Read kirikeni Chukusakị 32 Bible Online

Chukusakị 32 - kirikeni bible

Chukusakị 32

¹Jekọb ḅe ateli mị ḅie mun-arị sịkị tọn-a enjẹlapụ ori na ịrịamẹ.

²Ori ini ọrị sịkị, ọ̀ nwọ ḅẹmẹ, “Mị anị Tamụnọ ikowarị mị-ẹ,” anị gose, ọ̀ nwọse nyọ mị chịnmẹ Mahaneim.

³Jekọb ḅe ori okunwẹngịapụ se tatarị numbireowu Isọ ḅe sẹịnmamẹ Idọm sẹ mị ḅie.

⁴Ọ̀ nwọse ini ḅẹmẹ, “Ò ḍuko Isọ ḅe pịrị, mị anị ị́ya ḅịpị poki fịrịnwẹngịḅọ Jekọb ḅe ḍuko ọkụ-ẹ na anị kụra ma ḅie ngịsị à Leban ḅe na angamẹ se ị̀ya ḅo mị se ọḅụda ọkị ḅo mịọkụ lamẹ.

⁵À tọn-a nama, yepụra asụn, anana, oḅori, pịkị omoni na nwọ nyanamẹ. Àrị oku se ị́ fịrịma aḅẹ, sẹnịḅọ, se tọrụse ḍikiaḅẹ ị́ya ḅẹlẹma nwọ nyanaḅịa ọkụ.”

⁶Okunwẹngịapụ ma vinpịkị Jekọb ḅe damaḅo sịkị, ini nwọ ḅẹmẹ, “Wa ị́ mbire Isọ ḅe damamunmẹ, ọ̀ ḅụkarakarama se nwẹngịḅo ị́rị́ na ịrịa-ẹḅo aḅẹ. Owuapụ ḅụ kịnị ẹndẹ ori na omi-ẹ.”

⁷Jekọb ḅe anị ọ̀ ḅalafama pịkị ọ̀ ḅụḅalaḅalamamẹ. Ori na simeapụma, ọ̀ nwọse mama kiri pumẹ, pịkị oria ananama na, oḅorima na, namama na pịkị ike-nambuloma na.

⁸Ọ̀ nwọ koromamẹ, “Nemikase Isọ ḅe owuse tatarị kpo mị nwọ pakamẹ ḅẹḅẹ ísí kpo mị ineda mangị soḅịa.”

⁹Anịsịkị Jekọb ḅe ọ̀ tẹkẹmẹ, “Ị̀ya opuḍaḅọ Ebraham Tamụnọ pịkị ị̀ ḍa Aịzịk Tamụnọ ị̀ naa! Nyanaḅọ, ị́ nwọse ị̀ ḅẹmẹ na à vinpịkịso ị̀ya ama mun pịkị ị̀ya mịnapụma na damamun, na ị́ mịẹse yelayelaye sarasara ị̀ pịrịḅịa.

¹⁰Ị́ se ị̀ mịẹsa iḅi mamgba na ị́ nyana ị̀ pịrị kuḅie-se-ḅụgbana iḅi mị ị̀ gbẹịnkẹ, ị̀rị̀ ị́ya fịrịnwẹngịḅọ ḅe. À se mị Jọdan mị saḅaye ofori-ẹ, ọkụma gbọrị amgbara kẹngẹ-ẹ, ọkụma mịọkụ à ma mama kpo ma na vinpịkị ḅosam.

¹¹Ị̀ ḍụa à tẹkẹmẹ mbire Isọ ḅe ḅara ḅie. Ị̀ ḅalafamẹ—ị̀ ḅalafamẹ ori owuse ḅo wa paka-ẹḅoaḅẹ, mine mgba na pịkị eremeni ma na, awọmẹnịma sọnị ḅaasinḅịa ẹrẹchị.

¹²Ḅiekoroma na ị́ ḅereni ị̀ pịrịmẹ na ị́ mịẹse yelayelaye ị̀rị̀ na lọkọlọkọ tọrọkọ munḅịa, ị́ pịkị mịẹḅịa gbọrịḅọ sọ ineda kịẹnka tomoni ị̀ ḅụ pakaḅoḅịa, tọrụ aka sime onwun ma ḅaka ọkụ ḅaka apụ.”

¹³Anị ḍin ọ̀ nwọse anịanga simemẹ, anịeso Jekọb ḅe oria namama ḅie ḍiepịrịaye sẹlẹmẹ se ḍie numbireowu Isọ ḅe pịrịḅịa ẹrẹchị: Ịrọrọ oḅori oyiasi, ẹkpẹịn si, anana oyiasi, ajirima si, ndo pịrịarị ike-nambulo na awọma na soi, nambulo-a mesi, pịkị owoi-a nambulo oyi, yepụra asụn si, pịkị oyi-a owoi yepụra asụn na ọ̀ nwọ sẹlẹmẹ.

¹⁶Ori àrị se kirikiri pumẹ, se oria fịrịnwẹngịapụma ḅie gbọrịḅọ gbọrịḅọ nwọse kirikiri ḅụ tịḅịdamẹ. Ọ̀ nwọse ini ḅẹmẹ, “Ómine ị̀ tọrọkọ pẹlẹma mun se nama kpo ma ḅụ ómine ẹmbẹ pakụma tọrọkọda kpo mị na ọḅụda kpo mị na ḅụ.”

¹⁷Ọ̀ nwọse tatarị fịrịnwẹngịḅọ ḅe ḅẹmẹ, “Mbire Isọ ḅe ị́rị́ na ịrịa se ị́ gbela na, ‘Ị́ nyanaḅọ tụḅọ? Ị́ nde anga mun-ao? Ị́ tọrọkọ sime namama tụḅọ àrị nyana?’

¹⁸Nwọ pẹkẹrẹ, ‘Ị́ya fịrịnwẹngịḅọ Jekọb ḅe oriaye-ẹ. Ò se Isọ ọ̀ nyanaḅọ ḅe sẹịnma ḍiepịrịaye-ẹ. Jekọb ḅe na mịnaḅụ na mịna ọḅụju ò ḅoaḅẹ.’”

¹⁹Mị gbọrị ḅara anị ò ḍuko maịn karamaḅọ mị na tẹrẹ karamaḅọ mị na pịkị ísí-a nama ogboma na ḅụ tịḅịdapụ mamgba pịrị ọkụ-ẹ: “Mị ó ḍuko Isọ ḅe pịrịḅịa ọkụ-ẹ, ò ḅo ómine na ịrịa sịkị.

²⁰Mị ọ́ ḅẹḅịa ḅara-ẹ, ‘Iin, ị́ya fịrịnwẹngịḅọ Jekọb ḅe ọḅụju ori omi-ẹ.’” Jekọb ḅe koroma ḅụ nwọ ḅẹmẹ; “Ma ḍiepịrịayema ḅụ anị àrị ọ̀ nyana ị̀ ḅụ pịrịḅịaye-ẹ, àrị ori na ịrịaḅịa sịkị, sosi ò siḅụ ḅarasin ị̀ pịrịḅịa.”

²¹Ò ḍiepịrịayema se ọ̀ tọrọkọ pẹlẹma sẹịnmẹ se anị ḍin mị se anịanga ikowarị mị ḅie mọnọmẹ.

²²Anị gbọrị ḍin ḅie Jekọb ḅe oria mama ya eremeni ma na mama ịgwa eremeni ma na pịkị oria oyigbọrị awọ fịnjịma na ọkị Jabọk Tọrụ mị saḅamẹ.

²³Ori inise tọrụ mị saḅama sosịkị ọ̀ pịkị ọ̀ nyanaye layelaye nwọ sẹịn saḅamamẹ,

²⁴ọkụma ori ngẹrị ọḅụda simemẹ. Anịsịkị gbọrịḅọ ḅo ori na ịmgbasọmẹ ọkịmun eneḅa kpekimẹ.

²⁵Nweniḅọ ḅe ḅo ọrịmẹ na ọ̀ mịẹọkụ mịẹọkụ ori ineda Jekọb ḅe nẹngịmakẹ nwọ ḅẹ sịkị, ò Jekọb ḅe igo ḅakụmẹ, kirikiri oria igo imgbe mị ḅọrọmẹ.

²⁶Nweniḅọ ḅe nwọ ḅẹmẹ, “Ị̀ wẹrịso à so, eneḅa kpekiaḅẹ.” “Ị́ ị̀ ḅẹlẹmaka simeogbo àrị ị́ wẹrịso ẹkẹ.” Jekọb ḅe nwọ pẹkẹrẹmẹ.

²⁷Nweniḅọ ḅe nwọse ò gbelamẹ, “Nde ị́ya ẹrẹ?” “Jekọb,” anị ọ̀ pẹkẹrẹye-ẹ.

²⁸Nweniḅọ ḅe nwọ ḅẹmẹ, “Jekọb ḅarị ị́ya ẹrẹkẹ. Anịatịḅị ị́ Tamụnọ na pịkị tomoni na ḅụ imgbe piki-a se pịkị ini nẹngịmasam; anịgose ị́ya ẹrẹ anị Izrẹl.”

²⁹Jekọb ḅe nwọ ḅẹmẹ, “Mịọkụ ị́ya ẹrẹ go ị̀ pịrị.” Ọkụma ori nwọ pẹkẹrẹmẹ, “Cheye gose ị́ ị̀ya ẹrẹ nemi ḍọkị?” Anịsịkị ò Jekọb ḅe ḅẹlẹmamẹ.

³⁰Jekọb ḅe nwọ ḅẹmẹ, “À Tamụnọ Ḅe ọrịsam, tọrụna tọrụna se à pịkị pa ḍumo waraḅẹ,” anịgose ọ̀ nwọse anịnyọ mị chịnmẹ Pẹnuẹl.

³¹Jekọb ḅe Pẹnuẹl mị koroma soarịsịkị ịrụa mị ḅịaḅẹ, ọ̀ dọdọ nwẹngịmẹ oria igo mị gose.

³²Mịmgbasọ Izrẹl furo ḅie apụ goyegoye nama konju-anda-na-ikoli-na-ịmgbe mị ḅe sịan mị ini pẹịpẹịkẹ anịatịḅị mị sịan ḅụ anị ini Jekọb ḅe ḅakụye-ẹ.