Read kirikeni Chukusakị 8 Bible Online

Chukusakị 8 - kirikeni bible

Chukusakị 8

¹Tamụnọ Ḅe ò Noa ḅe se ḅieḅaramakẹ, pịkịna ori na arụ mị ḅie sime nama mamgba na; ọ̀ mịẹ seni fọrụ fiemẹ, se mengi mị sakị iderimamẹ.

²Sẹkiri chuku ḅie mengi nyọnyọḅụ kanpakaḅo nyọma na pịkịna sotọrụḅụ mengi kansara ḅọkọ mamgba na palịmẹ. Ene mị sọnị ḅarị korokẹ,

³mengi mị sọnị kelekelema iderimamun ḍin-a sọnọmasi oyi fịnjị lamẹ.

⁴Sọnọma akalụ mị ḅie tẹrẹfasi ḍin ene mị arụ mị Ararat tụndụma ọgọnọ ḅụ gbọrị tụndụ ọgọnọ gbanamẹ.

⁵Mengi mị pa iderimaḅẹ, se oyi akalụ mị ḅie ngei ene ḅie mị tụndụma tịḅịma pakaye-ẹ.

⁶Ḍin-a mesi ḅọrọ sịkị Noa ḅe gbọrị pẹlẹḅọkọ nwọ finjimẹ

⁷se gbọrị kurukịara ọ̀ nwọ fịrịma pakụmamẹ. Ọ̀ ḅarị pịkịmaḅokẹ, ọkụma ò finma finma ḅọrọ nweni mengi mị gbọtụma faso sịkị lamẹ.

⁸Anịeso Noa ḅe, ọ̀ pịkịna gbọrị okuku fịrịma pakụmamẹ, nwọfa mengi mị iderimasa otuḅo,

⁹ọkụma mengi mị pa kiri mị mgba gbẹịn ẹrẹchị okuku ḅe, ọ̀ chịẹḅịa nyọ ọ̀ nwọ ọrịkẹ. Anị ọ̀ pịkị fin arụ mị daḅoye-ẹ, se Noa ḅe ḅarasụma ọ̀ da arụ mị ḅie chumẹ.

¹⁰Ọ̀ pịkịna jịn sọnọma ḍin se korumẹ, seni ọ̀ pịkịna okuku ḅe fịrịma pakụmamẹ.

¹¹Okuku ḅe saso ḅiri ò ḅosịkị ịwọ oliv ịnyanya ọ̀ ḅịpị omi-ẹ. Anịḅụ Noa ḅe ò nemisam na mengi mị iderimasam.

¹²Ọ̀ pịkịna jịn sọnọma ḍin seni korumẹ, se ọ̀ pịkị okuku ḅe fịrịma pakụmamẹ, mịsịkịḅụ ọ̀ ḅarị pịkịmaḅokẹ.

¹³Noa ḅe kụra ẹndẹ oyiasi fịnjị na gbọrị kụra nwọ lasịkị, tatarị akalụ mị ḅie ngei ene ḅie, mengi mị sọnị fasosam. Noa ḅe, arụ mị gbẹịn ayema nwọ sinmẹ, ọ̀ nyọ mị ḍikikelemase ọrịmẹ na kiri mị samịnaḅẹ.

¹⁴Maịn karama akalụ mị ḅie tẹrẹfa ḍin soi ene mị ḅieḅụ kiri mị gbọtụma samịnasosam.

¹⁵Tamụnọ Ḅe nwọse Noa ḅe ḅẹmẹ,

¹⁶“Arụ mị ḅie pakaḅo, ị́ tama na, ị́ya owuapụ awọma na, pịkị inia erema na.

¹⁷Ị́rị́ na arụ mị ḅie sime feni mamgba na, nama mamgba na, pakaḅo mịẹsosịkị àrị yi sẹkiri wasamaḅịa ọkụ.”

¹⁸Anịḅụ Noa ḅe na, tarọ ma na, oria owuapụ awọma na, pịkịna inia erema na arụ mị ḅie pakaḅomẹ.

¹⁹Nama mamgba na, fenima na kpokpo ḅụ arịa juaye ḅụ arụ mị ḅie pakaḅomẹ.

²⁰Noa ḅe ori agbamịẹ ẹbẹ nama Nyanaḅọ Ḅe pịrịmẹ; namama na fenima na ḅie fịafịayema ḅie ḅụ gbọrịwu gbọrịwu ọ̀ nwọ ọkị seni agbamịẹ ẹbẹ mị ọgọnọ ḅụ bebema dọkịma agba mịẹmẹ.

²¹Agba mị onu mị Nyanaḅọ Ḅe ḅieḅẹlẹmamẹ, se ọ̀ nwọ seni ọ̀ ḅụ ḅẹmẹ, “À ḅarị ngịsị worinime seni sẹkiri mị pịrị ẹkẹ tomoniḅọ ḅe mịẹaye gose; à nemimẹ na oria kalasịkị ḅụ ngịsị oria koromama siaye-ẹ. À ḅarị pịkị ngịsị ḍumoaye mamgba ḅaa-ẹkẹ, anị mịọkụ à mịẹsa ḅara mị.

²²Sẹkiri mị sime lasịkị lasịkị, fịaye ḍipi sịkị simeḅịa, àrị soku sịkị pịkị simeḅịa. Sịkịmamgba oḅoku na ọfịrị sịkị na simeḅịa, otoku sịkị na fọngụ sịkị na simeḅịa, pịkịna ḍin na enekaka na simeḅịa.”