Read kirikeni Chukusakị 6 Bible Online

Chukusakị 6 - kirikeni bible

Chukusakị 6

¹Tomonima tomonikiri mị ḅie ḅaka so ọkụma, ini pịkị eremeni awọ yimẹ,

²Tamụnọ awọ[2] ma ọrịmẹ na mịna iremeni ma ini iḅi, pịkị ḍikitọrụgbẹịnmẹ, anịḅụ inia ḅụḅẹlẹ apụ ini nwọ ọkị simemẹ.

³Anịẹrẹchị Nyanaḅọ Ḅe nwọḅẹmẹ, “À ḅereni ẹkẹ à se tomoniḅọ ḅe pịrị ḍumo pịrị tẹmẹ mị simegbaso. Mịọkụ sakị tọrọkọ mun ini ḅarị ḍumo kụra sonioasi nẹngị ẹkẹ.”

⁴Àrị enema ḅie, pịkị àrị enema ḅọrọ seso sọnị, opuma godoro pịkị kpokoro-kpokoro-a tomoni sẹkiri mị ḅie omi-ẹ, inia apụma anị sẹkiri ḅie eremenima na, Tamụnọ owuapụ awọma na furo ḅie pakaḅo apụ-ẹ. Ini anị olomusịkị ḅie ngịsị opu kuḅie kụrọ nyana pịkị ẹrẹso apụma-ẹ.

⁵Nyanaḅọ Ḅe sẹkiri mị ḅie tomoniḅọ goyegoye sitịḅịnyana laḅara na pịkị ini sikoroma nyana ọkụ ọrịsịkị,

⁶anị ori ngịrịmamẹ, ori ini tẹmẹ sẹkiri ḅie koroma yemị. Se ò ḅie opuma manamatọnmẹ

⁷se ọ̀ nwọḅẹmẹ, “À tẹmẹsa apụ mamgba àrị ini ọfịnsinḅịa, namama na, fenima na sọnị, anịatịḅị àrị ngịrịmẹ na ị̀rị̀ àrị tẹmẹmẹ.”

⁸Ọkụma Nyanaḅọ Ḅe ò Noa ḅe ḍikiḅieḅẹlẹmẹ.

⁹Ini Noa se chịn gbọrịḅọ omi-ẹ. Tẹrẹ-a owuapụ awọ ọ̀ nwọ yimẹ, Shẹm ḅe na, Ham ḅe na, pịkị Jafẹtị ḅe na. Noa ḅe ò mịẹirima nyanakẹ pịkị ori ngẹrị ngẹrị anị oria sịkị mị ḅụ iḅiḅọ-ẹ. Ọ̀ Tamụnọ Ḅe na nwẹngịgbolomamẹ oria ḍumo ene mamgba,

¹¹ọkụma jịn tomoniḅọ goyegoye Tamụnọ Ḅe tọrụkuḅu siḅọ-ẹ, kụrọkụrọ simịẹmịẹaye nyọ mamgba kelemamẹ.

¹²Tamụnọ Ḅe sẹkiri mị ḍiki seni ọrịmẹ na simịẹmịẹaye anịa ḅie ḅeinmẹ, anịatịḅị tomoni mamgba siḍumo kọn aḅẹ.

¹³Tamụnọ Ḅe nwọ seni Noa ḅe ḅẹmẹ, “À tọnpẹlẹsam na à tomoni goyegoye famaḅịa. À gbọtụma ini famasinḅịa, anịatịḅị tomonikiri mị ḅie inia siamịẹmịẹaye ḅeinmẹ.

¹⁴Iḅi chịn ḍọkị seni arụ mịẹ ị́ ḅụ pịrị; anịa ḅie jukuru jukuru chụa, agba seni ḅie ma na ọḅụ na ọmbị.

¹⁵Anịa ịsụn mị ḅụọ ẹndẹ na mesi oyi fịnjị nwọ laḅịa, finji mị ḅụọ-a tesi oyi fịnjị na sọnọ-a ḅụọ laḅịa, anịsịkị anịa gele mị ḅụọ-a mesi na sọnọ-a ḅụọ laḅịa.

¹⁶Arụ mị ochu mịẹ anị pịrị, ochu mị na anga ma na ḅụ gbọrị ḅụọ na pẹkẹrẹ laḅịa ẹmbẹ pịrị. Anịse tẹrẹ-a dẹkị ọgọnọwarị nama, pịkịna anga mị ḅụ gbọrị ḅọkọ chụa.

¹⁷Àrị opumengi seni sẹkiri sẹịnḅịa, se anị ḍumo nyanaye goyegoye ḅaafamaḅịa. Sẹkiri ḅie simeye goyegoye fịḅịa,

¹⁸ọkụma àrị ị́rị́ na ọḅọkụ fịḅịa. Arụ mị ḅie sọmun, ị́ tama na, ị́ya owuapụ awọma na, pịkị inia erema na.

¹⁹Arụ mị ḅie nama kịrịkịrị na pịkị feni kịrịkịrị na; owoi na ịrọrọ na nwọse ị́rị́ na arụ mị ḅie sọmun, mịẹsosịkị àrị ḍumoḅịa ḅara.

²¹Ómine na àrị na fịḅịa kịrịkịrị fịaye nwọse arụ mị ḅie chụa.”

²²Noa ḅe Tamụnọ Ḅe tọn ọ̀ pịrịye goyegoye ọ̀ mịẹmẹ.