Read kirikeni Chukusakị 20 Bible Online

Chukusakị 20 - kirikeni bible

Chukusakị 20

¹Ebraham ḅe ọ̀ Mamre ḅie sọmun Kenan ḅụ chuku daọrụ ḅụ, Kedẹsh na Shọ na ogboku angamẹ. Ọḅụkọ ò mun Gira ḅie anga sime sịkịḅụ,

²Ebraham ḅe nwọ ḅẹmẹ, tarọ Sera ma árị nụmbụrarọ-ẹ. Anịẹrẹchị Gira Amanyanaḅọ Abimẹlẹk ḅe Sera ma fịrịma ọkịmẹ.

³Gbọrị ḍin ḅie, Tamụnọ Ḅe ḍawọju ḅụpakụma ò ḍie se nwọse ọ̀ ḅẹmẹ, “Ị́ fịḅịa, ị́ ma eremeniḅọ ma ọkịye gose; anịatịḅị árị owuḅọ simemẹ.”

⁴Ọkụma Abimẹlẹk ḅe ma ọḅụ-se-á kpekimakẹ; anịẹrẹchị ọ̀ nwọ ḅẹmẹ, “Nyanaḅọ, à ḅẹrẹtịḅị nemikẹ! Ị́ ị̀rị̀ na ị̀ya tomonima na fama ḅe?

⁵Ebraham ḅe na mịnaḅụ na kọkọ nwọse ị̀ ḅẹ árị nụmbụrarọ-ẹ, árị sọnị nwọ ḅẹmẹ, ori ị̀ mbire-ẹ. Fịafịa kuḅie ḅụ na ḅẹrẹtịḅị nemika ḅụ na à mịn mị mịẹmẹ.”

⁶Anịsịkị Tamụnọ Ḅe ḍawọju ọ̀ pẹkẹrẹ se nwọ ḅẹmẹ, “Iin, à nemimẹ na fịafịa kuḅie ḅụ ị́ mịn mị mịẹmẹ, anị à gose ḅerenikaye-ẹ ị́ ị̀ ḅụ siyemịẹ, à pịkịna ḅereni ị́ pịrịkẹ ị́ ḅara se á lama.

⁷Ọkụma mịọkụ, eremeniḅọ ma seni dewu ḅe fịrịma. Ori ịkịankoroḅọ-ẹ, ọ̀ pịkị tẹkẹ ị́ pịrịḅịa, mịẹse ị́ fị ẹka ọkụ. Ọkụma ị́ nemikase á seni ọ̀ pịrịka, àrị ị́ ḅerijine-aḅẹ na ị́ fịḅịa, ị́rị́ na ị́ya tomonima na.”

⁸Ene ḅa dedeḅie Abimẹlẹk ḅe oria fịrịnwẹngịapụ mamgba chịn koḅirima se pakaye mị ḍuko ini pịrịmẹ, se inimgba inia ḅalafamẹ.

⁹Anị Abimẹlẹk ḅe Ebraham ḅe chịn seni ò gbelaye-ẹ, “Mị cheye ị́ nwọse wa mịẹ? Che siye à nwọse ị́ mịẹ, ị́ nwọ sime opu fa ọkịḅo ị̀rị̀ na ị̀ya amanyanakiri mị na pịrị-ẹtọn? Ị́ mịẹye mị seni ị̀ mịẹḅịa jịn gbọrịḅọ sọnị ofori-ẹ.

¹⁰Cheye gose ọkọ simeye ị́ nwọ mịẹ?”

¹¹Ebraham ḅe pẹkẹrẹmẹ, “À nwọ chịnmẹ mịanga Tamụnọ ḍikiḅalafaḅọ ofori-ẹ, se ini ị̀ ḅaa se ị̀ ta ma ọkịḅịa.

¹²Árị kọkọ ma ị̀ mbụra-ẹ. Árị ị̀ ḍaḅe oria eremeni tọkụ-ẹ, ọkụma gbọrị nyengikẹ, se àrị á simemẹ.

¹³Anị ḅaraḅụ, Tamụnọ Ḅe ị̀ ḍaḅe oria warị ḅie ị̀ fịrịmapakụmase à gelegele ma ḅọrọ àrị sịkịḅụ, àrị á ḅẹmẹ na, ‘Ị́ ị̀ ḅerenimẹ ḅẹye mị ḍiepakụma ḅụ; wa mun la nyọ la nyọ nwọ ḅẹ, ori ị̀ mbire-ẹ.’”

¹⁴Anị Abimẹlẹk ḅe Sera ma seni Ebraham ḅe pịrịye-ẹ, anị gbọrị sịkị ọ̀ pịkịna anana na, nambulo na, pịkị omoniapụ seni ọ̀ pịrịmẹ.

¹⁵Ọ̀ nwọse Ebraham ḅe ḅẹmẹ, “Ḍiki ama mị mgba ị̀yaye-ẹ, ị́ ḅụḅẹlẹ nyọ goyegoye anga.”

¹⁶Ọ̀ nwọse Sera ma ḅẹmẹ, “Ḍiki ị́ mbire ḅe seleḅa okpokpo-a mẹndẹ oyiasi fịnjị à nwọ seni ọ̀ pịrị aḅẹ, se ị́ ḍụapakụma ị́rị́ na simeapụ mamgba tọrụkuḅu, na ị́ nemiye ofori-ẹ; ọrụ ḅọḅọ nemiḅịa na ị́ mịẹirima ye ofori-ẹ.”

¹⁷Ebraham ḅe tarọ Sera ma ḅụ pakaye mị gose, Nyanaḅọ Ḅe, ọ̀ mịẹmẹ Abimẹlẹk amanyanaḅọ odo ḅie sime eremeni mamgba gbọrịḅọ sọnị tọkụ yikẹ. Anịḅụ Ebraham ḅe ọ̀ tẹkẹ Abimẹlẹk ḅe pịrịmẹ, se Tamụnọ Ḅe ọ̀ gwọmẹ. Ọ̀ pịkị tarọ ma sọnị gwọmẹ, oria omoni eremeni ma na mịẹse ini awọ yi ḅịa ọkụ.