Read kirikeni Chukusakị 18 Bible Online

Chukusakị 18 - kirikeni bible

Chukusakị 18

¹Nyanaḅọ Ḅe Mamre ḅie sime osiḅụ sime ejema nyọ ḅụ, ọ̀ ḅụpakụma Ebraham ḅe pịrịmẹ. Ebraham ḅe ene mị opuma ọfịrịye gose oria ikowarị mị ḅọkọkọ ọ̀ kpọnjị simemẹ,

²ori ọ̀ tọrụ dekichịẹma ḍiki se tẹrẹ-a owuapụ nwọ ọrịmẹ anị nyọ ḅụ chịẹwaraḅẹ. Ori ini ọrị gbọrị kirikiri, ọ̀ mangị mun ini lamẹ. Ọ̀ ḅịkị korose ọ̀ tọrụ se kiri lamamẹ,

³se nwọ ḅẹmẹ, “Ị̀ nyanapụ, pasisi ómine ị̀ya warị agbaka ḅaraḅụ ḅọrọma; fịrịnwẹngị ọ́ pịrị gose à mịanga simemẹ.

⁴Ye à mengi ọkịḅo ó se ọ́mịna ḅụọma sịkịrị; ọ́ pịkị ejema chuku ịnyọsara.

⁵Se à fịye kalaye ọkịḅo ọ́ pịrịḅịa; anị ịnyọ se ọ́ pịrị se ó mun-arị nyọ mị munḅịa. Ómine osi se ị̀ pịrịmẹ ọ́ nwọ ị̀ya warị ḅoye mị, anịẹrẹchị ye à fịye kalaye se ọ́ pịrị.” Ini nwọse ọ̀ pẹkẹrẹmẹ, “Wa ḅerenimẹ, ị́ ḍuko ọkụ mị mịẹ.”

⁶Ebraham ḅe be mangị ikowarị mị ḅie sọ se nwọse Sera ma ḅẹmẹ, “Sarama, tẹrẹ-a kiri laḅịa fịlawa ọkị se be fịturu fọị.”

⁷Ọ̀ pịkịna be mangị oria nama ogboma ḅie mun se gbọrị ḍụḅa ayamburama nambulo ọkịpakụmaḅo seni oria fịrịnwẹngịapụma ḅie gbọrịḅọ pịrị se ori ọ̀ ḅụ nwẹngị na gbẹịn-a fịrịnwẹngị se anị karakaramamẹ.

⁸Ò fịye krim kalaye na, ndo mengi na, nama mị na, ọkị se mun inia tọrọkọ koromamẹ. Anịnyọ eje mị chuku ọ̀ ḅarana anị tẹlịma se ini fịayema fịmẹ.

⁹Ini nwọse ò gbelamẹ, “Ị́ ta Sera ma nde árị?” “Anịnyọ ikowarị mị ḅie árị omi-ẹ,” ọ̀ nwọse ini pẹkẹrẹmẹ.

¹⁰Inia ḅie gbọrịḅọ nwọ ḅẹmẹ, “Mịọkụ ọkịmun esenie-a akalụ laḅịa sịkị à pịkịna ḅoḅịa, ị́ ta Sera ma anịsịkịḅụ á gbọrị owutọkụ yiḅịa.” Sera ma oria ọḅụju árị omi-ẹ, ikowarị ḅọkọ mị ḅụ árị ini pokiaḅẹ.

¹¹Ebraham ḅe na Sera ma na ini iḅiọkụma olomusam, Sera ma, á ḅarị pịkị sịkị ọrịkẹ.

¹²Anịḅụ Sera ma, á ḅieḅụ ḍẹrị se nwọ ḅẹmẹ, “Mịọkụ àrị olomuso sịkị, ị̀ de ḅe sọnị olomusam, nde wa gboloma se tọrụḅẹlẹ nyanaḅịa ọkụ?”

¹³Anị Nyanaḅọ Ḅe Ebraham ḅe gbelaye-ẹ, “Cheye gose Sera ma á ḍẹrị se nwọḅẹ na, ‘Mịọkụ à nwọ olomu lasaḅara mị à kọkọma tọkụ yiḅịa nọ?’

¹⁴Nyanaḅọ Ḅe ḅụ opuma kụrọ kụkụye omi? À ḍukosa ḅaraḅụ, mịọkụ ọkịmun esenie-a akalụ laḅịa sịkị à pịkịma ḅoḅịa, anịsịkịḅụ Sera ma gbọrị owutọkụ á nwọ yiḅịa.”

¹⁵Sera ma á ḅalafaye gose, árị anị pikimẹ, “À ḍẹrịka-ao” à nwọ ḅẹmẹ. “Ẹn-ẹn, ọkụma ị́ ḍẹrịmẹ” ọ̀ nwọse á pẹkẹrẹmẹ.

¹⁶Anịḅọrọso tomonima somun ini ineda Sọdọm mị ọrịḅịa nyọḅụ chịẹmẹ, Ebraham ḅe sọnị ori ini na mun mẹ ḅaḅa se ini ḅẹḅịa ẹrẹchị.

¹⁷Nyanaḅọ Ḅe nwọse mịnaḅụ ḅẹmẹ, “À mịẹḅịaye mị à se Ebraham ḅe ḅọịma ẹkẹ.

¹⁸Ò furo ḅie pakaḅoḅịa awọma, ini opuma ḍụḅa sẹ sọḅịa, ọ̀ ḅụ mị à pịkịna ḅọrọ sẹsẹ mamgba ḅẹlẹmaḅịaye-ẹ.

¹⁹Àrị ọ̀ sẹlẹọkịsam mịẹso sịkị ọ̀ tọn oria awọma na ò furo ḅie pakaḅoḅịapụ ma na pịrị, ini ị̀ ḅịpịpoki pịkị karakaraye na mịẹgbẹịnye na mịẹḅịa ḅara. Ini ọkọmịẹ ọkụma, à ḅereni ọ̀ pịrịye goyegoye à mịẹ ọ̀ pịrịḅịa.”

²⁰Anị Nyanaḅọ Ḅe nwọse Ebraham ḅe ḅẹye-ẹ, “Ini seni Sọdọm na Gomọra na tịḅị gbana ḅalafamaye omi-ẹ, inia sima pịkị opuma ḅakasam.

²¹À mun ḍọkịpakụmaḅịa nwọfa à naase ini se inia ọgọnọ gbana ḅẹrẹ ma karakaraye-etuḅo.”

²²Anịḅụ mama apụma nwẹngịso Sọdọm damẹ, ọkụma Nyanaḅọ Ḅe na Ebraham ḅe na simemẹ.

²³Ebraham ḅe Nyanaḅọ Ḅe damamun se ò gbelamẹ, “Ị́ mun kọkọma karakaraye mịẹ apụma se simịẹapụma ḅụ chụa se ini ḅaafama ḅe?

²⁴Nemikase karakaraye mịẹ apụ ḅụ kịnị-a mesi oyi fịnjị opuama mị ḅie sime ọkụma, bebe opuama mị mgba ị́ famaḅe? Ị́ ḅarasin anị pịrị-ẹka kịnị-a mesi oyi fịnjịma tịḅị gose?

²⁵Pikipikiye ofori-ẹ na, karakaraye mịẹ apụma ị́ ini se siapụma ḅie chụa ḅaa-ẹkẹ. Anị mịẹkaye-ẹ! Ngịsị ị́ ineda ọkọsimeye mịẹkẹ. Ị́ ọkọmịẹ ọkụma iḅiapụma na siapụma na fomuḅara da gbolomaḅịa. Anị ị́ mịẹkaye-ẹ. Bebe sẹkiri mị mgba ḅe ḅẹrẹkọnḅịaḅọ ḅe, ọ̀ karakaraye mị mịẹḅịa.”

²⁶Nyanaḅọ Ḅe nwọ pẹkẹrẹmẹ, “Nemikase karakaraye mịẹ apụ kịnị-a mesi oyi fịnjị Sọdọm ḅie à nwọ ḍọkịḅo ọkụma, ini gose bebe opuama mị mgba à wẹrịsoḅịa.”

²⁷Ebraham ḅe pịkịna ọkwẹịnmẹ, “Pasisi ị̀ya kụrọ kuḅie mị ḍikitọrụsin ị̀ pịrị, à nwọ pa ị́rị́ na ọkwẹịn arịye mị, Nyanaḅọ. Ị̀rị̀ papa tomoniḅọ-ẹ, à kụrọnyanakẹ gbọrịye sọnị ḍuko.

²⁸Ọkụma sosi kịnị-a mesi oyi fịnjị na karaka kịnị-a mesi na sọnọ apụ fịnjị kẹngẹ karakaraye mịẹ ọkụma. Bebe opuama mị mgba ị́ famaḅe sọnọ apụma oforikaye gose?” Nyanaḅọ Ḅe nwọ pẹkẹrẹmẹ, “Opuama mị à fama ẹkẹ à ḅọrọ nemikase kịnị-a mesi na sọnọ apụ fịnjị ḍọkịḅo ọkụma.”

²⁹Ebraham ḅe pịkịna ọkwẹịn se nwọ ḅẹmẹ, “Sosi kịnị-a mesi kẹngẹ-ẹ nwọḅẹ ọkụma?” Ọ̀ nwọ pẹkẹrẹmẹ, “Àrị anị fama-ẹkẹ kịnị-a mesi omi ọkụma.”

³⁰Ebraham ḅe nwọ ḅẹmẹ, “Sisi ịganịma-ao Nyanaḅọ, ọkụma à pịkịna ọkwẹịnḅịa. Nemikase kịnị-a soi kẹngẹ ọkụma?” Ọ̀ nwọ pẹkẹrẹmẹ, “À mịẹkẹ kịnị-a soi kẹngẹ à nwọ ọrị ọkụma.”

³¹Ebraham ḅe nwọ ḅẹmẹ, “Pasisi ị̀ya kụrọ kuḅie mị ḍikitọrụsin ị̀ pịrị, à nwọ pa ọkwẹịn ị́ pịrịarịye mị ḅụ, Nyanaḅọ. Nemikase si kẹngẹ pakaḅo ọkụma?” Ọ̀ nwọ ḅẹmẹ, “Anị opuama mị à fama-ẹkẹ, si keme kẹngẹ à nwọ ọrị ọkụma.”

³²Ebraham ḅe nwọ ḅẹmẹ, “Sisi ịganịma-ao, Nyanaḅọ, à pa pịkị gbọrị sịkị se ọkwẹịnḅịa. Oyi apụ kẹngẹ-ẹ nwọḅẹ ọkụma.” “Àrị anị fama-ẹkẹ oyi apụ omi ọkụma,” ọ̀ nwọ pẹkẹrẹmẹ.

³³Ori Ebraham ḅe na ọkwẹịnso sịkị Nyanaḅọ Ḅe ò somẹ, se Ebraham ḅe sọnị vinpịkịso oria warị mun mẹ.