Read kirikeni Chukusakị 43 Bible Online

Chukusakị 43 - kirikeni bible

Chukusakị 43

¹Ḅuruḅa mị Kenan ḅie anị gbọtụma sitẹịnmẹ,

²Jekọb furo mị Ijipt ini fẹ ịpịamgba ma nwọ fịso sịkị, Jekọb ḅe nwọse oria owuapụ awọma ḅẹmẹ, “Ọ́ pịkị mun fịaye kalaye fẹḅo wa pịrị.”

³Juda ḅe nwọse ọ̀ ḅẹmẹ, “Nweniḅọ ḅe ọ̀ kụrọma mịna ḅerijinemẹ na ini ngịsị mine ọkị oria odo ḅie chuma wa mịna numbireowu ḅe na mun sikima.

⁴Ị́ mịna numbireowu ḅe se mịna ḅụ chụamẹ ḅẹḅẹ anị wa mun fịaye fẹḅo ị́ pịrịḅịa.

⁵Ị́ ḅerenikẹ ḅẹḅẹ wa mun ẹkẹ, anịatịḅị nweniḅọ ḅe ò ḍuko wa pịrịmẹ na ini ḅerenise wa oria odo ḅie sọma, wa mịna numbireowu ḅe na mun sikima ọkụma.”

⁶Jekọb ḅe nwọ ḅẹmẹ, “Cheye gose ọ́ nwọse ḅụfụka se ị̀ pịrị-ao, anị ó ḍuko nweniḅọ ḅe pịrịmẹ na ó jịn owuḅọ mịnaḅọ nyanamẹ ḅẹye mị?”

⁷Ini pẹkẹrẹse nwọ ḅẹmẹ, “Nweniḅọ ḅe mine na mịna furo mị na gbolomaye imbikia imbikia ma nwọ gbela ḅaramị-ẹ, ‘Ọ́mịna ḍaḅe ò ḍumo wara-ao? Ó jịn owuḅọ mịnaḅọ nyanaka?’ Ọ̀ wa gbelaye ma wa nwọ pẹkẹrẹmẹ. Nde wa nemiḅịa ọkụ na ọ̀ wa ḅẹḅịa na wa mịna numbireowu ḅe se ḅo-ẹ?”

⁸Juda ḅe nwọse ḍawu ḅe ḅẹmẹ, “Tọkụ ḅe ò se ị̀ ḅarachụa wa pịkị kirikiri munḅịa. Anịsịkị mịna ḅie gbọrịḅọ sọ ḅuruḅaa ḅie sime fịẹkẹ.

⁹Àrị ị̀ya ḍumo mị se onyechịẹmaḅịa, ị̀ya ọlọ à nemika kpụrụkpụrụ ḅaraḅụ ò se ḅo ị́ pịrịkẹ ḅẹḅẹ, ḅẹrẹḅarasi mị mgba ị̀ya ọgọnọ gbana gbasoḅịa.

¹⁰Wa nemikase mị ḅara se koru ḅọlọka ọkụma, wa ineda mama sịkị se mun se ḅosam.”

¹¹Inia ḍaḅe anịsịkị nwọse ini ḅẹmẹ, “Anị ḅọrọ ọkọpakaḅịa ḅẹḅẹ, ama mị ḅie pakaḅo iḅitẹịn chịnmgbọlụma ọ́ nwọ ọkịse ọ́mịna akpa ma ḅie chụa, se ḍiepịrịye ḅaraḅụ se mun gọvịna ḅe pịrị: resin kalaye na, ḅẹịn kalaye na, kịrịkịrị olo kụnụmaye na, tutumbimgbọlụ na, pịkị ịmụnụ na ọ́ nwọse chụa.

¹²Ó se ye fẹḅịa igbiki mị ḅe mama kiri ọ́ nwọ deki, anịatịḅị ọ́mịna akpa ma ḅie ini se chụa igbiki ma ó se chụa mun. Sosi ye irimamẹ.

¹³Ị́ mbire ḅe ọkị, se kirikiri vinpịkị ḅo.

¹⁴Ye Kụrọmamgba Nyana Tamụnọ Ḅe mịẹse nweniḅọ ḅe ḍikitịḅịfoin nyana ọ́ pịrị, se ọ̀ Bẹnjamin ḅe na ọ́mịna ísí mịnaḅọ ḅe ḅụ ḅarasin ọ́ pịrịḅịa ḅara. Ị̀rị̀ kẹngẹ ọkụma, àrị ị̀ya awọma fama-ẹ ḅẹḅẹ àrị ini famaḅịa.”

¹⁵Anịẹrẹchị mịnapụma, ḍiepịrịayema na pịkị igbiki ḅụ mama kiri nwọ ọkịmẹ, se Bẹnjamin ḅe na Ijipt mun mẹ. Anịnyọ ini iniaḅụ se Josẹf ḅe ḍiemẹ.

¹⁶Josẹf ḅe ọ̀ Bẹnjamin ḅe na ini na nwọ ọrị sịkị, ọ̀ nwọse oria warị koru tịḅịda fịrịnwẹngịḅọ ḅẹ ḅẹmẹ, “Mịnapụ ma ọkị ị̀ya warị mun. Ene ogboin ḅiri ini ị̀rị̀ na yefịḅịa, anịgose ọ́ nama ḅaa se anị tẹlịma koroma.”

¹⁷Fịrịnwẹngịḅọ ḅe ori ọ̀ ḅe ḅara ọ̀ nwọ mịẹmẹ, se ọ̀ mịnapụma ọkị Josẹf ḅe warị mun mẹ.

¹⁸Ini ini ọkị warị mun-arị sịkị inia ḅalafamẹ, se ini pịkị koromamẹ, “Ini mine ọkị mịanga ḅosam anị tatarị sịkị, mịna akpa ma ḅie ini pịkị wa pịrị igbiki ma gose-ẹ. Ini bẹkẹma ḅaraḅụ owu se wa paka se mịna yepụra asụnma ọkị se wa seni oria omoniapụ mịẹḅịa.”

¹⁹Anịgose, ini mun warị mị ḅọkọ lasịkị, ini nwọse warị ḍikiḍikiarị fịrịnwẹngịḅọ ḅe ḅẹmẹ,

²⁰“Sisi, ị́ ḅereniḅịa ọkụma, sẹnịḅọ, gbọrị sịkị wa mịanga ḅo fịaye fẹ-eḅomẹ.

²¹Wa so warị mun-arị sịkị wa gbọrị nyọ la se ịnyọ saramẹ, wa mịna akpa ma finji sịkị, ḅọḅọ nụḅọ akpa ḅie mịna igbiki ọrịmẹ—anịmgba. Wa se ḅo ọ́ pịrị-ẹḅomẹ.

²²Wa pịkị jịn igbiki se ḅomẹ se jịn fịaye fẹḅịa ọkụ. Wa nemikẹ mịna igbiki ma pịkịḅo mịna akpa ma ḅie chụaḅọ mị.”

²³Fịrịnwẹngịḅọ ḅe nwọ ḅẹmẹ, “Ọ́ ḅụḅalaḅala nyana ma. Ọ́ ḅalafama. Ọ́mịna Tamụnọ Ḅe, ọ́mịna ḍa Tamụnọ Ḅe, ma igbiki ma se ọ́mịna akpa ma ḅie chụa ọ́ pịrịka soẹkẹ. Ọ́ gbẹịn igbiki mị àrị ọkịmẹ.” Anịeso ò Simiọnị ḅe ọkịḅo ini pịrịmẹ.

²⁴Fịrịnwẹngịḅọ ḅe mịnapụma ọkịmun warị ḅie chumẹ. Ò mengi se ini pịrịmẹ ini se inia ḅụọma sịkịrịḅịa ẹrẹchị, ọ̀ pịkị fịye se inia yepụra asụnma pịrịmẹ.

²⁵Ini inia ḍiepịrịayema karakaramamẹ se Josẹf ḅe pịrịḅịa ẹrẹchị eneogboin ḅiri ò ḅoḅịa sịkị, anịatịḅị ini naasam na ini ori na yefịḅịa.

²⁶Josẹf ḅe ò ḅo warị lasịkị, ini ḍiepịrịayema ọkị warị ḅie mun ọ̀ pịrịmẹ se ọ̀ tọrọkọ inia tọrụma se kiri iḅomẹ.

²⁷Iniaḅụ sime ọkụ ọ̀ nwọse ini gbela so sịkị ọ̀ nwọ ḅẹmẹ, “Ọ́mịna ḍa olomuḅọ ḅe ḅẹrẹ ọ́ nwọ ḍuko ị̀ pịrịmẹ—nde ọ̀ ḅụ sime ọkụ? Ọ̀ pa ḍumo wara-ao, pịkị ọ̀ ḅụ dein wara-ao?”

²⁸Ini nwọ pẹkẹrẹmẹ, “Ị́ya ḅụsekiripịrị fịrịnwẹngịḅọ mịna ḍaḅe ọ̀ pa ḍumo waraḅẹ, ọ̀ ḅụ pịkị deinmẹ.” Ini kpẹrẹkị se ọ̀ tọrọkọ inia tịḅịma tumẹ.

²⁹Josẹf ḅe ò numbireowu Bẹnjamin ḅe ọrị sịkị, ọ̀ nwọ ḅẹmẹ, “Anị ḅe ọ́mịna numbireowu kalaḅọ ḅe-ẹ, ọ̀ ḅụ ḅẹrẹ ọ́ nwọ ḍuko ị̀ pịrịḅọ ḅe. Tamụnọ Ḅe ị́ ḅẹlẹma, ị̀ya tọkụ.”

³⁰Josẹf ḅe ò gbereka ma sịsẹ somẹ, anịatịḅị ori opuma numbireowu ḅe ḅẹlẹmamẹ. Ori owu-ẹtọnmẹ, anị ò mun oria ḅie sọse owuye-ẹ.

³¹Ori ọ̀ tọrụ sịkịrị sosịkị, ọ̀ pakaḅomẹ, ori ọ̀ ḅụ ọlọ se tọn ini pịrịmẹ na ini fịayema pakụmaḅo se àrị ḍie.

³²Josẹf ḅe ori ngẹrị dẹbụl-ẹ, anịsịkị oria mịnapụma jịn dẹbụl-ẹ. Anịanga ye fịarị Ijipt apụma ini iniaye sikima ini pịrịmẹ, anịatịḅị, ini ọkịmẹ na Hibru apụ na gboloma yefị mị, anị ini iniaḅụ iderimaḅẹ.

³³Mịnapụ ma dẹbụl mị tọrọkọ ini kpọnjị sime Josẹf ḅe na ḍikia-ḍikiamẹ, ini jụmḅọ jụmḅọ nẹngị ḅaraḅụ, sẹnịḅọ ḅe ḅụ ọkịmun bokatẹịnḅọ ḅe la. Ini ini mịẹse ini sime ḅara ini nwọ ọrị sịkị, anị iniaḅụ gbiripumamẹ, se ini jụmḅọ jụmḅọ ḍikimẹ.

³⁴Josẹf dẹbụl ọgọnọ, mị ini fịayema ḅọrọma ḅọrọma ini pịrịye-ẹ, anịsịkị Bẹnjamin ḅe, ísíapụma ọkị ḅe sọnọ-a kiri anị ini se ọ̀ pịrịye-ẹ. Anị ini Josẹf ḅe na yefị pịkị ḅu ọkụ-ẹ, ọkị nweni-i iru inia tọrụ ḅaamẹ.