kịrịkịrị chịn na chịnmgbọlụ na pakụmaḅo”—anị pịkịna ọkọ sime mẹ.

¹²Anịẹrẹchị kiri mị ịnyanya chụa chịn ḅụ kịrịkịrị aye na kịrịkịrị fịaye chụa chịn na pakụmaḅomẹ, se Tamụnọ Ḅe ori ọrịye mị iḅimẹ.

¹³Anị ḅọrọso se saso na dede simemẹ—anị tẹrẹ karama ene mị-ẹ.

¹⁴Anịsịkị Tamụnọ Ḅe kụrọ pịrịmẹ, “Ye sotọrụ enekuḅu pakụmaḅịaye pakaḅo, anị enekaka mị ḅụ ḍin mị pusikima, anị seni enema na kụra ma na pịkị alalị sịkị ma sakịḅịa sịkị nemiḅịa ẹrẹchị-ẹ,

¹⁵àrị sotọrụ ḅịa se enekuḅu se kiri mị pịrịḅịa”—anị pịkịna ọkọ mịẹmẹ.

¹⁶Anịḅụ Tamụnọ Ḅe mama opu tọnjie nwọ mịẹmẹ, ịrụa mị ḅẹrẹtọn enekaka mị pịrị, anịsịkị akalụ mị ḅẹrẹtọn ḍin mị pịrịḅịa; ọ̀ pịkịna loliama sọnị mịẹmẹ.

¹⁷Tọnjiema ò seni sotọrụ koromamẹ, àrị ḅịa paka kiri ọgọnọ saraḅịa ẹrẹchị,

¹⁸àrị ḅẹrẹtọn enekaka mị na ḍin mị na pịrị, se pịkịna enekuḅu ḅụ kanakana mị pusikimamẹ. Se Tamụnọ Ḅe ori ọrịye mị anị iḅimẹ.

¹⁹Anị ḅọrọso se saso na dede na simemẹ anị inein-a ḍin karama ene mị-ẹ.

²⁰Anịsịkị Tamụnọ Ḅe kụrọ pịrịmẹ, “Ye kịrịkịrị pịkị ḍumo nyanaye mengi mị ḅie ḅein, pịkịna sotọrụ kịrịkịrị feni ḅein.”

²¹Anịḅụ Tamụnọ Ḅe tọrụ ḅie anga opu namama na, pịkịna mengi ḅie anga kịrịkịrị aye mamgba na, feni goyegoye na tẹmẹmẹ. Se Tamụnọ Ḅe ori ọrịye mị anị iḅimẹ.

²²Tamụnọ Ḅe àrị ḅẹlẹmamẹ, ọ̀ pịkị ḍuko mengi ḅie angaye mamgba pịrịmẹ na àrị yi tọrụ mị ḅie ḅeinma, ọ̀ pịkịna ḍuko fenima pịrịmẹ àrị kịẹnḅịpị ḅụ su sẹkiri ḅeinma.

²³Anị ḅọrọso se saso na dede na simemẹ—anị sọnọ-a ḍin karama ene mị-ẹ.

²⁴Anịsịkị Tamụnọ Ḅe kụrọ pịrịmẹ, “Ye kiri mị ḍumo nyana kịrịkịrị nama goyegoye pakụmaḅo: owoi-a nama na dein seni tomoni na angaḅịa nama na, pịkị ikiriarịyema na, opuaye na kalaye na”—anị pịkịna ọkọ sime mẹ.

²⁵Tamụnọ Ḅe arịmgba mịẹmẹ, ori ọrịye mị pịkị iḅimẹ.

²⁶Anị Tamụnọ Ḅe ḅo nwọḅẹye-ẹ, “Mịọkụ wa tomoni tẹmẹḅịa, ini wa simeọkụ sime seni mine kịkẹḅịa. Ini mengi ḅie inji na, sotọrụ fin àrị feni na, nama goyegoye na, owoi piriḅie angaye na, dein tomoni na angaye na, opuaye na kalaye na ḅụ kụrọ nyanaḅịa.”

²⁷Anịḅụ Tamụnọ Ḅe ò tomoni tẹmẹmẹ, ori ini mịẹmẹ ini ò simeọkụ simemẹ. Ori owuḅọ na eremeniḅọ na tẹmẹmẹ,

²⁸ori ini ḅẹlẹma se nwọḅẹmẹ, “Ọ́ ḅakama awọ yi, mịẹsosịkị ọ́mịna furo ḅie pakaḅoḅịa awọma bebe sẹkiri mị mgba anga kelema seni ḅẹrẹtọn anị pịrị. Àrị injima na, fenima na, namama na pịkịna owoi-a namama na se ọ́ pịrịmẹ ómine arịaḅụ kụrọkọnḅịa.

²⁹Ọ́ fịḅịa kịrịkịrị ḍọkọḍọkọ fịaye mgbọlụ na, chịnmgbọlụma na, pịkịna jịn-a fịaye na à nwọseni ọ́ pịrịsam,

³⁰owoi-a nama mamgba na feni mamgba na, sẹkiri ḅụ ikiriaye na, ịnyanya na à nwọseni fịye ḅaraḅụ àrị pịrịsam”—anị pịkịna ọkọ sime mẹ.

³¹Tamụnọ Ḅe ọ̀ mịẹsaye goyegoye ọ̀ nwọ pekele ḍikimẹ seni àrị pịkị iḅiọkụma iḅimẹ. Anị ḅọrọso se saso na dede na simemẹ—anị sonio-a ḍin karama ene mị-ẹ.