Read kirikeni Chukusakị 25 Bible Online

Chukusakị 25 - kirikeni bible

Chukusakị 25

¹Ebraham ḅe ọ̀ jịn eremeniḅọ simemẹ, árịa ẹrẹ anị Kẹtura.

²Á Zimran ḅe na, Jọkshan ḅe na, Midan ḅe na, Midian ḅe na, Ishbak ḅe na pịkị Shụa ḅe na nwọ yi ọ̀ pịrịmẹ.

³Jọkshan ḅe anị Shiba ḅe na Didan ḅe na ḍa-ẹ, pịkị Didan ḅe ḅụ pakaḅo apụ anị Ashurim apụma na, Letushim apụma na, pịkị Lẹọmim apụma na-ẹ.

⁴Midian awọma anị Ifa ḅe na, Ifẹ ḅe na, Henọk ḅe na, Abaịda ḅe na pịkị Elda ḅe na-ẹ. Mịnapụ mamgba anị Kẹtura ma furo ḅie pakaḅo apụ-ẹ.

⁵Ebraham ḅe ọ̀ nyanaye goyegoye ò se koroma Aịzịk ḅe pịrịmẹ;

⁶ọkụma ma ọ̀ fịka simeogbo, ò ḍiepịrịaye seni ísí ịgwa eremenima yi ọ̀ pịrị owuapụ awọma pịrịmẹ. Anịsịkị ori ísí owuapụ awọma se Aịzịk ḅe ḅụ sasama Ịrụapakapaka nyọ sime amama sẹịnmẹ.

⁷Ebraham ḅe ori olomu sọnọfa kụra esenie-a asi la se ọ̀ fịmẹ.

⁹Oria owuapụ awọma, Aịzịk ḅe na Ishmẹl ḅe na, Makpẹla pokolo mị ḅie ini ò ḍipimẹ; anị Mamre ḅụ ịrụa mị pakapaka nyọ daọrụ ele mị ḅie, anị gbọrị sịkị Zoha tọkụ Ifrọn, Hitaịḅọ ḅe nyana nyọ mị.

¹⁰Anị Ebraham ḅe Hitaị apụma ḅara fẹ ele mị-ẹ; Ebraham ḅe na tarọ Sera ma na ini inise anị nyọ ḍipimẹ.

¹¹Ebraham ḅe fịḅọrọ sịkị, Tamụnọ Ḅe oria tọkụ Aịzịk ḅe ḅẹlẹmamẹ. Anịsịkị mị ḅụ Aịzịk ḅe “Ị̀ Ọrị Ḍumoḅọ Ḅe Oria Tiḅe” ini nwọse chịn ye mị na kpekima angamẹ.

¹²Ishmẹl, anị Sera ma árịa Ijipt omoni eremeniḅọ, Hega ma yi Ebraham ḅe pịrị owutọkụ ḅe,

¹³mịna owuapụ awọma yimẹ ini ḍin se jịnḅọ jịnḅọ nẹngị ḅaraḅụ: Nebaịọt ḅe na, Kida ḅe na, Adbiẹl ḅe na, Mibsam ḅe na,

¹⁴Mishma ḅe na, Duma ḅe na, Masa ḅe na,

¹⁵Hedad ḅe na, Tima ḅe na, Jẹtu ḅe na, Nefish ḅe na, pịkị Kẹdema ḅe na.

¹⁶Ini anị oyimaịn sẹ fịnjịma ḅe opu-a ḍapụ-ẹ, inia ẹrẹ ma ini nwọse inia ịwọamama na ini anga nyọma na chịnmẹ.

¹⁷Ishmẹl ḅe tẹrẹfa kụra sọnọmasi ò ḍumo nwọ lase ọ̀ fịmẹ.

¹⁸Ishmẹl furo ḅie apụma Havila na Shọ mị na eke, anị Ijipt ḅụ ịrụapakapaka nyọ ọkịmun Asiria la ateli mị nyọ ḅụ ini angamẹ. Ebraham ḅe ḅụ pakaḅo ísíapụma ḅụ ini sikima angamẹ.

¹⁹Mị Ebraham tọkụ Aịzịk ḅe ḅụ ḅẹrẹ mị-ẹ.

²⁰Aịzịk ḅe kụra mesi ọ̀ nwọ lase mị ò Ribeka, Bẹtuẹl ḅa ma simeye-ẹ (ori anị Mẹsopotemịa ḅie ḅo Aramḅọ-ẹ) árị anị Leban ḅe nụmbụrarọ-ẹ.

²¹Ribeka ma á yikaye gose, Aịzịk ḅe ori á tịḅị gose, Nyanaḅọ Ḅe tẹkẹtẹkẹmẹ. Nyanaḅọ Ḅe pịkị oria tẹkẹ mị pẹkẹrẹse, Ribeka ma á ḅo simekọnmẹ.

²²Mama ịkpatụ awọ á nwọ yiḅịa, ma árị ini yika sịkị ḅụ ḅụlọḅie ngịsị ini ịgbanịaye nyanamẹ. Á nwọ ḅẹmẹ, “Cheye gose nwọ simeye ị̀ ḅụ paka-ao?” Anịgose á mun Nyanaḅọ Ḅe gbelamẹ, anịa pẹkẹrẹḅịpị gose.

²³Nyanaḅọ Ḅe nwọse á ḅẹmẹ, “Mama sẹ ị́ furo ḅie omi-ẹ; Ịgbanịaye nyana mama apụ ị́ nwọ yiḅịa. Gbọrịḅọ kụrọ ísíḅọ ḅe nẹngịḅịa; Sẹnịḅọ ḅe ọ̀ fịrịnwẹngị kalaḅọ ḅe pịrịḅịa.”

²⁴Á yiḅịa sịkị mị ḅola sịkị, mama ịkpatụ owuapụ awọ á nwọ yimẹ.

²⁵Tatarịḅọ ḅe oria oju pulo-pulo-pulomẹ, oria oju pịkị ịchuka-ịchuka-ịchuka opu ḅụchụaye ọkụ simemẹ, anị gose ini nwọse ọ̀ chịnmẹ Isọ.

²⁶Maịn karamaḅọ ḅe ini oyi sịkị ọ̀ gagama Isọ ḅe ḅụọ-tongu ọlọ waraḅẹ, anị gose ini nwọse ọ̀ chịnmẹ Jekọb. Aịzịk ḅe kụra tesi ọ̀ nwọ lasịkị ini ini yimẹ.

²⁷Owuapụ awọma ini sẹnị pakamẹ, Isọ ḅe namatẹịn ḅụ ori opuma ọbịrịmẹ, warị sọka ḍumo ọ̀ ḅụ ḅeinmẹ, ọkụma Jekọb ḅe ori anị dein, pịkị warị ḅie simesimeḅọ-ẹ.

²⁸Aịzịk ḅe ori Isọ ḅe ḅẹlẹmamẹ, anịatịḅị Isọ ḅe tẹịn ḅoḅo namama pẹị mị ọ̀ ḅịpịḅie ḅẹlẹḅẹlẹmẹ, ọkụma Ribeka ma Jekọb ḅe á nwọ ḅẹlẹmatẹịnmẹ.

²⁹Gbọrị ene Jekọb ḅe pulo-pulo pikiri fịye nwọ chụọ àrịogbo mị Isọ ḅe ọ̀ namatẹịn nyọḅụ ḅoye-ẹ. Fịye iḅiọkụma ọ̀ tarịmẹ

³⁰se ọ̀ nwọse Jekọb ḅe ḅẹmẹ, “Fịye ị̀ tarịḅaa aḅẹ; kele anị pulo-pulo-pulo pikiri fịye mị ḅụ yese ị̀ pịrị.” (Anị ini gose Idọm se ọ̀ chịnchịnye-ẹ.)

³¹Jekọb ḅe nwọ pẹkẹrẹmẹ, “À se ị́ pịrịḅịa ị́ nemikase ị́ya tatarị owutọkụ kiri mị se ị̀ pịrịḅịa ọkụma.”

³²Isọ ḅe nwọ ḅẹmẹ, “Anị iḅimẹ! À fị-ẹtọn aḅẹ, ị̀ya tatarị yi owutọkụ kiri mị anị che sọye mịẹ ị̀ pịrị ḅe?”

³³Jekọb ḅe nwọ pẹkẹrẹmẹ, “Tatarị yekarịfị ị̀ pịrị na, tatarị yi owutọkụ kiri mị ị́ se ị̀ pịrịḅịa.” Isọ ḅe ò yekarịfịmẹ, se sime ọ̀ pịrị ḅẹlẹma ma saḅama Jekọb ḅe pịrịmẹ.

³⁴Anịsịkị Jekọb ḅe, fịturu na pikiri fịye mị na ḅụ ye se ọ̀ pịrịmẹ. Ọ̀ fị, pịkị ḅumẹ se ọ̀ sịsẹ somẹ. Mị Isọ ḅe oria tatarị yi owutọkụ kiri mị ḍikisima ọkụ-ẹ.