Read kirikeni Chukusakị 11 Bible Online

Chukusakị 11 - kirikeni bible

Chukusakị 11

¹Tatarị sịkị ḅụ, bebe tomonikiri ḅie simeapụ mamgba gbọrị ọkwẹịn ḅịpị nwọ kọnkọnmẹ, pịkịna gbọrị ọkwẹịn ḅẹlẹ nyana mẹ.

²Ịrụapakapaka nyọ daọrụ ḅụ ini nwẹngịma ḅọrọ arịogbo, Babilọn ḅie ḅụ iniḅo gbọrị ele ogbo nwọ lamẹ, se anịju ini simemẹ.

³Ini nwọse jụmḅọ jụmḅọ ḅẹmẹ, “Ó ḅo! Ye wa aḅaịn tẹmẹ se fọị-kụrọma.” Anịḅụ ini aḅaịn nyanaḅomẹ pịkịna se àrị oḅolo ma ḅịa ye na.

⁴Ini nwọḅẹmẹ, “Ó ye wa mịọkụ gbọrị opuama nama, se anịa sokopi warị mị mun so mị la, mịẹse wa ẹrẹ nyana mịnaḅụ pịrị se wa ḅarị wasama sẹkiri mị mgba kelema ẹka ọkụ.”

⁵Anị Nyanaḅọ Ḅe koroḅo se tomonima nama àrị opuama mị na sokopi warị mị na ḍikiye-ẹ,

⁶se ọ̀ nwọḅẹmẹ, “Mịnapụ mamgba gbọrịapụ-ẹ, gbọrị ọkwẹịn mị ini pịkịna kọn arịye-ẹ: ini mịẹḅịaye ma ḅụ, mị tatarịye-ẹ. Ḅọlọ ẹkẹ ini pịkị ini ḅi seni ini ineda mịẹḅịaye goyegoye mịẹḅịa!

⁷Ye wa koromun inia ọkwẹịn mị pikiri, mịẹsosịkị ini ḅarị ineda jụmḅọ jụmḅọ kaịnḅo ẹka ḅara.”

⁸Mị ḅụ Nyanaḅọ Ḅe ini galagalama bebe sẹkiri mị mgba kelemamẹ, se ini ḅarị opuama mị namakẹ.

⁹Opuama mị ini nwọse anị chịnmẹ Babilọn, anịatịḅị anịanga mị Nyanaḅọ Ḅe tomoni mamgba ọkwẹịn mị pikiri se ini galagalama sẹkiri mgba kelemaye-ẹ.

¹⁰Mịnapụ ma anị Shẹm furo ḅie apụ-ẹ. Opumengi mị ḅọrọ mama kụra sịkị ḅụ Shẹm ḅe kụra sọnọasi ọ̀ nwọ lasam, Apakshad nwọ chịn gbọrị owutọkụ ọ̀ nwọ yimẹ.

¹¹Anịeso ọ̀ pịkị kụra ẹndẹ sọnọasi fịnjị lamẹ se ọ̀ pịkịna jịn awọ yimẹ.

¹²Apakshad ḅe ọ̀ sẹnịḅo sọnọfa kụra mesi lasịkị, Shila nwọ chịn gbọrị owutọkụ ọ̀ nwọ yimẹ;

¹³ọḅụkọ ò pịkị ḍumo mun kụra ẹndẹ tẹrẹ-a kụra fịnjị lamẹ, se ọ̀ pịkị jịn awọ yimẹ.

¹⁴Shila ḅe ọ̀ sẹnịḅo kụra soi lasịkị, Eba nwọ chịn gbọrị owutọkụ ọ̀ nwọ yimẹ;

¹⁵ọḅụkọ ọ̀ pịkị kụra ẹndẹ tẹrẹ fịnjị lamẹ, se ọ̀ jịn awọ yimẹ.

¹⁶Eba ḅe ọ̀ sẹnịḅo kụra soi inein-a kụra fịnjị lasịkị, ọ̀ Pilẹg ḅe nwọ yimẹ;

¹⁷ọḅụkọ ọ̀ pịkị kụra ẹndẹ na kụra soi lamẹ, ọ̀ pịkị jịn awọ yimẹ.

¹⁸Pilẹg ḅe ò sẹnịḅo kụra soi lasịkị, Riu nwọ chịn gbọrị owutọkụ ọ̀ nwọ yimẹ;

¹⁹ọḅụkọ ọ̀ pịkị kụra oyiasi na esenie-a kụra lamẹ.

²⁰Riu ḅe ọ̀ sẹnịḅo kụra soi mama kụra fịnjị lasịkị, Sirọg nwọ chịn gbọrị owutọkụ ọ̀ nwọ yimẹ;

²¹ọḅụkọ ọ̀ pịkị kụra oyiasi na sọnọma kụra lamẹ; se ọ̀ pịkị jịn awọ yimẹ.

²²Sirọg ḅe ọ̀ sẹnịḅo kụra soi lasịkị, Nehọ nwọ chịn gbọrị owutọkụ ọ̀ nwọ yimẹ;

²³ọḅụkọ ọ̀ pịkị kụra oyiasi lamẹ se ò jịn awọ yimẹ.

²⁴Nehọ ḅe ọ̀ sẹnịḅo ngeifa kụra soi lasịkị, Tira nwọ chịn gbọrị owutọkụ ọ̀ nwọ yimẹ;

²⁵ọḅụkọ ọ̀ pịkị ngeifa kụra sonioasi la se jịn awọ yimẹ.

²⁶Tira ḅe ọ̀ sẹnịḅo kụra tesi oyi fịnjị lasịkị ori Ebram ḅe na, Nehọ ḅe na, pịkịna Heran ḅe na yimẹ.

²⁷Mịnapụ ma anị Tira furo ḅie awọ-ẹ, Ebram ḅe na, Nehọ ḅe na, pịkịna Heran ḅe na ḍaḅọ-ẹ. Heran ḅe Lọt ḅe yimẹ,

²⁸Heran ḅe oria ama anị Ụr Babilọn ḅie ò sime se fịmẹ; ḍawu ḅe ḍumo ḅụ sime arịogbo.

²⁹Ebram ḅe Seraị ma simemẹ, Nehọ ḅe Milka ma simemẹ, Heran tọkụma, ori pịkị Ịska ma yimẹ.

³⁰Seraị ma á be tọkụ yikẹ.

³¹Tira ḅe oria tọkụ Ebram ḅe na Heran ḅe yi tọkụ, Lọt ḅe na, pịkịna oria fuarọ, Seraị anị Ebram ḅe tarọ ma na, nwọse Ụr Babilọn anị opuama mị wẹrịso se Kenan ama mị mun mẹ. Ini mun Heran mị la se anịnyọ ḅụ anga mẹ.

³²Tira ḅe anịnyọ ò sime se fịmẹ, kụra oyiasi na sọnọ-a kụra ọ̀ nwọ lasịkị.