Read kirikeni Chukusakị 38 Bible Online

Chukusakị 38 - kirikeni bible

Chukusakị 38

¹Jekọb ḅe ọ̀ pa oria tọkụ ḅe ḍụẹịn ḍin àrị sịkị mị ḅụ, anị Juda ḅe ori oria mịnapụma wẹrịso se mun Adulam ḅie Hira nwọ chịn gbọrị owuḅọ na angamẹ.

²Anịanga Juda ḅe gbọrị Kenan eremeni tọkụ na ịrịa se á simemẹ. Ḍawu ḅe ini nwọse ọ̀ chịnmẹ Shụa,

³se gbọrị owutọkụ á nwọ yi ọ̀ pịrịmẹ, ọ̀ nwọse ọ̀ chịnmẹ, Ẹr.

⁴Á pịkị ḅo jịn simekọnmẹ, se jịn owutọkụ yimẹ, ini nwọse ọ̀ chịnmẹ, Onan.

⁵Á pịkị jịn owutọkụ nwọ yimẹ, ini nwọse ọ̀ chịnmẹ Shẹla. Juda ḅe Akzib ḅie ori omi-ẹ ini tọkụ ḅe yisịkị.

⁶Juda ḅe Tema ma sime oria tarịtọkụ Ẹr ḅe pịrịmẹ.

⁷Ẹr ḅe ò simịẹmịẹye nyanamẹ, anị Nyanaḅọ Ḅe ḅieḅumamẹ, anịgose Nyanaḅọ Ḅe ọ̀ ḅaamẹ.

⁸Anịsịkị Juda ḅe nwọse numbireowu Onan ḅe ḅẹmẹ, “Mun ị́ mbire ḅe ta ma na gboloma, dewu numbireowu ḅaraḅụ, anị mịẹka mịẹka ḅaraḅụ ị́ mịẹ á pịrịḅịaye-ẹ, mịẹso sịkị ị́ mbire ḅe furoḅie awọ pakaḅoḅịa ọkụ.”

⁹Ọkụma Onan ḅe ò nemimẹ na pakaḅoḅịa awọmẹnịma oria yeka yegose, ò numbireowu fịsaḅọ ḅe ta ma na gboloma sịkị layelaye, ọ̀ ḅụ pakaḅo mengi ma ọ̀ nwọse kirisara saramẹ, mịẹse numbireowu ḅe awọ nyana ẹkaye gose.

¹⁰Ọ̀ mịẹye mị Nyanaḅọ Ḅe ḅieḅumamẹ, anịẹrẹchị Nyanaḅọ Ḅe pịkị ọ̀ ḅaamẹ.

¹¹Juda ḅe nwọse yayo ta Tema ma ḅẹmẹ, “So ị́ ḍa warị mun deḅọ fịsaḅọ ḅaraḅụ sime nweni ị̀ya tọkụ Shẹla ḅe sẹnịpakaḅo sịkị la.” Ọ̀ mị ḅarase á ḅẹmẹ, anịatịḅị ọ̀ ḅalafamẹ nwọfa Shẹla ḅe sọnị fịḅịa-etuḅo, anị oria mịnapụma fịọkụ. Anịẹrẹchị Tema ma á pịkịmaso ḍawu warị mun mẹ.

¹²Sịkị ḅo ḅọrọ sịkị Juda ta ma á fịmẹ. Arịa ḍụẹịn ọ̀ nwọ ḍin so sịkị, ori na oria ikiaowu Hira Adulamḅọ ḅe na so Timna mun mẹ, ini oria ananama ichuka ma kịrị àrị nyọ mị.

¹³Gbọrịḅọ ḍuko Tema ma pịrịmẹ na dewu ḅe ḍaḅe oria ananama ichuka ma kịrịḅịaye gose ò Timna mun aḅẹ.

¹⁴Anịgose á chụa dewu ḅe ḍin ḅụchụayema, á nwọ ḍinmamẹ se ḅịtẹ se á tọrụ gbẹịn se mun Ẹneim ḅụ ḅọrọ mun Timna mị laḅịa ama ateli ḅọkọ ḅụ kpọnjị simemẹ. Árị iḅiọkụma nemimẹ na Juda awọma ḅie kalaḅọ Shẹla ḅe mịọkụ ọ̀ sẹnịḅo ogu lasam, anị sọnị ini á se ọ̀ pịrịse ori árị na simekẹ.

¹⁵Juda ḅe ori árị ọrị sịkị, ọ̀ nwọ chịnmẹ na árị sẹfị eremeniḅọ-ẹ, anịatịḅị á yese á tọrụ gbẹịnmẹ.

¹⁶Ori ateli mị saḅa á damamun se nwọse á ḅẹmẹ, “Iḅimẹ, ndaye ị́ nwọ ọkịḅe?” (Ò nemikẹ na yayo ta ma árị ọkụ.) Á nwọ ḅẹmẹ, “Cheye ị́ nwọse ị̀ pịrịḅe?”

¹⁷Ọ̀ nwọ pẹkẹrẹmẹ, “Àrị ayamburama oḅori se ị́ sẹịnmaḅịa ị̀ya namama ḅie.” Á nwọ ḅẹmẹ, “Iḅimẹ, ị́ nemikase onyechịẹma ḅaraḅụ, ye se ị̀ pịrị se àrị ọlọḅịa se oḅori ḅe ḅoḅịa sịkị la ọkụma.”

¹⁸“Cheye à nwọse onyechịẹma ḅaraḅụ ị́ pịrịḅe?” ọ̀ nwọ gbelamẹ. Á pẹkẹrẹmẹ, “Ị́ya pụkọchụaye mị na anịa ḍiki mịna, pịkị ị́ ọlọ amgbara mị na.” Ori àrị se á pịrịmẹ. Anị iniḅo ḅụgbolomaye-ẹ, se á ḅo simekọnmẹ.

¹⁹Tema ma so warị munse á se á tọrụ gbẹịnye mị sinmẹ, se kpoto árịa ḍụẹịn ḍin ayema chụamẹ.

²⁰Juda ḅe, ori oḅori ḅe se oria ikiaowu Hira ḅe pịrịmẹ ò se mun eremeniḅọ ma pịrị se ò se á ḅara chụaye ma pẹkẹrẹ ḅo, ọkụma Hira ḅe ori árị ọrịkẹ.

²¹Ẹneim ḅie sime da owuapụ ọ̀ nwọ gbelamẹ, “Nde mịanga ateli anga sime sẹfị eremeniḅọ ma?” “Jenejene sẹfị eremeniḅọ ma mịanga simekẹ,” ini nwọ pẹkẹrẹmẹ.

²²Ò vinpịkị Juda ḅe damamun se nwọ ḅẹmẹ, “Àrị ineda á ḍọkịḅokẹ. Anịanga sime owuapụma nwọ ḅẹmẹ na jenejene sẹfị eremeniḅọ ma anịanga ḅụ simekẹ.”

²³Juda ḅe nwọ ḅẹmẹ, “Á yema se wẹrịge. Wa ḅi ẹkẹ nweni wa ḍẹrị. À ḅụkụrọma ye se á gbẹịn ḍọkịmẹ, ọkụma ị́ ineda á ḍọkịḅoka sịkị.”

²⁴Tẹrẹ-a akalụ pembemaye ḅo ḅọrọ sịkị, gbọrịḅọ ḅo ḍuko Juda ḅe pịrịmẹ, “Ị́ya tọkụ ḅe tarọ Tema ma á sẹfị nwẹngị kọnse mịọkụ ḅo simekọnsam.” Juda ḅe ọ̀ kụrọ pịrịmẹ, “Árị ọkịpakụmaḅo se á dọkịma ḅaa.”

²⁵Ini árị ọkịpakụmaḅo àrị sịkị, árị oku se dewu ḍa ḅe fịrịmamẹ: “Mayema nyanaḅọ, mị ị̀ ḅụ sime mị pakụmaye-ẹ. Àrị ḍiki se àrị nyanaḅọ nwọ lekiri—mị pụkọchụaye mị na anịa ḍiki mị na, amgbara mị na.”

²⁶Juda ḅe ori àrị lekiri se nwọ ḅẹmẹ, “Á karakara ḅọkọḅụ omi-ẹ. À ḅereni á pịrịye mị à mịẹkẹ—mgbọkụ àrị á se ị̀ya tọkụ Shẹla ḅe pịrị se ori á simesam.” Juda ḅe, ọ̀ ḅarị ngịsị árị na gbolomakẹ.

²⁷Arịa yi ḅo lasịkị, ini ḍọkịḅo ọrịmẹ na mama awọ mị á yiḅịaye-ẹ.

²⁸Á jike àrị sịkị, gbọrịḅọ nụḅọ ḅara pakụmamẹ; ịrịa maịn ma ḅọ ma anị ọlọ se pulo-pulo iri se anị kpọ se nwọ ḅẹmẹ, “Mị tarịtarị tọkụ mị-ẹ.”

²⁹Ọkụma ori ọ̀ ḅara jine ḅie chu se ini tarị numbireowu ḅe yimẹ. Anịsịkị ịrịa maịn ma ḅọ ma nwọ ḅẹmẹ, “Sembe mị ḅara mị ị́ ḅụ ị́ nwọ pakụma ọkụ-ẹ!” Anịgose ini nwọse ọ̀ chịnmẹ Pẹrẹz.

³⁰Anịsịkị numbireowu ḅe pulo-pulo iri mị ọ̀ ḅara kpọ ḅụ ini ò yimẹ, ini nwọse ọ̀ chịnmẹ Zira.