Read kirikeni Chukusakị 16 Bible Online

Chukusakị 16 - kirikeni bible

Chukusakị 16

¹Ebram ḅe tarọ Seraị ma, ma àrị awọ yi ọ̀ pịrịkẹ. Ọkụma Ijipt gbọrị omoni eremeni tọkụ á nwọ nyanamẹ, árịa ẹrẹ anị Hega,

²á nwọse Ebram ḅe ḅẹmẹ, “Nyanaḅọ Ḅe ò ḅereni ị̀ pịrịkẹ àrị awọ yi. Cheye gose ị́ ị̀ya omoni tọkụ ma na gboloma ẹka? Sosi á gbọrị tọkụ yi ị̀ pịrịḅịa.” Ebram ḅe Seraị ma ḍukoye mị ḅerenimẹ.

³Anịẹrẹchị árị á seni ọ̀ pịrịmẹ ịgwa eremeniḅọ ḅaraḅụ. (Mịn mị mịẹ sịkị Ebram ḅe Kenan ḅie oyi-a kụra ọ̀ nwọ angasam.)

⁴Ebram ḅe ori Hega ma na gbolomamẹ, seni á furamẹ. Á furasam á nwọ ọrị sịkị, á ḅo ḅụdekichịẹma pịkị Seraị ma ḍikisimamẹ.

⁵Anị Seraị ma nwọse Ebram ḅe ḅẹye-ẹ, “Hega ma gose ị̀ ḍikisimarịye mị ị́ ḅara ḅomẹ. Ị̀rị̀ ḅarana á seni ị́ pịrịmẹ, á ḅo ọrịmẹ na á furasam nwọḅẹye gose árị ị̀ ḍikisimasam. Ye Nyanaḅọ Ḅe karakaraye mị kọn mine mama apụma pịrị, ị́ ḅaraḅo na ị̀ ḅaraḅo na!”

⁶Ebram ḅe nwọse á pẹkẹrẹmẹ, “Iḅimẹ, árị ị́ya omoniḅọ-ẹ, ị́ chukuḅie á pịkị omi-ẹ nwọḅẹ sịkị, ị́ ḅụḅẹlẹḅara nwọse árị na anga.” Anịḅụ Seraị ma opuma siḅara seni árị na angaye gose á mangịsomẹ.

⁷Nyanaḅọ Ḅe enjẹlḅọ, ḅọrọ Shọ mị mun-arị ateli ḅụ sime onwun ele mị ḅie ḅụ kiriḅie pakaḅoarị mengi mị nyọ ḅụ Hega ma na ịrịamẹ

⁸se nwọḅẹmẹ, “Hega Seraị omoniḅọ, ndeju ị́ ḅo, se mịọkụ ndeju ị́ nwọ mun-ao?” Á nwọ pẹkẹrẹmẹ, “Ị̀ nyanaḅọ ma ḅụ à mangịsoaḅẹ.”

⁹Ọ̀ nwọḅẹmẹ, “Vinpịkị so á damamun se árịa omoniḅọ sọ.”

¹⁰Se ọ̀ nwọḅẹmẹ, “Tọn-awọ ị́ furoḅie pakaḅoḅịa, tomoni ineda ini kịẹn ẹka ḅara.

¹¹Ị́ gbọrị owutọkụ yiḅịa se Ishmẹl ị́ nwọse ọ̀ chịnḅịa, anịatịḅị Nyanaḅọ Ḅe ị́ kọn àrị tịḅịfoinma owu mị nwọ naasam.

¹²Ọkụma ị́ya tọkụ ḅe piriḅie-owoi yepụra asụn ḍumo ọ̀ nwọ kọnḅịa; ọ̀ taraka se nweni mamgba wẹrịma ḅịa, nweni mamgba pịkịna taraka se ọ̀ wẹrịma ḅịa. Oria mịnapụ mamgba ḅụ ò sikima anga ḅịa.”

¹³Hega ma nwọse á ḅụgbelamẹ, “À kọkọma Tamụnọ Ḅe ọrị se ḍumo se pịkị anị ḍukoḅịa nọ?” Anịẹrẹchị Nyanaḅọ ọkwẹịn á pịrịḅọ ḅe á nwọse ọ̀ chịnmẹ, “Ye Ọrịrị Tamụnọ.”

¹⁴Anịẹrẹchị tomoni nwọse Kedẹsh na Birẹd na ogboku ḅụ sime olulu mị chịnmẹ, “Ị̀ Ọrị Ḍumoḅọ Ḅe oria Olulu.”

¹⁵Hega ma gbọrị owutọkụ nwọ yi Ebram ḅe pịrịmẹ, se ọ̀ nwọse ọ̀ chịnmẹ Ishmẹl.

¹⁶Ebram ḅe anịsịkịḅụ ineinfa kụra iniasi oyi fịnjị ọ̀ nwọ lasam.