Read kirikeni Chukusakị 31 Bible Online

Chukusakị 31 - kirikeni bible

Chukusakị 31

¹Jekọb ḅe ò ḅo naamẹ na Leban owuapụ awọma nwọ ḅẹaḅẹ na, “Jekọb ḅe mịna ḍaye mamgba ori ọkị sosam. Ọ̀ nyana ngọ mamgba mịna ḍaḅe nyana ngọma ḅụ ḅomẹ.”

²Ọ̀ pịkị ḍọkịḅo ọrịmẹ na Leban ḅe tatarị sịkị ori orina sime iḅi ḅara mị ọ̀ ḅarị orina nwọ simekẹ.

³Anịeso Nyanaḅọ Ḅe nwọse ọ̀ ḅẹmẹ, “Vinpịkị so ị́ya ḍapụma na ị́ya mịnapụma na ama mị mun. Àrị ị́rị́ na simeḅịa.”

⁴Anịẹrẹchị Jekọb ḅe ò Rechẹl ma na Lia ma na fịrịmamẹ ini oria ananama sime anga ḅụ mun ori na ịrịa.

⁵Ọ̀ nwọse ini ḅẹmẹ, “À ḍọkịḅo ọrịmẹ na ọ́mịna ḍaḅe ọ̀ ḅarị tatarị sịkị ị̀rị̀ na sime iḅi ḅara mị simekẹ; ọkụma ị̀ ḍaḅe Tamụnọ Ḅe, ori ị̀rị̀ na omi-ẹ.

⁶Ómine mama apụma ó nemimẹ, ị̀ya ịnyọ laḅara à nwọse fịrịnwẹngị ọ́mịna ḍaḅe pịrịsam.

⁷Anị sọnị ori inumasam pịkị ị̀ya gbẹịnye ma ḅụ oyi-a kiri lalamaye nwọse àrị ḍinmasam. Ọkụma Tamụnọ Ḅe ḅerenikẹ ò yese ị̀ lama.

⁸Leban ḅe nemikase nwọ ḅẹ na, Gwagwa oḅorima ị́ya gbẹịnye nwọ sọḅịa ḅẹḅẹ anana ogbo mamgba gwagwa awọ anị àrị yiye-ẹ. Ò nemikase ḅẹmẹ na, ‘Oju ḅala ḅọrọ oḅorima ị́ya gbẹịnye nwọ sọḅịa ḅẹḅẹ,’ anana mamgba oju ḅụ ḅala ḅọrọ awọ nwọ yimẹ.

⁹Tamụnọ Ḅe, ori ọ́mịna ḍa ananama ḅie tọn-a anana nwọ ọkịḅo ị̀ pịrịsam.

¹⁰“Àrị yiḅịa sịkị à ḍawọmẹ, na ịrọrọ ma na ḅụgbolomarị ẹkpẹịn ma arịa oju ḅala ḅọrọ mẹ, gbọgbọ mẹ, àrị pịkị gwagwa mẹ.

¹¹Tamụnọ enjẹlḅọ ḍawọju ḅụ ọkwẹịn ị̀ pịrị se nwọ ḅẹmẹ, ‘Jekọb!’ ‘Aan,’ à nwọ ḅerenimẹ.

¹²‘Ḍiki,’ ọ̀ pịkị nwọ ḅẹmẹ, ‘nwọ ịrọrọ ma na ḅụgbolomarị ẹkpẹịn mamgba arịa ḅụ ḅala ḅọrọ mẹ, gbọgbọ mẹ, pịkị gwagwa mẹ. À mịẹse anị ọkọ pakamẹ anịatịḅị Leban ḅe se ị́ mịẹaye mamgba àrị ọrịmẹ.

¹³Ị̀rị̀ anị Bẹtẹl ḅie ị̀ ḅụ se ị́ ḍie Tamụnọ Ḅe-ẹ, anịanga ḅụ ḍụparị ị́ nwọse osiḅụ koroma se oliv pulo se anịa ọgọnọ ḅụ sara, pịkị anịanga ḅụ ọḅọkụ fị ị̀ pịrịmẹ. Mịọkụ ḅụkarakarama vinpịkị so ini ị́ yi ama mị mun.’”

¹⁴Rechẹl ma na Lia ma na nwọse Jekọb ḅe pẹkẹrẹmẹ, “Mịna ḍaḅe ḅụ kọn se wa nyanaḅịa jịnye ḅarị ofori-ẹ.

¹⁵Igoniapụ ḅara ọ̀ nwọse mine na angamẹ. Ò mine dẹrịmẹ, mịna tịḅị ḅụ inise ọ̀ gbẹịn igbiki sọnị ọ̀ fịfamasam.

¹⁶Tamụnọ Ḅe mịna ḍaḅe ḅara ọkị ngọ mamgba sime mine na mịna awọma na pịrịmẹ. Tamụnọ Ḅe ḍuko ị́ pịrịye goyegoye nwọ mị-ẹ.”

¹⁷Anịgose Jekọb ḅe ori ọ̀ ḅụkarakarama se vinpịkị so Kenan ḍawu ḅe damamunmẹ. Ori oria awọma na oria erema na se ike-nambuloma ọgọnọ gbanamẹ, se ọ̀ mịẹmẹ Mẹsopotemịa ḅie ọ̀ nyanaye goyegoye na, oria nama mamgba na ọ̀ tọrọkọ pẹlẹma mun mẹ.

¹⁸

¹⁹Leban ḅe ò mun oria ananama oju ichuka kịrị-ẹmunmẹ, se ori ofori sịkịḅụ Rechẹl ma ḍawu oru ma furu se somẹ.

²⁰Jekọb ḅe ori oḅori se Leban ḅe chịn se ò soḅịa nwọḅẹye mị ḍuko ọ̀ pịrịkẹ.

²¹Ọ̀ nyanaye goyegoye ò be nwọ deki somẹ. Yufretis tọrụ mị ọ̀ nwọ saḅase tịḅị se chịngị chịngị ama Giledị mị damẹ.

²²Tẹrẹ-a ḍin ḅo ḅọrọ sịkị ini ḍuko Leban ḅe pịrịmẹ na Jekọb ḅe ọ̀ mangị sosam.

²³Ori oria tomonima ọkịse Jekọb ḅe ḍukomẹ, sọnọma ḍin na gbasịye ọ̀ nwọse ò ḍuko se mun ọ̀ lamẹ Giledị chịngị ama mị ḅie.

²⁴Anị ḍin ḍawọju Tamụnọ Ḅe nwọse Leban ḅe ḅẹmẹ, “Ọrị na ngịsị ị́ ye se Jekọb ḅe mịẹkẹ.”

²⁵Jekọb ḅe gbọrị tụndụ ọgọnọ ori oria ikowarị mị namamẹ, anịsịkị Leban ḅe na oria tomonima na chịngị chịngị ama Giledị ḅie ini inia ikowarịma pikemẹ.

²⁶Leban ḅe nwọse Jekọb ḅe ḅẹmẹ, “Cheye gose ị́ oḅori se ị̀ chịn se ọmụ ḅie ini kun apụ ọkụ nwọse ị̀ya eremeni awọma ọkị so-ao?

²⁷Cheye gose ị́ oḅori se ị̀ chịn ḍuko ị̀ pịrịka se ḅọịma mangị so-ao? Ị́ nemikase ḍuko ị̀ pịrị ọkụma, mgbọkụ ḅieḅẹlẹḅụ akwa na ọbọ na nime na à nwọse ị́ pamunsam.

²⁸Ị́ pịkị ngịsị ẹmbẹ pịrịkẹ àrị ị̀ya awọma awọma na, ị̀ya eremeni awọma na ḅịpị nọnjụ se ḅaḅa se ini ḅẹ. Anị yenemika mịẹmịẹye-ẹ!

²⁹À kụrọ nyanamẹ yese ị́ lama, ọkụma nwọ ḅọrọsa ḍin, ị́ ḍaḅe Tamụnọ Ḅe ị̀ ḅeri jinemẹ na àrị ngịsị yese ị́ mịẹma.

³⁰À nemimẹ na vinpịkị so ị́ya ama mun mị ị́ ḅụ mịẹka mịẹka ḅara nwọ simemẹ, ọkụma nde ị́ gose ị̀ furo oru ma furuye?”

³¹Jekọb ḅe nwọ pẹkẹrẹmẹ, “Ị̀ ḅalafamẹ, anịatịḅị à nwọ chịnmẹ ị́ ị̀ ḅara ị́ya eremeni awọma ọkịḅịa-etuḅo.

³²Ọkụma mịanga mịna ḅie gbọrịḅọ ḅara ị́ nemikase ị́ oru ma ọrịmẹ ḅẹḅẹ, anịḅọ mị ini nụḅọ ḅaa. Mịanga, mịna owuapụma anịa onyechịẹ, mịọkụ ị́ nyanaye goyegoye nwọ ḍọkị, se sime ị́ pịrịye nwọ ọkị.” Jekọb ḅe ò nemikẹ na Rechẹl ma Leban ḅe furo-a oru ma furusa ọkụ.

³³Leban ḅe ò mun Jekọb ikowarị mị ḅie ḍọkịmẹ; ọ̀ pịkịso mun Lia ikowarị mị ḅie ḍọkịmẹ, pịkị mama eremeni omoni awọma ikowarịma ḅie sọnị; ọkụma ò furo oru ma ori àrị ọrịkẹ. Anịsịkị re mị ò mun Rechẹl ikowarị mị ḅie sọye-ẹ.

³⁴Rechẹl ma inia furo oru ma á nwọ ọkị, àrị se ike-nambulo-ma-oju-apụra-akpa ḅie chụa se arịa ọgọnọ kpọnjị simemẹ. Leban ḅe ikowarị mị ḅie mgba ḍọkịmẹ ori àrị ọrịkẹ.

³⁵Rechẹl ma nwọse ḍawu ḅe ḅẹmẹ, “Ịganịma ị̀ nyanaḅọ, àrị ineda ị́ tọrọkọ sịsẹ chịẹkẹ; anịatịḅị àrị ị̀ya sịkị ọrị aḅẹ.” Leban ḅe ori iḅiọkụ nyọ mamgba ḍọkịmẹ ọkụma ò furo oru ma ori àrị ọrịkẹ.

³⁶Anịsịkị Jekọb ḅe ḅarị ineda ọḅụọlọka ḅụ, ịganị se nwọ gbelamẹ, “Che oloko à nwọ koro? Cheye à nwọ sima, se kụrọ se ị́ pịrị se ị́ mị ḅara se ị̀ ḍukomaḅo mịanga la?

³⁷Mịọkụ ị́ nwọ à nyanaye mamgba ḍọkị kelemasa sịkị, ị́ se warị ḅie angayema ḅụ cheye ị́ nwọ ọrị? Anị deki pakụmaḅo ị́ya tomonima na ị̀ya tomonima na tọrọkọ inisọ ọrị, se mịna ḅie karakaraye mịẹḅọ ini nwọ ḍuko.

³⁸Àrị ineda ị́rị́ na si kụra se angasam; ị́ya ananama na oḅorima na yikaye ofori-ẹ, ị́ya ananama ḅie pakaḅo gbọrị ajirima sọ à pẹịkẹ.

³⁹Piriḅie owoi-a namama arịa ḅie gbọrị wu ḅaasịkị ḅaasịkị, anị mị ị̀ ḅara ḅokẹ nwọḅẹ sọnị, ị̀rị̀ ma ngẹrị mị anịa ḅụfụka ọrịrịye-ẹ, se ḅo ị́ ḍieka ḅaraḅụ. Ị́ ḅiḅimẹ na ḍinḅụ anịkanịka enekaka ḅụ faye omimi à gbẹịn.

⁴⁰Tọn-a tọn-a sịkị, ị̀rị̀ mị enekaka mị ḅe ọfịrị mị na anịkanịka ḍin mị ḅe oḅoku mị na dadaye-ẹ. À pịkị mọnọ mọnọkẹ.

⁴¹Àrị ị́rị́ na anga si kụra mamgba anị gbọrị ḅara anị, anị sime ọkụ-ẹ. Oyi inein-a kụra fịnjị à nwọse fịrịnwẹngị ị́ pịrịmẹ ị́ya mama eremeni awọma nyanaḅoḅịa yegose—pịkị sonio-a kụra na ị́ya namama gose. Anị sọnị oyi-a sịkị na gbasịye ị́ nwọse ị̀ya gbẹịnye ma ḍinmamẹ.

⁴²Nemikase ị̀ya ḍapụ Ebraham ḅe na Aịzịk ḅe na Tamụnọ Ḅe ị̀rị̀ na ofori ọkụma, mgbọkụ papa ḅara ḅụ mị ị́ se ị̀ desinḅịaye-ẹ. Ọkụma Tamụnọ Ḅe ori ị̀ya ḅụfụka ma ọrịsam, à pịkị nwẹngị fịrịma na, anịẹrẹchị nwọ ḅọrọsa ḍin mị ḅie oria ḅẹrẹpẹlẹ ḅịpị ọ̀ pịrịsam.”

⁴³Leban ḅe Jekọb ḅe pẹkẹrẹmẹ, “Mịna eremeni awọma ị̀ya awọ-ẹ; inia awọma ini sime ị̀ pịrịmẹ, pịkị ma anana ogboma sọnị ị̀yaye-ẹ. Kọkọmaye ḍuko ḅụ mịanga ị́ ọrị aye mamgba, sime ị̀ pịrịmẹ. Ọkụma, àrị ineda mịẹse ị̀ya eremeni awọma na inia awọma na kikiḅịaye oforika sịkị,

⁴⁴à ḅụ karakaramamẹ ị́rị́ na ḅịpịogbosọ nyana. Ye wa tọn-a ḍụparị se jịnye jịnye ọgọnọ gbana mịna ḅịpịogbosọ mị se ḅiekoroma gose.”

⁴⁵Anịgose Jekọb ḅe gbọrị ḍụparị ọkị chịẹmamẹ anị se ḅiekoroma gose.

⁴⁶Ò ḍuko oria owuapụma pịrịmẹ na ini ḍụparị koḅiri se àrị se jịnye jịnye ọgọnọ gbana. Anịsịkị ini koḅiri koroma ḍụparịma angasịkị ini sime se yefị gbolomamẹ.

⁴⁷Leban ḅe nwọse anị chịnmẹ Jiga Sahaduta. (Aram ḅịpị ḅụ anị fiearịye anị ye se mịna ḅiekoromaḅịa ye,) anịsịkị Jekọb ḅe nwọse anị chịnmẹ Galịd.

⁴⁸Leban ḅe nwọse Jekọb ḅe ḅẹmẹ, “Mị wa kpokponima ḍụparịma ḅiekoromaye sọ mine mama apụma pịrịḅịa.” Anị ini gose anịju mị chịnye-ẹ Galịd.

⁴⁹Leban ḅe sọnị nwọ ḅẹmẹ, “Ye Tamụnọ Ḅe, ọ̀ tọrụmgbọlụ nwọse mịna ḅụgbana wa mịanga puaḅịa sịkị.” Anịẹrẹchị ini pịkị nwọse anịanga mị chịnmẹ Mizpa.

⁵⁰Leban ḅe pịkị pa nwọ ḅẹmẹ, “Ị́ nemikase siḅara se ị̀ya eremeni awọma na angamẹ ḅẹḅẹ, anịkanịka jịn eremeni simemẹ ḅẹḅẹ, à nemi ẹkẹ nwọḅẹsọ, se ḅiekoroma na Tamụnọ Ḅe ọ̀ wa ḍikiaḅẹ.

⁵¹Mị mine mama apụma gose à kpokponi ma chịẹma ḍụparị ma-ẹ, anị pịkị mịẹye mị se ḅiekoromaḅịa.

⁵²Nwọ kpokponima chịẹye mị na, mị ḍụparị mị na àrị yese ḅiekoromaye sọmẹ. Àrị ngịsị nwọ chịẹ ḍụparị mị saḅaḅọrọ ḅo owu se ị́ paka ẹkẹ, ị́rị́sọ pịkị anị simeọkụ-simeọkụ sọnị, anị saḅaḅọrọ anịkanịka mị mịẹye mị-se-ḅiekoroma-ḍụparị mị ḅọrọ ḅo owu se ị̀ paka ma.

⁵³Ebraham ḅe na Nehọ Tamụnọ Ḅe na mịna ogboku ḅẹrẹkọnḅọ sọḅịa.” Anịsịkị ḍawu Aịzịk ḅe tẹkẹarị Tamụnọ Ḅe ẹrẹ ḅụ, Jekọb ḅe, ọ̀ kụrọma ye karịfịmẹ; ini ḍuko saye mị koko gose.

⁵⁴Ọ̀ gbọrị nama nwọ ḅaa seni tụndụ mị ọgọnọ agbamịẹmẹ, se ọ̀ ḅụ sime owuapụma ọ̀ nwọ chịnse ini ḅo fịye mị fịmẹ. Ini fịye mị fịso sịkị, ḍin mị mgba tụndụ mị ọgọnọ ini simemẹ.

⁵⁵Anịḅe eneḅa dede ḅie Leban ḅe ori oria awọma awọma ḅịpị nọnjụmẹ se pịkị ḅaḅa nwọse oria eremeni awọma ḅẹmẹ, se ò vinpịkị so oria ama mun mẹ.