Read kirikeni Chukusakị 2 Bible Online

Chukusakị 2 - kirikeni bible

Chukusakị 2

¹Anịḅụ bebe tomonikiri mị mgba ḅo tẹmẹ karamaye sọmẹ.

²Sọnọma ḍin karama ene mị ḅụ Tamụnọ Ḅe ọ̀ mịẹarịye goyegoye nwọ mịẹfama seni ọ̀ fịrịnwẹngị ḅụ dachịẹmẹ.

³Tamụnọ Ḅe sọnọmẹ karama ene mị ḅẹlẹma mẹ, pịkị osi se anị pịrịmẹ, anịatịḅị anị ene mị ḅụ yetẹmẹ fịrị mị ọ̀ nwọ nwẹngị karamamẹ seni ori ịnyọsara mẹ.

⁴Anịḅara anị Tamụnọ Ḅe tomonikiri mị na, pịkịna anịa ḅie simeaye mamgba na tẹmẹ ọkụ-ẹ. Tamụnọ Nyanaḅọ Ḅe, so mị na tomonikiri mị na tẹmẹ sịkị,

⁵kiri ọgọnọ sopaka ịnyanya chụa chịn ngịsị ofori-ẹ, chịnmgbọlụ pịkị ḅịpị tolumakẹ, anịatịḅị ma ori ene fịrịmakẹ, pịkịna ozu fịrịnwẹngị ḅịa gbọrịḅọ sọnị ofori-ẹ;

⁶ọkụma mengi kiri chuku ḅie pakaḅo se kiri mị pisima-pisimamẹ.

⁷Anị Tamụnọ Nyanaḅọ Ḅe kiri-ọgọnọ aḅaịn ọkị, anị seni tomoniḅọ tẹmẹye-ẹ, ọ̀ ḅịpị ḅụ ḍumo pịrị ọwụ ofuro ò niniḅie chụamẹ, se tomoniḅọ ḅe ḅo sakị ḍumomẹ.

⁸Anịsịkị Tamụnọ Nyanaḅọ Ḅe, Idẹn ḅie ịrụa mị pakapaka nyọ ḅụ ozu ḍipimẹ se ori anịju ḅụ ọ̀ tẹmẹḅọ ḅe seni koromamẹ.

⁹Ọ̀ mịẹmẹ anịnyọ ḅụ kịrịkịrị iḅia chịn sẹnịpakamẹ àrị pịkịna iḅi chịnmgbọlụ chụamẹ. Idẹn Ozu mị ogboku ḅụ anị ḍumo pịrị chịn mị na, iḅiye na siye na nemiḅịa chịn mị simeye-ẹ.

¹⁰Idẹn mị ḅie ideri mengi ḅọrọ se ozu mị pisima-pisimamẹ, anịnyọ Idẹn mị ḅụ sikima, anị ḅo inein-a ịkpangị nwọ pumẹ.

¹¹Tatarị tọrụ mị anị Pishọn mị-ẹ, anị ideri Havila sẹ mị kelemamẹ.

¹²(Jokoma iḅi goli na tomoni sarasarama ọrịka kụnụ olo na yela ḍụparị na anịnyọ ḅụ omi-ẹ.)

¹³Maịn karama tọrụ mị anị Gịhọn mị-ẹ; anị ideri Kọsh sẹ mị kelemamẹ.

¹⁴Tẹrẹ karama tọrụ mị anị Tigirisi mị-ẹ, anị ideri Asiria ḅụ ịrụapakapaka ọrụ damunmẹ, anịsịkị inein karama tọrụ mị anị Yufretis mị-ẹ.

¹⁵Se Tamụnọ Nyanaḅọ Ḅe tomoniḅọ ḅe seni Idẹn Ozu mị ḅie koromamẹ na ori anịa ḅie yeḍipi pịkịna anị ḍikiḍiki.

¹⁶Ọ̀ nwọ seni ọ̀ ḅẹmẹ, “Ozu mị ḅie sime chịnmgbọlụ goyegoye ị́ ineda fịḅịa,

¹⁷ọkụma nemi nyana, pịkịna iḅiye na siye na nemi chịnmgbọlụ mị ị́ fị ẹkẹ. Anị chịn mị ḅụ pakaḅo chịnmgbọlụ ị́ nwọ fịmẹ ḅẹḅẹ anị gbọrị ene ị́ fịḅịa.”

¹⁸Tamụnọ Nyanaḅọ Ḅe ḅo nwọ ḅẹmẹ, “Anị ḅụgbẹịnkẹ owuḅọ ḅe kẹngẹ kpọngọlọma sime. Àrị ori na kuraḅịa ḅụsọsọmaḅọ seni ọ̀ pịrị se ḅarachụa ọ̀ pịrịḅịa.”

¹⁹Anị ò kiri ọgọnọ aḅaịn ọkị seni nama mamgba na feni mamgba na tẹmẹye-ẹ. Se Tamụnọ Ḅe àrị seḅo tomoniḅọ ḅe pịrịmẹ ò se àrị chịnḅịa ẹrẹ ḍiki; anị namama na fenima na wẹrị arịa ẹrẹ ma nyana ọkụ-ẹ.

²⁰Anịḅụ tomoniḅọ ḅe ẹrẹ seni feni mamgba na nama mamgba na chịnmẹ; ọkụma arịa ḅie tomoniḅọ ḅe na kura se ọ̀ ḅụsọsọma pịkị ḅarachụa ọ̀ pịrịḅịa gbọrịye sọnị ofori-ẹ.

²¹Anị Tamụnọ Nyanaḅọ Ḅe tomoniḅọ ḅe mịẹse ò gbun mọnọ kọnye-ẹ, ọ̀ mọnọarị ogbo ò tomoniḅọ ḅe agaga ḅie gbọrị imgbe ọkị se mịnị mị gbẹịnmẹ.

²²Agaga ḅie imgbe mị ò seni gbọrị eremeniḅọ tẹmẹmẹ, se ori árị ọkịḅo tomoniḅọ ḅe pịrịmẹ.

²³Anị tomoniḅọ ḅe nwọḅẹye-ẹ, “Kulumaḅụ, mị à simeọkụ simeḅọ-ẹ— Ị̀ya imgbe ḅụ ini ọkịpakụmaḅo imgbe, pịkịna ị̀ya mịnị ḅụ pakaḅo mịnị. ‘Eremeniḅọ’ anị árị ẹrẹ-ẹ anịatịḅị owuḅọ ḅe ḅụ ini árị ọkịpakụmaḅomẹ.”

²⁴Anịgose owuḅọ ḅe ḍawu ḅe na nyọngọrọma na wẹrịso seni mun tarọ ma na gboloma se gbọrị oju nwọ mịẹmẹ.

²⁵Tomoniḅọ ḅe na eremeniḅọ ma na, mama apụma ini papaḅụsinmẹ, ọkụma iniaḅụ gererekẹ.