Read kirikeni Chukusakị 47 Bible Online

Chukusakị 47 - kirikeni bible

Chukusakị 47

¹Anịḅụ Josẹf ḅe ori oria owuapụ mịnapụma ḅie sọnọ apụ ọkị amanyanaḅọ ḅe damamunmẹ. Ò ḍuko ọ̀ pịrịmẹ, “Ị̀ ḍaḅe na ị̀ya owuapụ mịnapụma na ini ḅosam Kenan ḅie, inia nama kpo ma na nambuloma na, ini nyanaye mamgba na. Mịọkụ Goshẹn pẹkẹrẹ ini omi-ẹ.”

²Ò ḅo oria owuapụ mịnapụma se amanyanaḅọ ḅe ḍiemẹ.

³Amanyanaḅọ ḅe ori ini gbelamẹ, “Cheye ọ́ nwọ kọnfịfị?” “Mine nama ḍikiḍiki apụ-ẹ, wa nyanaḅọ, mịna ḅieju-a ḍapụma ḅara mị,” ini nwọ pẹkẹrẹmẹ.

⁴“Wa ḅo mị sẹ ḅie anga-ẹḅomẹ, anịatịḅị Kenan ama mị ḅie ḅuruḅaa mị anị kụrọ so ọkụma osuein ḅarị ofori-ẹ mịna namama fịḅịaye. Pasisi kụrọ se wa pịrị wa Goshẹn pẹkẹrẹ ma ḅie anga.”

⁵Amanyanaḅọ ḅe ò Josẹf ḅe ḅẹmẹ, “Mịọkụ ị́ ḍaḅe na ị́ya owuapụ mịnapụma na ini ḅosa sịkị,

⁶Ijipt iniaye-ẹ. Ye ini Goshẹn pẹkẹrẹ ḅie sime, iḅitẹịn nyọ mị, sẹ mị ḅie. Se pịkịna inia ḅụ inedaḅịapụ omi-ẹ ḅẹḅẹ, ini se ị̀ya nama kpo ma tịḅịdapụ kiri ḅụ koroma.”

⁷Anịeso Josẹf ḅe ọ̀ ḍawu Jekọb ḅe ọkịḅo amanyanaḅọ ḅe ḍiemẹ. Jekọb ḅe ori amanyanaḅọ ḅe ḅẹlẹmamẹ,

⁸se amanyanaḅọ ḅe ori ò gbelamẹ, “Nda kụra ị́ nwọ lasa?”

⁹Jekọb ḅe nwọ pẹkẹrẹmẹ, “Ị̀ya nwẹngịma ḅọrọ, gbọrị kiri simeka ḍumo mị ọkịḅo kụra sonioasi oyi fịnjị lasam. Arịa kụra ma bokẹ pịkị ḅụfụkamamẹ, ị̀ya ḅieju-aḍapụma kọnkọn ḅọlọ-a nwẹngị à kụra ma kịkẹka ḅaraḅụ.”

¹⁰Jekọb ḅe ọ̀ ḅaḅa ḅẹlẹma se amanyanaḅọ ḅe pịrịso se ò somẹ.

¹¹Anị Josẹf ḅe ọ̀ ḍawu ḅe na oria mịnapụma na se Ijipt ḅie iḅitẹịn nyọ, Ramẹsis opuama mị na kpeki nyọ ḅụ koroma se pịkị warị angaye se ini pịrịmẹ, amanyanaḅọ ḅe tọnḅaraḅụ.

¹²Josẹf ḅe ọ̀ fịaye pakụmaḅo ḍawu ḅe na, oria owuapụ mịnapụma na, ḍawu ḅe furo ḅie apụ mamgba na pịrịmẹ, bokatẹịn apụma se chụa.

¹³Ḅuruḅa mị ḅo kụrọ so ọkụma, fịaye gbọrị nyọ ḅụ sọnị ofori-ẹ, Ijipt na Kenan na ḅie-a tomonima iniaḅụ ḅo lọkọmẹ ḅurupụkọtarị ḅụ.

¹⁴Ini ịpịamgba ma fẹ sa ḅẹḅẹ Josẹf ḅe ori igbiki ma ọkị amanyanaḅọ odo mun koromaḅịa.

¹⁵Ijipt na Kenan na ḅie sime igbiki mamgba ini nwọse ye fẹ so sịkị Ijiptapụma sọ Josẹf ḅe damamunmẹ se nwọse ọ̀ ḅẹmẹ; “Fịye se wa pịrị! Ḅereni ma wa fị. Ye mịẹ! Mịna igbiki mamgba fasosam!”

¹⁶Josẹf ḅe nwọ pẹkẹrẹmẹ, “Ọ́mịna nama ọ́ nwọ ọkịḅo à fịye se árịa tịḅị ḍinma ọ́ pịrịḅịa, ọ́mịna igbiki mamgba fasosa ḅẹḅẹ.”

¹⁷Mị ḅụ ini inia nama kpo ma se Josẹf ḅe damaḅomẹ, se ò fịye se inia asụnma na, ananama na, oḅorima na, ikpoki nambuloma na, yepụra asụnma na, ḍinmamẹ. Anị kụra ọ̀ fịye se inia nama kpo mamgba ḍinmamẹ.

¹⁸Anị ḍukoma kụra mị ḅie ini pịkị ọ̀ damaḅo se nwọ ḅẹmẹ, “Wa karakaraye mị se ị́ ḅọịma ẹkẹ, wa nyanaḅọ, mịna igbiki mgba fasosam, pịkị mịna nama kpo mamgba sime ị́ pịrịmẹ. Kọn se wa se ị́ pịrịḅịaye ḅarị ofori-ẹ mịna ojuma na kirima na sikima.

¹⁹Ḅereni ma wa fị. Ye mịẹ! Ḅereni ma mịna ozuma nweni koroma sosa nyọ nwọ sọ. Mine na, kirima na fẹ, seni se fịye ḍinma wa pịrị. Wa amanyanaḅọ ḅe oria omoniapụ nwọ sọḅịa, se ori mịna kirima nyanaḅịa. Ịpịamgba se wa pịrị se wa ḍumoma, pịkị se ozuma ḅie ḍipiḅịa fịaye mgbọlụ nwọse wa pịrị.”

²⁰Josẹf ḅe, Ijipt ḅie sime kiri mamgba fẹ se amanyanaḅọ ḅe pịrịmẹ. Ijipt ḅọ goyegoye anịkanịka ḅaraḅụ oria kiri dẹrịmẹ anịatịḅị ḅuruḅaa mị opuma kụrọmẹ, se kiri mamgba ḅo amanyanaḅọ ḅe ye nwọ sọmẹ.

²¹Josẹf ḅe ò nwenimgba se omoniapụ mịẹmẹ, Ijipt ḅie gbọrị ịkọlị ọkịmun jịn ịkọlị la.

²²Ọ̀ fẹka kiri anị agbamịẹ apụ kirima kẹngẹ-ẹ. Inia kirima ini dẹrị ẹkẹ anịatịḅị amanyanaḅọ ḅe ò ye se ini gbẹịn-gbẹịnmẹ ini se anga.

²³Josẹf ḅe nwọse tomonima ḅẹmẹ, “Ḍiki, mịọkụ àrị ómine na ọ́mịna kirima na fẹ amanyanaḅọ ḅe pịrịsam. Ma ḍipiḅịa fịaye mgbọlụ-ẹ ó se ọ́mịna kirima ḅie ḍipi.

²⁴Fịaye soku sịkị lasịkị, ó soku ayema se sọnọ-a kiri ḍie, se arịa ḅụ gbọrị kiri ọ́ nwọse amanyanaḅọ ḅe pịrị. Ómine ineda kọn fịayema na fịaye mgbọlụma na ọkịḅịa, árị sime ómine na ọ́mịna furoma na pịrịmẹ.”

²⁵Ini nwọ pẹkẹrẹmẹ, “Ị́ mịna ḍumo ma ḍụasam; ị́ iḅi se wa mịẹsam, wa nyanaḅọ, wa pịkịna amanyanaḅọ ḅe oria omoniapụ sọḅịa.”

²⁶Anịẹrẹchị Josẹf ḅe ori ekeregbolo se oloko chụamẹ Ijipt ḅie, na soku fịayema se sọnọ-a kiri ḍie ḅụ gbọrị kiri sime amanyanaḅọ ḅe pịrịmẹ. Mị oloko mị, mịmgba sọ pa omi-ẹ. Agbamịẹ apụ kirima kẹngẹ anị amanyanaḅọ ḅe oria kiri sọkaye-ẹ.

²⁷Izrẹlapụma Ijipt ḅie Goshẹn pẹkẹrẹ mị ini angaye-ẹ, anị ini sime ngọ kọn pịkị tọn awọ yiye-ẹ.

²⁸Jekọb ḅe tẹrẹfa si kụra anị ò se Ijipt ḅie anga se ḅo tẹrẹfa kụra sọnọma si oyi fịnjị laye-ẹ.

²⁹Ọ̀ fịḅịa sịkị kpeki sịkị, ori oria tọkụ Josẹf ḅe chịn se ọ̀ ḅẹmẹ, “Ị́ ḅara se ị̀ ḅụọ ọpọkụrụ ḅie chu se ḅụ iderima ḅaraḅụ yekarịfị ị̀ pịrị na Ijipt ḅie ị́ ị̀ ḍipi ẹkẹ.

³⁰À ḅiḅịa ị̀ya ḍapụma sime nyọ ini ị̀ ḍipi, Ijipt ḅie ị̀ dekiso se ini ini ḍipi anga ị̀ ḍipi.” Josẹf ḅe nwọ pẹkẹrẹmẹ, “Àrị ị́ ḍuko ḅara mị mịẹḅịa.”

³¹Jekọb ḅe nwọ ḅẹmẹ, “Ye karịfị na ị́ mịẹḅịa.” Josẹf ḅe ò yekarịfịmẹ, se Jekọb ḅe oria mọnọye ọgọnọ sime mịẹḅaka ḅẹmẹ.