Read kirikeni Chukusakị 48 Bible Online

Chukusakị 48 - kirikeni bible

Chukusakị 48

¹Sịkị ḅo ḅọrọ sịkị, ini ḍuko Josẹf ḅe pịrịmẹ na ḍawu ḅe ọ̀ ḅụ iḅikẹ. Mị ḅụ ori oria mama awọ, Manasẹ ḅe na Ifrem ḅe na ọkị mun Jekọb ḅe lamẹ.

²Ini ḍuko Jekọb ḅe pịrịmẹ na oria tọkụ Josẹf ḅe ò ḅo ọ̀ la-ẹḅomẹ nwọ ḅe sịkị, ọ̀ ḅụkụrọma mọnọye mị ọgọnọ sịsẹ simemẹ.

³Jekọb ḅe nwọse Josẹf ḅe ḅẹmẹ, “Kụrọmamgba Nyana Tamụnọ ḅe Kenan ḅie sime Lụz ama ḅie ḅụ pakaḅo se ị̀ ḅẹlẹmamẹ.

⁴Ọ̀ nwọse ị̀ ḅẹmẹ, ‘À tọn-a awọ se ị́ pịrịḅịa, mịẹso sịkị ị́ furo ḅie pakaḅoḅịa apụ ḅaka sẹ sọḅịa ọkụ, à mị nyọ mị se ị́ furo ḅie pakaḅoḅịa apụma pịrị se anị iniaye sọ gbasoḅịa.’ ”

⁵Jekọb ḅe ọ̀ pa ọkwẹịn aḅẹ, “Josẹf, ị́ya mama owuapụ awọma, Ijipt ḅie ị́ yi tẹrẹmẹ à ḅo mịnyọ la awọma, ini sime ị̀ pịrịmẹ, Ifrem ḅe na Manasẹ ḅe na, ini anị ị̀ya awọ Rubẹnị ḅe na Simiọnị ḅe na sime ọkụ-ẹ.

⁶Ị́ nemikase jịn awọ nyana-nyana, àrị ị̀ya awọ ḅara se ini ọkị ẹkẹ, ini ḍia ọkịḅịa ngọ, Ifrem ḅe na Manasẹ ḅe na ḅụ anị ḅọrọḅoḅịa.

⁷À mịn mị mịẹ aḅẹ ị́ nyengi Rechẹl ma tịḅị gose. Anị opuma ị̀ ngịrịmamẹ na Kenan ḅie á fịmẹ, Ẹfrat na kpeki nyọ ḅụ à Mẹsopotemịa ḅie so ḅo àrị ogbo. Anịju àrị á ḍipimẹ, Ẹfrat ateli anga.” (Ẹfrat anị mịọkụ ini Bẹtlihẹm nwọse chịn nyọ mị-ẹ.)

⁸Jekọb ḅe ò Josẹf awọma ọrị sịkị, ọ̀ nwọ gbelamẹ, “Ma nde awọ?”

⁹Josẹf ḅe nwọ pẹkẹrẹmẹ, “Mịnapụ ma ị̀ya awọ-ẹ, Tamụnọ Ḅe se ị̀ pịrị awọ-ẹ, mị Ijipt mị ḅie.” Jekọb ḅe nwọ ḅẹmẹ, “Ini ọkịḅo ị̀ pịrị àrị ini ḅẹlẹma.”

¹⁰Jekọb ḅe ọ̀ lasa kụra ma gose ọ̀ tọrụmgbọlụ ḅarị iḅiọkụma nyọ ọrịkẹ. Josẹf ḅe ori awọmẹnịma ọkịḅo ọ̀ pịrịmẹ, se ori ini oḅolo se inia ḅịpị ma nọnjụmẹ.

¹¹Jekọb ḅe nwọse Josẹf ḅe ḅẹmẹ, “À ḅarị koromakẹ à pịkị ị́ ọrịḅịa ọkụ, se mịọkụ Tamụnọ Ḅe ò ḅerenise à ḅo ị́ya awọ sọ ọrịsam.”

¹²Anị Josẹf ḅe ini ọkịye-ẹ ḍawu ḅe ḅụọ ọgọnọ, se ḍawu ḅe tọrọkọ ḅụ ori ọ̀ tịḅịtu mun kirilamẹ.

¹³Josẹf ḅe ori Ifrem ḅe se Jekọb ḅe oria ereḅaranga koromamẹ, se Manasẹ ḅe se oria amaḅaranga koromamẹ.

¹⁴Ọkụma Jekọb ḅe ori ọ̀ ḅarama saḅamamẹ, se oria amaḅara mị se Ifrem ḅe tịḅị ọgọnọ gbanamẹ ori kalaḅọ-ẹ nwọ ḅe sọ, se oria ereḅara mị se Manasẹ ḅe tịḅị ọgọnọ gbanamẹ, anị sẹnịḅọ ḅe.

¹⁵Anị ò ḅo Josẹf ḅe ḅẹlẹmaye-ẹ: “Ye Tamụnọ, ị̀ya ḍapụ Ebraham na, Aịzịk na, fịrịnwẹngị pịrịḅọ ḅe mịna awọma ḅẹlẹma! Ye Tamụnọ, ị̀ ḅọrọmaḅo mịmgba laḅọ ḅe, ini ḅẹlẹma!

¹⁶Ye enjẹlḅọ ḅe, ye se nweni lamaye mamgba ḅụḅụ ị̀ ḍụapakụmaḅọ ḅe, ini ḅẹlẹma! Ye ị̀ya ẹrẹ pịkị ị̀ya ḍapụ Ebraham na, Aịzịk na ẹrẹ mịna awọma ḅụ sime gbaso! Ye ini tọn-a awọ nyana, ḅakapụ inia furo ḅie pakaḅo!”

¹⁷Josẹf ḅe ọ̀ ḅụ ḅalaḅalamamẹ ḍawu ḅe oria amaḅara mị se Ifrem ḅe tịḅị ọgọnọ gbana ọkụ ọ̀ nwọ ọrịsịkị mị, ò ḅo ḍawu ḅe amaḅara mị ọkị Manasẹ ḅe tịḅị ọgọnọ gbanamẹ.

¹⁸Ọ̀ ḍawu ḅe ḅẹmẹ, “Anị ḅarakẹ ḍaḍa. Ḅe anị sẹnịḅọ ḅe-ẹ, ị́ya amaḅara mị se ọ̀ tịḅị ọgọnọ gbana.”

¹⁹Ḍawu ḅe ọ̀ ḍụkụkẹ, se nwọ ḅẹ aḅẹ, “À nemimẹ, ị̀ya tọkụ, à nemimẹ. Manasẹ ḅe furo ḅie pakaḅoḅịa apụma sọ ḅo opu apụ sọḅịa. Ọkụma numbireowu tọkụ ḅe opusọtẹịn ọ̀ nẹngịḅịa, pịkịna ò furo ḅie pakaḅoḅịa apụma ḅo opu sẹ sọḅịa.”

²⁰Anịḅụ ori ini ḅẹlẹmamẹ anị ene, se nwọ ḅẹ aḅẹ, “Izrẹlapụma, ini nweni ḅẹlẹmaḅịa sịkị goyegoye, ini ọ́mịna ẹrẹ chịnḅịa. Se ini nwọ ḅẹḅịa, ‘Ye Tamụnọ Ḅe Ifrem ḅe na, Manasẹ ḅe na mịẹ ọkụ se ọ́ mịẹ.’ ” Mị ḅaraḅụ, Jekọb ḅe ori Ifrem ḅe se Manasẹ ḅe tọrọkọ damẹ.

²¹Anị Jekọb ḅe Josẹf ḅe ḅẹye-ẹ, “Ị́ ọrịmẹ à fị-ẹtọn aḅẹ, ọkụma Tamụnọ Ḅe ori ị́rị́ na simeḅịa, se ị́ pịkịna mun ị́ya ḅieju-aḍapụma nyọ laḅịa.

²²Ị́rị́ anị à Shẹkẹm mị se pịrịarịye-ẹ, ị́ya mịnapụma kẹ, anị fịye pakụma nyọ mị, anị Amọraị apụma ḅara àrị ị̀ya kongo na lubu na se ọkị nyọ mị.”