Read kirikeni Chukusakị 13 Bible Online

Chukusakị 13 - kirikeni bible

Chukusakị 13

¹Ebram ḅe ori Ijipt ḅụ ọgọnọ ọrụ ḅụ ọ̀ pakaso se Kenan ḅụ chuku daọrụ mị mun mẹ, tarọ ma na oriaye goyegoye mamgba na, Lọt ḅe sọnị ori na mun mẹ.

²Ebram ḅe opuma pẹrẹḅọ-ẹ, ori anana na, oḅori na, kịrịkịrị nambulo na, pịkịna seleḅa na goli na nyanamẹ.

³Ori anịnyọ mị wẹrịso se nwẹngị nyọnyọ mun se Bẹtẹl mị damunmẹ. Ò mun Bẹtẹl mị na Eaị mị na ogboku lamẹ, anị ọ̀ tatarị oria ikowarị mị pike ḅọrọ nyọ mị

⁴se ọ̀ gbọrị agbamịẹ ẹbẹ pikemẹ. Anịnyọ ḅụ ọ̀ Nyanaḅọ Ḅe tẹkẹmẹ.

⁵Lọt ḅe sọnị ọ̀ ḅakama anana na, oḅori na nambulo na, ò furo na; pịkị fịrịnwẹngịapụ nyanamẹ.

⁶Mị ẹrẹchị inia mama anana ogboma fịḅịa osuein ḅarị ḅakakẹ, ini gboloma anga nyọ mị ḅụ, anịatịḅị ini ḅakama nama nyanamẹ.

⁷Kamụ sịkịmamgba Ebram ḅe oria nama ḍikiḍiki apụma na, Lọt ḅe oria nama ḍikiḍiki apụma na ogboku korokoromẹ. (Anịsịkị mị ḅụ Kenan apụma na Pẹrizaị apụma na ini pa ama mị ḅie anga waraḅẹ.)

⁸Anị Ebram ḅe nwọse Lọt ḅe ḅẹye-ẹ, “Mine mịnapụ-ẹ, anị ḅụgbẹịnkẹ ị́ya fịrịnwẹngịapụma na ị̀ya fịrịnwẹngịapụma na sịkịmamgba kamụsọ.

⁹Anịgose ye wa pua. Ama mị ḅụ ị́ ḅụḅẹlẹnyọ sẹlẹ ọkị. Ị́rị́ gbọrị pẹkẹrẹda, ị̀rị̀ pịkịna ísí pẹkẹrẹdaḅịa.”

¹⁰Lọt ḅe ọ̀ nyọ mị ḍiki kelemaso sịkị ori ọrịmẹ na bebe Jọdan pẹsịkiri mị ḅie ọkịmun Zoa mị la mengi ḅeinmẹ, anị Nyanaḅọ Ḅe Ozu mị kịkẹmẹ anịkanịka Ijipt ama mị sime ọkụ simemẹ. (Mị sịkị mị ḅụ Nyanaḅọ Ḅe Sọdọm na Gomọra na ma ọ̀ famakẹ.)

¹¹Anịḅụ Lọt ḅe bebe Jọdan mị mgba sẹlẹ ọkị seni nwẹngị ịrụapakapaka nyọ damunmẹ. Mị ḅaraḅụ mị ini mama apụma puasikima ọkụ-ẹ.

¹²Ebram ḅe Kenan ama ḅie simemẹ, anịsịkị Lọt ḅe pẹsịkiri mị ḅie sime opuamama ḅie Sọdọm na kpeki nyọ ḅụ oria ikowarị mị ọ̀ nwọ pikemẹ,

¹³mịnapụma opuma sitịḅịnyana pịkị Nyanaḅọ Ḅe ḅụ simịẹmịẹ apụ-ẹ.

¹⁴Lọt ḅe sosịkị, Nyanaḅọ Ḅe nwọse Ebram ḅe ḅẹmẹ, “Ị́ sime nyọ ḅụ iḅiọkụma kweinma nyọ mamgba ḍikikelema.

¹⁵Àrị anị seni ị́rị́ na ị́ furoḅie pakaḅoḅịa apụma na pịrịḅịa, ị́ nwọ ọrị ama mamgba, anị pịkị sime ọ́ pịrị gbasoḅịa.

¹⁶À ḅakama ị́ furoḅie pakaḅoḅịa apụ seni ị́ pịrịḅịa, se gbọrịḅọ sọnị ineda inia kịẹnḅịpị nemi-ẹkẹ; anị ineda kiri ọgọnọ fọn ma kịẹnḅịa ḅọ sikima!

¹⁷Mịọkụ, mun bebe ama mị mgba ḍikikelema; anịatịḅị à seni ị́ pịrịḅịa.”

¹⁸Anịẹrẹchị Ebram ḅe oria ikowarị sin somun Hibrọn ḅie Mamre ḅụ osi nyana ejema na kpekima simemẹ, ọ̀ pịkịna anịnyọ agbamịẹ ẹbẹ pike Nyanaḅọ Ḅe pịrịmẹ.