Read kirikeni Chukusakị 50 Bible Online

Chukusakị 50 - kirikeni bible

Chukusakị 50

¹Josẹf ḅe ori ọ̀ ḅụ se ḍawuḅe ọgọnọ gbin gbin owu aḅẹ pịkị ọ̀ tọrụ nọnjụ aḅẹ.

²Anị Josẹf ḅe tọn se ḅụ gwọ apụma pịrịye na ḍawu ḅe oria oju mị ḅụrụ ẹka ḅara ini nwọse anị mịẹ.

³Anị ḍin-a mesi ọkịmẹ ini oju ḅụrụ ẹka fịrị mị nwẹngị-nwẹngị ḅaraḅụ. Ijiptapụma ḍin-a tesi oyi fịnjị ini nwọse oria ḍụẹịn ḍinmẹ.

⁴Ḍụẹịn ḍin mị ḅo ḅọrọ sịkị, Josẹf ḅe nwọse amanyanaḅọ fịrịnwẹngịapụma ḅẹmẹ, “Pasisi, ọ́ mị oku mị se mun amanyanaḅọ ḅe pịrị:

⁵Ị̀ ḍaḅe fị-ẹtọn àrị sịkị, ori ị̀ mịẹmẹ, à yekarịfị ọ̀ pịrị, na àrị ọ̀ karakarama koromasa iḍupu ḅie, Kenan ḅie àrị ò ḍipiḅịa. Anịgose ò ḅereni ị̀ pịrị à mun ị̀ ḍaḅe ḍipi se à soḅoḅịa.”

⁶Amanyanaḅọ ḅe nwọ pẹkẹrẹmẹ, “Mun ị́ ḍaḅe ḍipi, ị́ ḅereni na ị́ mịẹḅịa ḅaraḅụ.”

⁷Anịḅụ Josẹf ḅe ò mun ḍawu ḅe ḍipimẹ. Amanyanaḅọ ḅe oria fịrịnwẹngịapụ mamgba na oria koḅira warị ḅie opuapụ ma na, pịkị Ijipt ḅie tịḅịda opuapụ mamgba Josẹf ḅe ḍuko mun mẹ.

⁸Oria furo apụ, oria mịnapụ owuapụ, pịkịna ḍawu furo ḅie oria mịnapụ kọn apụma na, inimgba ini ori na mun mẹ. Inia kala awọmẹnịma kẹngẹ na inia ananama na, oḅorima na, nambuloma na, anị Goshẹn nyọ mị ḅụ kọnye-ẹ.

⁹Owuni kporokporo owuapụ na, asụn dọkụ owuapụma na pịkị ò ḍuko mun mẹ; opu kpo-ẹ.

¹⁰Iniḅo Etad fịaye mgbọlụ sẹlẹnyọ mị lasịkị, anị Jọdan ḅụ ịrụapakapaka anga mị, ini ḅọlọ sịkị se oloku anịnyọ ḍụẹịn ḍipiaye mịẹmẹ, Josẹf ḅe ọ̀ pịkị sọnọma ḍin se ḍụẹịn ḍipi egberiaye mịẹmẹ.

¹¹Kenan furo awọma tomonima Etad ḅie ḍụẹịn ḍin àrị ḅara ọrị sịkị, ini ḅẹmẹ, “Mị ndende ọkụ sime kururu ḍụẹịn-a mịẹmịẹye Ijiptapụma ini nwọ mịẹ-ao.” Anị ini gose Ebẹl Mizreim se anị nyọ mị chịnye-ẹ.

¹²Mị ḅụ Jekọb awọma ini ò ḍuko ini pịrị ọkụ mị mịẹmẹ;

¹³ini oria oju akpakpa mị deki mun Kenan ḅie Makpẹla, Mamre ḅụ ịrụapakapaka anga sime pokolo mị ḅie, anị Ebraham ḅe Ifrọn, Hitaịḅọ ḅe ḅara, ḍụẹịn ḍipi gose fẹ ele mị ḅie ḍipimẹ.

¹⁴Josẹf ḅe, ọ̀ ḍawu ḅe ḍipi so sịkị ọ̀ pịkịmaso Ijipt mun mẹ, oria mịnapụma na, ọ̀ ḅụ sọ ò ḍukomun apụ mamgba na ḍụẹịn ḍipi mị ḅụ.

¹⁵Inia ḍaḅe fị ḅọrọso, Josẹf mịnapụma nwọ ḅẹmẹ, “Cheye paka ḅe, nemikase Josẹf ḅe pa wa ḍiki ḅụnwọnwọ se yetọn wa pịrị ọkụma, wa se ọ̀ mịẹ siaye mamgba gose?”

¹⁶Anị gose ini oku se Josẹf ḅe sẹịnmamẹ: “Tẹrẹmẹ mịna ḍaḅe fị,

¹⁷ò ḍuko wa pịrịmẹ na wa ḅẹ na, ‘Pasisi ị́ya mịnapụma mịẹ si mị ḅụ ḅarasin ini pịrị, anị ini ị́ mịẹ simasịkị.’ Mịọkụ pasisi ḅarasin wa pịrị mị simịẹye mị ḅụ, mine ị́ ḍa Tamụnọ Ḅe fịrịnwẹngịapụma deki mịẹye mị.” Josẹf ḅe ori owumẹ, oku mị ọ̀ ḅara lasịkị.

¹⁸Se oria mịnapụma na mịnaḅụ na ḅo ọ̀ tọrọkọ tịḅịtumẹ. “Mị mine-ẹ ị́ tọrọkọ ị́ya omoniapụ ḅaraḅụ,” ini ọkọ ḅẹmẹ.

¹⁹Ọkụma Josẹf ḅe ini ḅẹmẹ, “Ọ́ ḅalafama, àrị ị̀ ḅụ se Tamụnọ Ḅe kiri koroma ẹkẹ.

²⁰Ómine ó siye tọn ị̀ pịrịmẹ, ọkụma Tamụnọ Ḅe anị pịkị iḅiye ḅụ chumẹ, mịẹso sịkị tọn-apụ ḍumo ḅo mịmgba laḅịa ọkụ, pakaye ma gose.

²¹Ọ́ ḅalafa nyana ḅịa ọkụ ofori-ẹ. Ị̀rị̀ anị ómine na ọ́mịna awọma na kpaḅịaye-ẹ.” Mị ḅụ, ò kpoto inia kuḅie kụrọmamẹ, mà iḅi ọkwẹịn ma ḅo inia kuḅie kụrọmamẹ.

²²Josẹf ḅe ọ̀ pa Ijipt ḅie ḍawu furo mị na angamẹ, kụra sọnọasi-oyi-fịnjị mị ọ̀ la se fịye-ẹ.

²³Ò ḍumo sime mun Ifrem ḅe oria awọ na ḅieju awọma na ọrịmẹ. Ọ̀ pịkị Meka, Manasẹ tọkụ awọma ọkịḅo furo ḅie chumẹ.

²⁴Gbọrị ene Josẹf ḅe ḍuko oria mịnapụma pịrịmẹ, “À fị ẹtọn aḅẹ, ọkụma Tamụnọ Ḅe ọ̀ gbarịmaka ḅaraḅụ, ó ḍikiḍiki, pịkị mị nyọ ḅụ ọ́ ḅọrọma pakụma mun ò ḅereni Ebraham ḅe na, Aịzịk ḅe na, pịkị Jekọb ḅe na pịrị nyọ mị laḅịa.”

²⁵Anị Josẹf ḅe oria tomonima ḅẹye-ẹ ini yekarịfị. “Ó ḅereni ị̀ pịrị,” ọ̀ nwọ ḅẹmẹ, “Tamụnọ Ḅe ọ́ pamun anị nyọ laḅịa sịkị ómine ị̀ya oju akpakpa mị se chụa munḅịa.”

²⁶Anị Josẹf ḅe Ijipt ḅie fịye-ẹ, kụra sọnọasi-oyi-fịnjị ọ̀ tịḅị ḅọrọḅụ. Oria oju akpakpa mị anị ḅụrụ ẹka ḅara ini nwọse anị mịẹse anị se igbe ḅie chụamẹ.