Read kirikeni Chukusakị 19 Bible Online

Chukusakị 19 - kirikeni bible

Chukusakị 19

¹Mama enjẹlapụma anị saso ḅiri Sọdọm ḅo sịkị, Lọt ḅe opuama mị onu ḅọkọ ḅụ ọ̀ kpọnjị sime waraḅẹ. Ori ini ọrị kirikiri ọ̀ sịsẹ mun ini na ịrịamẹ. Ori inia tọrọkọ ọ̀ tịḅịtu

²se nwọ ḅẹmẹ, “Ị́ nyanapụ, fịrịnwẹngị ọ̀ pịrị gose à mịanga simemẹ. Sisi ómine ị̀ya warị ḅo. Ómine ineda ọ́mịna ḅụọma sịkịrị se ḍin mị se mịanga simeḅịa. Dede lasịkị ómine iḅisịkị sịsẹ se ó mun-arị anga munḅịa.” Ọkụma ini nwọ ḅẹmẹ, “Ẹn-ẹn, wa ḍin mị seni mị opuama ogbo simeḅịa.”

³Ori opuma inia ḅụfụkamamẹ, ọḅụkọ ini ḅereni ọ̀ pịrị seni ori na oria warị mun mẹ. Lọt ḅe ḍuko oria fịrịnwẹngịapụma pịrịmẹ, na ini suka fịturu fọị se pịkịna iḅi fịye mịẹ oria igoniapụma pịrị. Fịye mị karakarama sosịkị, ini yefịmẹ.

⁴Igoniapụma ma warị ḅie sọmun mọnọka simeogbo, Sọdọm owuapụma warị mị ḍẹkịkelemamẹ. Opuama mị ḅie sime owuapụ mamgba, kala na sẹnị na anịanga ḅomẹ.

⁵Ini Lọt ḅe chịn oloku se nwọse ò gbelamẹ, “Mịn ḍin ḅie ị́ya warị ḅo owuapụma nde ini? Ini pakụmaḅo wa pịrị!” Sọdọm owuapụma, ini ini na gboloma ḅimẹ.

⁶Lọt ḅe nụngọ pakaḅo se ḅọkọ mị palị igoniapụma pịrịmẹ.

⁷Ọ̀ nwọse ini ḅẹmẹ, ikiapụ àrị ọ́ tẹkẹmẹ, ómine ọkọsime sitịḅịnyanapụ mịẹmịẹaye nwọ mịẹma.

⁸Ḍiki, mịanga ma owuapụ nemika mama eremeni awọ à nwọ nyanamẹ. Ye àrị ini ọkịḅo ọ́ pịrị, se ó ḅiḅara ọ́ nwọse ini mịẹ. Ọkụma gbọrịye sọnị ó se mịna owuapụma mịẹma; ị̀ya warị ini igoni ḅomẹ, àrị ini gbẹịnḅịa.

⁹Ọkụma ini nwọ ḅẹmẹ, “Mịna tọrọkọ ḅụsikima, ị́rị́ ḅe bịanḅoḅọ! Ị́rị́ tụḅọ se wa mịẹḅịaye ḍuko wa pịrịḅe? Ḅụsikima, anịka wa se ị́ mịẹḅịaye sitẹịn iniaye nẹngịḅịa.” Ini Lọt ḅe sumasin se mun ḅọkọ mị kan-ẹmunmẹ.

¹⁰Ọkụma warị mị ḅie sime mama owuapụma pakaḅo seni Lọt ḅe jine warị ḅie chumẹ, se ḅọkọ mị palịmẹ.

¹¹Ini mịẹmẹ nụngọ ḅie sime owuapụ mamgba tọrụmgbọlụma pụnmẹ, anị mị mịẹse ini ḅarị ineda ḅọkọ mị ọrịkẹ.

¹²Mama owuapụma nwọse Lọt ḅe ḅẹmẹ, “Ị́ nemikase jịn owuapụ awọ anịkanịka ị́ya eremeni awọ deapụ, anịkanịka ị́ya mịnapụ mị opuama ḅie omi-ẹ ḅẹḅẹ, mịanga ini na pakaso,

¹³anịatịḅị mịn ama mị wa anị famaḅịa. Nyanaḅọ Ḅe, mịnapụma inia ḅụ ḍukoḅịa ọkụ oforika simịẹmịẹaye ma na, ini seni inia ọgọnọ gbanaye ma na, arịḅo ọ̀ tọrọkọ lasam, se ọ̀ wa fịrịmamẹ na wa ḅo Sọdọm mị fama.”

¹⁴Anị Lọt ḅe so oria eremeni awọma simeḅịa apụma damamun se ini ḅẹye-ẹ, “Ọ́ saramaye se mịangaḅụ pakaso; Nyanaḅọ Ḅe mị nyọ mị ọ̀ famaḅịa.” Ọkụma inia ḅụ anị yesọkẹ, ini nwọ chịnmẹ ọ̀ papa ḍukomẹ.

¹⁵Ene ḅa sịkị enjẹlapụma Lọt ḅe jikemẹ, “Saramaye!” ini nwọse ọ̀ ḅẹmẹ. “Ị́ tama na, ị́ya mama eremeni awọma na ọkị se pakaso, mịẹse ọ́mịna ḍumo faẹka ḅara opuama mị faḅịa sịkị.”

¹⁶Lọt ḅe ò ḅerenikẹ. Ọkụma anị sọnị Nyanaḅọ Ḅe ḍikitịḅịfoin nyana ọ̀ pịrịmẹ; anịẹrẹchị tomonima ḅaraḅụ ori na, tarọ ma na, pịkị oria mama eremeni awọma na ọlọ se ini jine pakụmamẹ opuama mị ḅie.

¹⁷Se enjẹlapụma ḅie gbọrịḅọ nwọ ḅẹmẹ, “Ọ́mịna ḍumo gose ọ́ mangịso! Ọ́ tọrụpịkị ọḅụḍikima, pẹsịkiri mị ḅie sọnị ọ́ dachịẹma. Ọ́ mangị chịngịma damun, mịẹse ọ́ fịẹka ọkụ.”

¹⁸Ọkụma Lọt ḅe ọ̀ pẹkẹrẹ se nwọ ḅẹmẹ, “Ẹn-ẹn, sisi ọkọse wa mịẹma, ị̀ nyanaḅọ.

¹⁹Opu iḅi ị́ nwọse ị̀ mịẹmẹ, ị́ pịkị ị̀ ḍumo ḍụamẹ. Ọkụma chịngịma opuma sasamẹ; fị mị ị̀ laḅịa ma àrị anịju laka simeogbo.

²⁰Anị kala ama mị ị́ ọrị? Anị iḅiọkụma kpekimẹ. Ye à saḅa anịnyọ sọ, ị́ ineda ọrịḅịa na kala nyọ-ẹ, anịju ye ị̀ la-ẹkẹ, à ḍumoḅịa.”

²¹Ọ̀ nwọse ọ̀ ḅẹmẹ, “Iḅimẹ, à ḅerenimẹ. Anị ama mị àrị anị fama-ẹkẹ.

²²Sarama! Mangị! Gbọrịye sọnị à ye ẹkẹ ị́ mun anịju laka simeogbo.” Kalanyọ Lọt ḅe nwọse anị chịn ẹrẹchị, ama mị Zoa ini nwọse anị chịnmẹ.

²³Lọt ḅe ò mun Zoa mị lasịkị ịrụa mị pakaḅo aḅẹ.

²⁴Ḅụnemika ḅaraḅụ Nyanaḅọ Ḅe opu-kọrị-fịnị se Sọdọm na Gomọra na opuamama ọgọnọ saramẹ

²⁵se opuamama na pẹsịkiri mị mgba na, ama ḅie sime tomoni mamgba na ḍumo nyanaye goyegoye na, dọkịma famamẹ.

²⁶Ọkụma Lọt ḅe tarọ ma á tọrụpịkị ọḅụḍikimẹ, seni á ḅo fụn okpokpo sọmẹ.

²⁷Anịḅe ene ḅa dedeḅie dedeḅie Ebraham ḅe ò be so Nyanaḅọ Ḅe tọrụkuḅu gbọrị sịkị ọ̀ chịẹ nyọ mị mun mẹ.

²⁸Ori ọ̀ tọrụtu Sọdọm na Gomọra na, pịkị bebe pẹsịkiri mị mgba na ḍikimẹ, onwoin mị bebe ama mị ḅie mgba soarịye-ẹ, opu orumo onwoin ḅara.

²⁹Ọkụma Lọt ḅe gbọrị sịkị ḅụ anga sime pẹsịkiri mị ḅie opuamama, Tamụnọ Ḅe nwọ fama-ẹtọn-a sịkị, ori Ebraham ḅe se ḅiekoromamẹ se ḅereni Lọt ḅe pịrị se, ọ̀ fị mị ḅie pọkọsomẹ.

³⁰Lọt ḅe Zoa mị ḅie sime mị ọ̀ ḅalafamaye gose, ori na oria mama eremeni awọma na somun chịngịma ḅie ḅụ gbọrị pokolo ḅie angamẹ.

³¹Sẹnịḅọ ma nwọse kalaḅọ ma ḅẹmẹ, “Mịna ḍaḅe ori olomuaḅẹ, owuapụ pịkị bebe tomonikiri mị ḅie mgba ofori-ẹ wa sime se wa awọmẹnị nyanaḅịa apụ.

³²Ḅo wa iru se ọ̀ pịrị ò ḅu ọ̀ tọrụḅaama se wa ori na gboloma se ọ̀ ḅụ ḅọrọ awọmẹnị nyanaḅịa ọkụ.”

³³Anị ḍin ḅie ini iru seni ọ̀ pịrị se ò ḅumẹ, se sẹnịḅọ ma ori na gbolomamẹ. Ọkụma iru mị opuma ọ̀ tọrụsọ ọkụ gose ò nemikẹ.

³⁴Ene mị ḅasịkị, sẹnịḅọ ma nwọse kalaḅọ ma ḅẹmẹ, “Ḅịa ḍin ḅie àrị ori na gbolomamẹ; mịọkụ ye wa pịkịna mị ḍin ọ̀ mịẹse ò ḅu, se ị́rị́ mun ori na gboloma. Anị ḅaraḅụ mịnaḅụ gbọrịḅọ gbọrịḅọ mịna ḍaḅe ḅụ ḅọrọ se tọkụ nyanaḅịa.”

³⁵Anị ḅaraḅụ ini pịkịna anị ḍin ḅie iru se ọ̀ pịrị se ò ḅu ọ̀ tọrụḅaama se kalaḅọ ma mun ori na gbolomamẹ. Ọ̀ pịkịna mịẹarịye nemikẹ, iru ọ̀ tọrụsọye gose.

³⁶Mị ḅaraḅụ Lọt mama eremeni awọma inia ḍaḅe ḅụ ḅọrọ simekọnmẹ.

³⁷Sẹnịḅọ ma gbọrị owutọkụ á nwọ yimẹ, á nwọse ọ̀ chịnmẹ Moab. Ori anị mịsịkị Moab apụma inia ḅieju ḍaḅọ ḅe-ẹ.

³⁸Kalaḅọ ma sọnị pịkị gbọrị owutọkụ yimẹ, á nwọse ọ̀ chịnmẹ Ḅenamị. Ori anị mịsịkị Amọn apụma inia ḅieju ḍaḅọ ḅe-ẹ.