Read kirikeni Chukusakị 39 Bible Online

Chukusakị 39 - kirikeni bible

Chukusakị 39

¹Mịọkụ Ishmẹl apụma ini Josẹf ḅe se Ijipt mun se ò se Pọtifa ḅe dẹrịmẹ, amanyanaḅọ warị koruapụma ḅie tịḅịnịḅọ ḅe.

²Nyanaḅọ Ḅe ò Josẹf ḅe na omi-ẹ, pịkị mịẹse ọ̀ tọrọkọ mun mẹ. Ijipt ama mị ḅie ọ̀ nyanaḅọ ḅe warị ḅie ori angamẹ,

³ọ̀ nyanaḅọ ḅe ori ọrịmẹ na Nyanaḅọ Ḅe ò Josẹf ḅe na omi-ẹ, pịkị ọ̀ ḅara se lamaye layelaye mịẹse anị lolomẹ.

⁴Pọtifa ḅe oria mịẹye ọ̀ ḅụḅẹlẹmẹ, se pịkị ò se ò ḅiekoruḅọ nwọ mịẹmẹ; anịẹrẹchị oria warị mị na ọ̀ nyanaye layelaye ḅụ ori ò se tịḅịnịḅọ mịẹmẹ.

⁵Anịsịkị ọkị tọrọkọ mun, Josẹf ḅe gose Nyanaḅọ Ḅe Ijiptḅọ ḅe warị mgba na, warịḅie na, pịkị oria ozuma ḅie na, ọ̀ nyanaye layelaye nwọ ḅẹlẹmamẹ.

⁶Pọtifa ḅe ọ̀ nyanaye layelaye ọ̀ nwọ saḅama Josẹf ḅe pịrịmẹ na ò ḍikiḍiki, anịgose ò gbọrịye sọ kpekimakẹ, ọ̀ fịḅịa fịye sikima. Josẹf ḅe ori mgba ọ̀ karamakaramamẹ, ọ̀ pịkị ḍikitọrụgbẹịnmẹ,

⁷sịkị kele ḅọrọ sịkị, Josẹf ḅe ọ̀ nyanaḅọ ḅe ta ma árị ò ḅimẹ ori árị na ḅọlọlọ mọnọye ọgọnọ mọnọ.

⁸Ò ḅerenikẹ se ọ̀ nwọse á ḅẹmẹ, “Ḍiki, ị̀ nyanaḅọ ḅe, warị ḅie simeye goyegoye ọ̀ ḅarị tọrụ se ḍikikẹ, anịatịḅị àrị omi-ẹ gose. Ọ̀ nyanaye layelaye ọ̀ nwọse ị̀ ḅarachụasam.

⁹Warị ḅie ọ̀ nyana kụrọ layelaye mị ị̀rị̀sọ nyanaye-ẹ, ò se ị̀ ḅọịmaye ofori-ẹ ị́rị́ sikima. Anịọkụma nde àrị ị́rị́ na nwọ sime ḅụsininimaye nwọ mịẹse Tamụnọ Ḅe ḅụ si ḅọ sọḅịa ọkụ?”

¹⁰Ene ḅa ene ḅa ene, árị ọ̀ ḅụfụkamaḅẹ nwọḅẹ sọ, ori árị na gboloma ḍụkụkẹ.

¹¹Ọkụma gbọrị ene, fịrịnwẹngịapụma ḅụ gbọrịḅọ sọ ofori sịkị ḅụ, Josẹf ḅe ò mun oria fịrịnwẹngịarịogbo.

¹²Árị oria koroḅụchụaye mị ọlọ se ọ̀ ḅẹmẹ, “Ḅo ị̀rị̀ na ḅọlọlọ.” Ọkụma ọ̀ mangị nụngọ pakamẹ, oria koroḅụchụaye mị á ḅara ḅie nwọ wẹrị so ḅụ.

¹³Á ḅo ọrịmẹ na oria ḅụchụaye mị ọ̀ ḅarasin se mangị nụngọ pakamẹ nwọ ḅẹsịkị,

¹⁴árị árịa fịrịnwẹngịapụma chịnse nwọ ḅẹmẹ, “Ọ́ mịn mị ḍiki! Ị̀ de ḅe ọkị mị warị ḅo Hibruḅọ ḅe ọ̀ wa wọlọ aḅẹ. Ori ị̀ya jukuru ḅie sọḅo se kụrọḅara se ị̀rị̀ na gboloma-ẹtọnmẹ, ọkụma àrị ị̀ya ịnyọ laḅara nwọse olokumẹ.

¹⁵Àrị oloku ọkụ ọ̀ nwọ ọrị sịkị, ọ̀ mangị nụngọ pakamẹ, oria koroḅụchụaye mị wẹrịso ị̀ya anga sịkị koromamẹ.”

¹⁶Á ḅụchụaye mị se wẹrị Josẹf ḅe ọ̀ nyanaḅọ ḅe warịḅo sịkị lamẹ.

¹⁷Anị á ḅo anị gbọrị ḅẹrẹ mị ḍuko ọ̀ pịrịye-ẹ. “Ḅe ị́ ọkịḅo Hibru omoniḅọ ḅe ị̀ya jukuru ḅie sọḅo se ị̀ wọlọmẹ.

¹⁸Ọkụma àrị oloku sịkị ọ̀ mangị nụngọ pakamẹ oria koroḅụchụaye mị wẹrịso ị̀ya anga sịkị koromamẹ.”

¹⁹Josẹf ḅe ọ̀ nyanaḅọ ḅe anị opuma oḅuosọmẹ

²⁰ọ̀ mịẹse ini Josẹf ḅe kun se ò seni amanyanaḅọ ḅe ikoliapụma ikoliwarị ḅie koromamẹ, anịanga anị ò simeye-ẹ.

²¹Ọkụma Nyanaḅọ Ḅe ò Josẹf ḅe na omi-ẹ, ọ̀ pịkị ọ̀ ḅẹlẹmamẹ, anịgose ikoliapụma ḍikiḍikiarịḅọ ḅe ori ọ̀ tarịmẹ.

²²Ò Josẹf ḅe se ísí ikoliapụ mamgba ḅụ tịḅịnịḅọ nwọ mịẹmẹ, pịkị mịẹse ikoliwarị ḅie mịẹye layelaye Josẹf ḅe tọrụ se anịaḅụ wẹrịmẹ.

²³Ikoliwarị ḍikiḍikiarịḅọ ḅe Josẹf ḅe mịẹye layelaye ò ḍikiḍikikẹ anịatịḅị Nyanaḅọ Ḅe ò Josẹf ḅe na omi-ẹ, ọ̀ pịkị mịẹse ọ̀ mịẹye layelaye ori na iḅimẹ.