Read kirikeni Chukusakị 21 Bible Online

Chukusakị 21 - kirikeni bible

Chukusakị 21

¹Nyanaḅọ Ḅe Sera ma ḅẹlẹmamẹ, anị ò ḅereni á pịrị ḅaraḅụ,

²á furamẹ se gbọrị owutọkụ yi Ebraham ḅe pịrịmẹ ò ḅo olomu sịkị, Tamụnọ Ḅe ḍuko na ini ò yiḅịa nwọ ḅe sịkị mị ḅụ.

³Ebraham ḅe nwọse ọ̀ chịnmẹ Aịzịk,

⁴Aịzịk ḅe ḅo nine-a ḍin lasịkị, Ebraham ḅe ọ̀ ḅụpẹlẹmẹ, Tamụnọ Ḅe tọnsa ḅaraḅụ.

⁵Ebraham ḅe ọ̀ kụra sọnọasi lasam ini Aịzịk ḅe yisịkị.

⁶Sera ma nwọ ḅẹmẹ, “Tamụnọ Ḅe ḅieḅẹlẹ na ḍẹrị na ọ̀ nwọse ị̀ pịrịsam. Anị naaḅọ goyegoye ị̀rị̀ na ḍẹrịḅịa.”

⁷Á pịkịna nwọ ḅẹmẹ, “Tụḅọ ḍuko Ebraham ḅe pịrịḅe na Sera ma árị ndo se awọmẹnị pịrịḅịa-ẹ? Anịẹḅẹ sọnị oria olomu sịkịḅụ à gbọrị owutọkụ yi ọ̀ pịrịsam.”

⁸Tọkụ ḅe ọ̀ sẹnịmẹ, se ori ndo kụma ene Ebraham ḅe ori opu fịaye chụọsara se alalị fịmẹ.

⁹Gbọrị ene Ishmẹl anị Hega Ijipt omoni eremeniḅọ ma yi Ebraham ḅe pịrị tọkụ ḅe na Aịzịk Sera tọkụ ḅe na tiaḅẹ.

¹⁰Sera ma ini ọrị seni nwọse Ebraham ḅe ḅẹmẹ, “Mà omoniḅọ ma na árịa tọkụ ḅe na depakụma. Mà eremeniḅọ ma tọkụ ḅe ị́ya ngọma ḅie gbọrịye sọnị ọ̀ ḅara lama, anị sime ị̀ya tọkụ Aịzịk ḅe pịrịḅịa ngọma.”

¹¹Mịn ye mị anị iḅiọkụma Ebraham ḅe ḅụḅẹlẹkẹ, anịatịḅị Ishmẹl ḅe sọnị oria tọkụ-ẹ.

¹²Ọkụma Tamụnọ Ḅe nwọse Ebraham ḅe ḅẹmẹ, “Ḅụḅalaḅala nyanama, tọkụ ḅe na ị́ya omoniḅọ, Hega ma na gose. Sera ma se ị́ ḅe yegoyegoye ọkọ se anị mịẹ, anịatịḅị Aịzịk ḅe ḅụ mị à se ị́ karị awọ mamgba pakaḅoḅịaye-ẹ.

¹³À pịkịna ḅakama awọmẹnị seni omoniḅọ ma tọkụ ḅe pịrịḅịa, mịẹso sịkị ini sọnị iniḅo sẹ sọḅịa. Anịatịḅị ori sọnị ị́ya tọkụ-ẹ.”

¹⁴Jịn eneḅa dedeḅie dedeḅie Ebraham ḅe fịaye na mengi ḅie ḅein nama-apụra-akpa na seni Hega ma pịrịmẹ. Ọ̀ tọkụ ḅe se á koku kpọ seni á depakụmamẹ. Á warị mị wẹrịso se mun Biashiba piri ele mị ḅie gelegelema nwẹngịma ḅọrọmẹ.

¹⁵Mengi mị ḅo faso sịkị, á tọkụ ḅe seni gbọrị piri ḅie gbin koromamẹ

¹⁶seni kuḅu-a sọnọasi laḅịaye nwọse ọ̀ ḅụsikima mun simemẹ. Á nwọse á ḅụ ḅẹmẹ, “Àrị ineda tọrụse ị̀ya tọkụ ḅe fị mị ọrịẹkẹ.” Anịnyọ á simearịogbo anị tọkụ ḅe ọ̀ pụkọ dekichịẹma se owuye-ẹ.

¹⁷Tamụnọ Ḅe tọkụ ḅe kọn àrị owu mị naamẹ; anị Tamụnọ enjẹlḅọ soḅie ḅụ wẹrị ọkwẹịn Hega ma pịrịye-ẹ, “Cheye ị́ ḅụfụkama-ao, Hega? Ḅalafama. Tọkụ ḅe kọn àrị owu mị Tamụnọ Ḅe ọ̀ naasam.

¹⁸Sịsẹ se mun tọkụ ḅe deki se ò kuḅie kụrọma. À mịẹḅịa ò furo ḅie pakaḅoḅịa awọma opu sẹ sọḅịa.”

¹⁹Se Tamụnọ Ḅe á tọrụmgbọlụma finji seni á mengi olulu ọrịmẹ. Á sịsẹ mun mengi seni nama apụra akpa mị ḅeinma, se mengi seni tọkụ ḅe pịrị se ò ḅumẹ.

²⁰Tamụnọ Ḅe ọ̀ tọkụ ḅe ḅụ omi-ẹ, se ọ̀ sẹnị pakaḅomẹ; Peran piri ele mị ḅie ori angamẹ; se ò ḅo opuma namatẹịn ḍinḅọ sọmẹ.

²¹Nyọngọrọma Ijipt eremeni tọkụ á nwọ ḍọkị ọ̀ pịrị se ori árị na simemẹ.

²²Anịsịkị mị ḅụ, Abimẹlẹk ḅe na oria ọmụogbo tịḅịdaḅọ Fịkọl ḅe na Ebraham ḅe damamunmẹ, se nwọse ọ̀ ḅẹmẹ, “Tamụnọ Ḅe ori ị́rị́ na omi-ẹ ị́ mịẹarịye goyegoye ḅụ.

²³Anịẹrẹchị mịanga Tamụnọ Ḅe tọrụkuḅu yekarịfị ị̀ pịrị na ị̀rị̀ na ị̀ya awọma na pịkị ị̀ furo ḅie pakaḅoḅịa apụ goyegoye na, ị́ epele se wa ti ẹkẹ. Àrị iḅiọkụ ị́rị́ na angamẹ, anịgose ị́rị́ sọnị yeḅereni ị̀ pịrị na, ị́ iḅiọkụma ị̀rị̀ na pịkị mị ị́ anga àrị sẹ mị na iḅiḅara se angaḅịa.”

²⁴Ebraham ḅe nwọ ḅẹmẹ, “À ḅerenimẹ.”

²⁵Ebraham ḅe Abimẹlẹk fịrịnwẹngịapụma ọ̀ ḅara kọrị ọkị mengi olulu mị ḅẹrẹ seni Abimẹlẹk ḅe suamẹ.

²⁶Abimẹlẹk ḅe nwọ ḅẹmẹ, “Mịn ye mị mịẹḅọ à nemikẹ. Anị gbakịmaye ị́ pịkị ḍuko ị̀ pịrịkẹ, mị à pịkị tatarị anị naa àrị sịkị-ẹ.”

²⁷Se Ebraham ḅe anana na nambulo na seni Abimẹlẹk ḅe pịrịmẹ, anịḅụ ini mama apụma ḅo ḅịpịogbosọ nwọ nyanamẹ.

²⁸Ebraham ḅe oria ananama ḅie sọnọma ayamburama anana nwọ sẹlẹ pakụmaḅomẹ,

²⁹Abimẹlẹk ḅe ò gbelamẹ, “Cheye gose ị́ mịn mị mịẹ?”

³⁰Ebraham ḅe ọ̀ pẹkẹrẹmẹ, “Ma sọnọma ayamburama ananama ọkị. Ị́ àrị ọkị mị ḍiepakụmaḅịa na mengi olulu ma ị́ ḅerenisam na ị̀rị̀ anị sokumẹ.”

³¹Anịgose nyọ mịn ini anị chịnmẹ Biashiba, anịatịḅị anị nyọ mị ini mama apụma ọḅọkụ fịye-ẹ.

³²Biashiba ḅụ ini mị ọḅọkụ mị fị so sịkị, Abimẹlẹk ḅe na Fịkọl ḅe na pịkịmaso Filistia ama mị nwọ mun mẹ.

³³Ebraham ḅe Biashiba mị ḅie gbọrị tamarisk eje nwọ ḍipimẹ se anị nyọ ḅụ Nyanaḅọ, Ḍumo gbaso Tamụnọ Ḅe tẹkẹtẹkẹmẹ.

³⁴Ebraham ḅe Filistia ama mị ḅie ori anga ḅọlọsịkị lamẹ.