Read kirikeni Chukusakị 44 Bible Online

Chukusakị 44 - kirikeni bible

Chukusakị 44

¹Josẹf ḅe ọ̀ tọn warị ḍikiḍikiarị fịrịnwẹngịḅọ ḅe pịrịmẹ, “Fịaye se ḅakama tomonima akpa ma ḅie, ini ineda dekiḅịa ḅara nwọ chụa, se gbọrịḅọ gbọrịḅọ igbiki se akpa mị ḅie ḅịpị okolo chụa koroma.

²Ị̀ya seleḅa ọmọngọ mị se inia ḅie bokatẹịnḅọ ḅe akpa mị ḅie ọgọnọ gbana oria ịpịamgba igbiki mị na.” Ò ḍuko ọ̀ pịrị ḅara ọ̀ nwọ mịẹmẹ.

³Dede funfun ḅie mịnapụma inia yepụra asụnma na sakị so nwẹngị kọnmẹ.

⁴Opuama mị ḅie, ini kele sikima sịkị, Josẹf ḅe warị mị ḍikiḍikiarị fịrịnwẹngịḅọ ḅe nwọ ḅẹmẹ, “Sarama ini ḍuko. Ị́ mun ini lala, nwọse ini gbela, ‘Cheye gose ó si se iḅi gbẹịn-ao?

⁵Cheye gose ómine ị́ nyanaḅọ ḅe oria seleḅa ọmọngọ mị furu? Anị ò se ye ḅuḅu, ọ̀ pịkị se tọrọkọju pakaḅịaye nemi-nemi ọmọngọ mị-ẹ. Ómine opu si mịẹsam!’”

⁶Fịrịnwẹngịḅọ ḅe mun ini lasịkị ma gbọrị ọkwẹịn ma mị ọ̀ kọn ini pịrịye-ẹ.

⁷Ini ọ̀ pẹkẹrẹmẹ, “Ị́ che ḍuko-ao, sẹnịḅọ, ị́ kọn àrị ọkwẹịn mị? Wa yekarịfịmẹ na, nwọ sime yema wa nwọ mịẹkẹ.

⁸Ị́ nemimẹ na Kenan ama ḅie, mịna akpa ma ḅịpị ḅọkọ wa ọrị igbiki ma wa se ḅo ị́ pịrịmẹ. Anịọkụma cheye ẹrẹchị, wa ị́ nyanaḅọ ḅe warị ḅie seleḅa anịkanịka goli nwọ furuḅịa ọkụ?

⁹Sẹnịḅọ, mịna ḅie gbọrịḅọ ḅara ómine anị ọrịmẹ ḅẹḅẹ, ómine nụḅọ ḅaa, se mịna ḅie kọnḅịa apụma ị́ya omoniapụ sọḅịa.”

¹⁰Ọ̀ nwọ ḅẹmẹ, “À ḅerenimẹ, ọkụma ọmọngọ mị ḅara pakaḅoḅịa ḅọ mị kẹngẹ mị ị̀ya omoniḅọ sọḅịaye-ẹ, se ómine kiri kọn apụma ómine ineda ḅẹrẹ oforika ḅaraḅụ soḅịa.”

¹¹Anị ini ḅo inia akpa ma sinsin kiri koromaye-ẹ, pịkị ḅọḅọ mịna akpa finjimẹ.

¹²Josẹf fịrịnwẹngịḅọ ḅe ọ̀ tọrụkweinma akpa ma ḅie ḍọkịmẹ, sẹnịḅọ ḅe ḅụ sakị mun bokatẹịnḅọ ḅe la, anịsịkị ọmọngọ mị Bẹnjamin akpa ḅie mị anị pakaḅoye-ẹ.

¹³Mịnapụ ma ini inia ḅụchụayema kanmẹ kururuḅụ, se ini yema tantan inia yepụra asụnma ọgọnọ gbana se vinpịkị so opuama mị ḅie mun mẹ.

¹⁴Juda ḅe na oria mịnapụma na mun Josẹf warị lasịkị, ọ̀ pa anịanga omi-ẹ. Ini ọ̀ tọrọkọ inia tịḅị ma tumẹ,

¹⁵Josẹf ḅe nwọ ḅẹmẹ, “Mị cheye ọ́ nwọ mịẹ? Ó nemika na à nwọ sime kiri simeḅọ ineda ịkịanḅụ ọ́ mịẹye mị ḍọkịḅoḅịa ọkụ?”

¹⁶“Cheye wa nwọ ḍuko ị́ pịrịḅe, wa nyanaḅọ?” Juda ḅe nwọ pẹkẹrẹmẹ, “Wa che jineaḅẹ? Nde wa mịna ḅụ kọn pọkọḅịa ọkụ? Tamụnọ Ḅe ọ̀ mịna ḅẹrẹḅarasi mị mịẹ ḅelemasam. Mine mgba mịọkụ wa ị́ya omoniapụ sọsam, ọmọngọ mị ḅara pakaḅoḅọ ḅe kẹngẹkẹ.”

¹⁷Josẹf ḅe nwọ ḅẹmẹ, “Ya, anịkẹ! Àrị ngịsị anị mị mịẹ ẹkẹ! Ọmọngọ mị ḅara pakaḅoḅọ ḅe kẹngẹ, mị ị̀ya omoniḅọ sọḅịaye-ẹ. Ọ́mịna ḅie kirikọn apụma ómine ineda vinpịkịso ọ́mịna ḍaḅe damamunḅịa gbọrịye sọ ọ́ lakaḅaraḅụ.”

¹⁸Juda ḅe ori iwo Josẹf ḅe damamun se nwọ ḅẹmẹ, “Ị̀ nyanaḅọ, sisi ḅereni ị̀ pịrị à kele ị́rị́ na ọkwẹịn. Ịganị nyana ị̀ pịrịma; amanyanaḅọ ḅe na mịnaḅụ na sime ọkụ anị ị́ sime ọkụ-ẹ.

¹⁹Wa nyanaḅọ, ị́ nwọse wa gbelamẹ, ‘Ọ́mịna ḍa anịkanịka ọ́ nyana jịn mịnaḅọ owuḅọ omi?’

²⁰Wa nwọ pẹkẹrẹmẹ, ‘Na mịna ḍa olomuḅọ omi-ẹ, ori olomuso se oyi jịn owutọkụ pịkị omi-ẹ. Tọkụ ḅe numbireowu ḅe ọ̀ fịsam, ori kẹngẹ anị nyọngọrọ ḅụlọ ḅụ kọn waraye-ẹ, ḍawu ḅe ori opuma ọ̀ ḅẹlẹmamẹ.’

²¹Wa nyanaḅọ, ị́ nwọse wa ḅẹmẹ wa ò se mịanga ḅo, mịẹse ị́ ori ọrịḅịa ḅara,

²²wa pịkị pẹkẹrẹmẹ na tọkụ ḅe ọ̀ ḍawu ḅe kuḅu soḅịa ọkụ ofori-ẹ; ò nemikase so ọkụma, ḍawuḅe ọ̀ fịḅịa.

²³Anịsịkị ị́rị́ nwọ ḅẹmẹ, ‘Ọ́mịna numbireowu bokatẹịnḅọ ḅe ómine na ḅokẹ ḅẹḅẹ, ị̀ tọrọkọ ngịsị ini ó se ḅo ma-ẹ.’

²⁴“Wa vinpịkị mịna ḍaḅe damamun sịkị, ị́ ḍuko ayema wa nwọ ḍuko ọ̀ pịrịmẹ.

²⁵Anịsịkị ọ̀ wa ḅẹmẹ wa pịkịḅo fịye kalaye fẹ.

²⁶Wa nwọ pẹkẹrẹmẹ, ‘Wa ineda mun-ẹkẹ; ini ḅereni se wa mun tomoniḅọ ḅe na ịrịa ẹkẹ mịna numbireowu bokatẹịnḅọ ḅe mine na mun sikima ọkụma. Wa ineda munḅịa mịna numbireowu bokatẹịnḅọ ḅe sọnị mịna ḅụ sọ mun ọkụma.’

²⁷Mịna ḍaḅe nwọse wa ḅẹmẹ, ‘Ó nemimẹ na ị̀ ta Rechẹl ma mama owuapụ awọ kẹngẹ mị á yi ị̀ pịrịye-ẹ.

²⁸Inia ḅie gbọrịḅọ ị̀ koroma fị ḅọrọsam. Pikipikiye ofori-ẹ, nweni ḅaaḅaa nama sosi ọ̀ temi kọsịsam, anịatịḅị ò so sịkị ngịsị ma àrị ori ọrịkẹ.

²⁹Ó nemikase ḅe gbọrịḅọ ḅe nwọ ọkịso ọkụma, se fịakafịakaye ọ̀ la ọkụma, ó seni ị̀ pịrịḅịa kururu mị ị̀ ḅaaḅịa, à nwọ olomu lasa ọkụ mị.’

³⁰“Se mịọkụ, wa nyanaḅọ,” Juda ḅe pa ọkwẹịn aḅẹ, “à nemikase tọkụ ḅe na vinpịkị so ị̀ ḍaḅe damamunka ọkụma, tọkụ ḅe ori ị̀rị̀ na ofori-ẹ ọ̀ nwọ ọrị kirikiri, ọ̀ fịḅịa. Oria ḍumo mị, tọkụ ḅe ḍumo mị na fịnamamẹ, ori opuma olomusam, kururu ḅụ ọ̀ fịḅịa.

³²Anịtẹịn anga, àrị ị̀ya ḍumo mị se fị ḅereni ị̀ ḍaḅe pịrịmẹ tọkụ ḅe gose. À ḍuko ọ̀ pịrịmẹ na, à nemikase tọkụ ḅe se vinpịkịḅo ọ̀ pịrịkẹ ḅẹḅẹ anịa ḅẹrẹḅarasi ị̀ya ọgọnọ gbanaḅịa ị̀ya ḍumo ene mamgba ḅie ḅụ.

³³Mịọkụ, wa nyanaḅọ, ị̀rị̀ à tọkụ ḅe tịḅị ḍinma mịanga ị́ya omoniḅọ sọḅịa, ye ori oria mịnapụma na vinpịkị so.

³⁴Nde àrị ineda so ị̀ ḍaḅe na ịrịaḅịa ọkụ, tọkụ ḅe ị̀rị̀ na munka ọkụma? Àrị ineda tọrụ se ị̀ ḍaḅe ḍiki ẹkẹ mị opu si oku mị ḅo ọ̀ laḅịa sịkị.”