Read kirikeni Chukusakị 37 Bible Online

Chukusakị 37 - kirikeni bible

Chukusakị 37

¹Jekọb ḅe Kenan ama ḅie ori anga waraḅẹ, ḍawu ḅe igoniḅọ ḅara nwọse anga ḅọrọsa nyọ mị.

²Mịn mị anị Jekọb ḅe ò furo ḅie ḅẹrẹ-ẹ. Josẹf ḅe ḅo tẹrẹfasi kụra lasịkị, ḍawu ḅe oria ịgwa eremeni ma, Bilha ma na Zilpa ma na yi owuapụ awọma na, ori na, ananama na oḅorima na ḍikiḍikimẹ. Oria owuapụ-a mịnapụma mịẹmịẹsiaye ma ọ̀ nwọ ḍuko ḍawu ḅe pịrịpịrịmẹ.

³Jekọb ḅe ò Josẹf ḅe ḅẹlẹmatẹịn ísí oria owuapụ awọ mamgba nẹngịmẹ, anịatịḅị ò ḅo olomu sịkị mị ori ò yiye-ẹ. Ḅara nangwọ koro ḅụchụaye ọ̀ nwọ gbin ọ̀ pịrịmẹ.

⁴Oria owuapụ mịnapụma ḅo ọrịmẹ na inia ḍaḅe ò Josẹf ḅe ḅẹlẹmatẹịn ini nẹngịmẹ nwọ ḅẹsịkị, ini ḅo ò ḍikiḅụnwọnwọ so ọkụma, ini ḅarị dein pụkọ se ọkwẹịn ọ̀ pịrịkẹ.

⁵Gbọrị ḍin Josẹf ḅe ọ̀ ḍawọmẹ, ọ̀ ḍawọ mị ḍuko oria mịnapụma pịrị sịkị ini ò ḍikiḅụnwọnwọtẹịnmẹ.

⁶Ọ̀ nwọ ḅẹmẹ, “À kọn ḍawọ mị ọ́ nwọ poki.

⁷Mine mgba gbọrị ozu ḅie wa fịturu-mịẹ-ịpịamgba kpọkpọ koḅiri koromaḅẹ, anịsịkị ị̀yaye mị sịsẹ gelema chịẹmẹ. Ọ́mịnaye ma ị̀yaye mị gbori kelema se tịḅịtu ị̀yaye mị pịrịmẹ.”

⁸“Ị́ chịn ḅara ị́ amanyanaḅọ sọ se ḅẹrẹtọn wa pịrịḅe?” oria mịnapụma ọkọse ò gbelamẹ. Anịgose ini pa pịkị ò ḍikiḅụnwọnwọtẹịnmẹ, oria ḍawọma na pịkị ori iniaḅụ ḍukoḍuko ayema na gose.

⁹Anịeso Josẹf ḅe ọ̀ pịkị jịn ḍawọ kọn se ḍuko oria owuapụ mịnapụma pịrịmẹ. “À jịn ḍawọ kọnsam, anịa ḅie àrị ịrụa mị na, akalụ mị na pịkị oyigbọrị lolia fịnjị nwọ ọrịmẹ tịḅịtu ị̀ pịrị aḅẹ.”

¹⁰Ọ̀ pịkị ḍawọ mị ḍuko ḍawu ḅe pịrịmẹ, se ḍawu ḅe ò ḍiki ịganịmẹ, “Mị che ḍawọ? Ị́ chịn ḅara ọkụma ị́ nyengima na ị́ya owuapụ mịnapụma na pịkị ị̀rị̀ na ḅo tịḅịtu ị́ pịrịḅe?”

¹¹Josẹf ḅe oria owuapụ mịnapụma ini ò ḍiki pụkọ solimẹ, ọkụma ḍawu ḅe ọ̀ pa ḍuko ayema ḅụ koroma kọn aḅẹ.

¹²Gbọrị ene Josẹf ḅe oria owuapụ mịnapụma Shẹkẹm mun inia ḍa ananama ḍikiḍiki-emunmẹ.

¹³Anị Jekọb ḅe nwọse Josẹf ḅe ḅẹmẹ, “À ḅimẹ ị́ Shẹkẹm mun, ị́ya owuapụ mịnapụma sime ananama ḍikiḍiki àrị nyọ mị.” Josẹf ḅe nwọ pẹkẹrẹmẹ, “À ḅụkarakarama waraḅẹ.”

¹⁴Ḍawu ḅe nwọ ḅẹmẹ, “Mun ḍiki nwọfa ị́ya owuapụ mịnapụma inia ḅụ dein na deinka na, pịkị ananama sọnị arịa ḅụ sime ọkụ na; se pịkịma ḅo ḍuko ị̀ pịrị.” Anị ḍawu ḅe Hibrọn Pẹsịkiri mị ḅieḅụ ọ̀ fịrịma pakụmaye-ẹ. Josẹf ḅe ò ḅo Shẹkẹm lamẹ

¹⁵se ori ama mị ḅie iri nwẹngịma ḅọrọarịogbo, gbọrịḅọ ori ọrị se ò gbelamẹ, “Ị́ che ḍọkị-ao?”

¹⁶“Ị̀ya mịnapụma à nwọ ḍọkịaḅẹ, inia ananama ḍikiḍikiarị apụma,” ọ̀ nwọ pẹkẹrẹmẹ. “Ini sime anga ị́ ineda ḍuko ị̀ pịrịḅe?”

¹⁷Nweniḅọ ḅe nwọ ḅẹmẹ, “Ini sosam. Ini ḍukose à naamẹ na ini Dotan mun aḅẹ.” Anị Josẹf ḅe oria mịnapụma ḍọkị nweni mun Dotan ḅie ini ọrịye-ẹ.

¹⁸Sasaju ini ori ọrịmẹ, ma ò mun ini laka simeogbo, ini ḅẹrẹḅia ọ̀ pịrịmẹ na ini ọ̀ ḅaaḅịa.

¹⁹Ini nwọse jụmḅọ jụmḅọ ḅẹmẹ, “Ḍawọ ḍawọḅọ ḅe ò ḅo aḅẹ.

²⁰Ó ḅo wa ọ̀ ḅaa, se oria oju mị se gbọrị samịna olulu ḅie gbin. Wa ineda ḅẹḅịa na gbọrị owoi nama ọ̀ ḅaamẹ. Anịsịkị oria ḍawọ ma ḅo mịẹḅịa ọkụ wa nwọ ḍikiḅịa.”

²¹Rubẹnị ḅe ini ḍukoarịye mị naa se ḅụkụrọma Josẹf ḅe ḍụapakụma ḅimẹ. “Ye wa ọ̀ ḅaama,” ọ̀ nwọ ḅẹmẹ.

²²“Ọ́ papa ò se mị onwun ele ḅie sime olulu mị ḅie gbin, ọkụma ó ye se ọ̀ lamama.” Ọ̀ mịn mị ḍukomẹ pa inia ḅara ḅie ọ̀ pọkọḅo se ò seni ḍawu ḅe fịrịmaḅịaye gose.

²³Josẹf ḅe mun oria mịnapụma lasịkị, ini oria ḅarama nangwọ koro opu ḅụchụaye mị sinmẹ ọ̀ ḅụ.

²⁴Anịsịkị ini ori ọkị se ò seni mengi ḅie oforika samịna olulu ḅie gbinmẹ.

²⁵Ini yefịarịogbo, ini bẹkẹma ḅaraḅụ Giledị ḅieḅụ so Ijipt mun-arị Ishmẹl apụ ogbo nwọ ọrịmẹ. Inia ike-nambuloma ọgọnọ kịrịkịrị olo kụnụmaye ḅaka waraḅẹ.

²⁶Juda ḅe nwọse oria mịnapụma ḅẹmẹ, “Che sọye wa nwọ nyanaḅe wa niniḅụ mịna numbireowu ḅe ḅaamẹ nwọḅẹye mị ḅọị ọkụma?

²⁷Ó ye wa ò se mịna Ishmẹl apụma dẹrị. Anịọkụma wa yese ọ̀ lama ẹkẹ anịatịḅị ori mịna mịnaḅọ-ẹ, mịna oju, pịkị mịna pulo-ẹ.” Oria mịnapụma ini ḅerenimẹ,

²⁸anịeso Midia tuḅoni ḅo ini lasịkị, oria mịnapụma olulu mị ḅie Josẹf ḅe jine pakụmaḅo se ò se Ishmẹl apụma dẹrịmẹ, seleḅa si okpokpo, se ini ò se so Ijipt mun mẹ.

²⁹Rubẹnị ḅe pịkịma ḅo se ḅarị olulu ḅie Josẹf ḅe ọrịka sịkị, kururu ḅụ ori ọ̀ ḅụ ḅụchụayema kanmẹ.

³⁰Ọ̀ pịkịna oria mịnapụma damamun se nwọ ḅẹmẹ, “Tọkụ ḅe anịanga ọ̀ ḅarị ofori-ẹ! Nde mịọkụ à mịẹḅịa ọkụ?”

³¹Se ini gbọrị oḅori ḅaamẹ, se Josẹf ḅụchụaye mị se oḅori ḅe pulo mị ḅie kpelekimẹ.

³²Ini ḅụchụaye mị ọkị inia ḍaḅe damamun se nwọ ḅẹmẹ, “Wa mịn mị ọrịmẹ, ị́ya tọkụ ḅe ye mị anịka?”

³³Ori anị nemi se nwọ ḅẹmẹ, “Iin, oria ye-ẹ! Si nama ọ̀ ḅaasam. Ị̀ya tọkụ Josẹf ḅe àrị ọkọsimasam!”

³⁴Jekọb ḅe kururuḅụ ori ọ̀ ḅụ sime ḅụchụayema kanmẹ se ḍụẹịn ḍin ḅụ ò kururu ḅiriaye ḅirimẹ. Ḅọlọsịkị ọ̀ nwọse oria tọkụ ḅe ḍinmẹ.

³⁵Oria owuapụ awọ mamgba na eremeni awọma na ḅo ò kuḅie kụrọmamẹ, ọkụma ò ḅerenikẹ, se ọ̀ nwọ ḅẹmẹ, “Ị̀ya tọkụ ḅe ḍin ḅụ mị à sime mun fịapụ tomonikiri mị ḅie sọḅịaye-ẹ.” Anịẹrẹchị oria tọkụ Josẹf ḅe ọ̀ pa nwọ ḍin ma mun mẹ.

³⁶Anị gbọrị sịkị, Ijipt ḅie, Midiapụ ma Josẹf ḅe se Pọtifa ḅe dẹrịmẹ, anị amanyanaḅọ ḅe fịrịnwẹngịapụma ḅụ gbọrịḅọ, ori anị amanyanaḅọ ḅe warị ḅie sime ọmụogbo mị tịḅịnịḅọ ḅe-ẹ.