Read kirikeni Chukusakị 9 Bible Online

Chukusakị 9 - kirikeni bible

Chukusakị 9

¹Tamụnọ Ḅe Noa ḅe na oria owuapụ awọma na ḅẹlẹma se nwọḅẹmẹ, “Ọ́ ḅakama awọ nyana, mịẹsosịkị ọ́mịna awọma sẹkiri mị mgba anga kelemaḅịa ọkụ.

²Nama mamgba na fenima na pịkịna injima na ómine ḍikiḅalafaḅịa. Arịmgba ọ́mịna kụrọ chukuḅie àrị omi-ẹ.

³Ómine ineda àrị pẹịḅịa, pịkị ịnyanya mana; àrị arịmgba seni ọ́ pịrịmẹ fịaye ḅaraḅụ.

⁴Ọ́ pẹị ẹka gbọrịye anị puloḅụ sime nama. Anị mị ị̀ ḅụ tọn tọnye-ẹ, anịatịḅị ḍumo mị pulo mị ḅie anị omi-ẹ.

⁵Tomoniḅọ ḍumo famaḅọ goyegoye fomuḅara daḅịa. Tomoniḅọ ḍumo fama nama goyegoye fị fomuḅara daḅịa.

⁶Tomoniḅọ ḅe, Tamụnọ Ḅe ori ọ̀ ḅụ ḍikima ọ̀ tẹmẹmẹ; anịgose tomoniḅọ ḅe ḅaaḅọ goyegoye jịnḅọ iniḅọ ḅaaḅịa.

⁷“Ọ́ ḅakama awọ nyanaḅịa mịẹsosịkị ọ́mịna furo ḅie pakaḅoḅịa awọma sẹkiri mị mgba anga kelemaḅịa ọkụ.”

⁸Tamụnọ Ḅe nwọ seni Noa ḅe na oria owuapụ awọma na ḅẹmẹ,

⁹“Mịọkụ àrị ómine na ọ́mịna furo ḅie pakaḅoḅịa apụma na ọḅọkụ fị aḅẹ,

¹⁰pịkịna ḍumo nyanaye goyegoye mamgba na feni mamgba na, pịkịna nama mamgba na, ị́rị́ na arụ mị ḅie pakaḅoaye mamgba na.

¹¹Mà ọkwẹịnma mị à se ómine na ị̀ya ọḅọkụ mị fịḅịaye-ẹ, à ḅereni ọ́ pịrịmẹ na opumengi ḅarị ḍumo nyanaye mamgba fama-ẹkẹ; ngịsị sẹkiri mị mengi ḅarị pịkịna anị fama-ẹkẹ.

¹²Elekima ḅaraḅụ àrị ómine na ḍumo nyanaye goyegoye na fịarị kuluma nyanaka ọḅọkụ mị,

¹³àrị ị̀ya so-elekima mị seni sotọrụ ḅụ koromaḅẹ. Anị mị, à seni tomonikiri mị na fị ọḅọkụ mị ḅe elekima-ẹ.

¹⁴À soḅuno seni sotọrụ kikima se so-elekima mị pakasịkị goyegoye,

¹⁵à ḅereni ómine na nama mamgba na pịrịye mị à nwọse ḅiekoromaḅịa na, opumengi ḅarị pịkị ḍumo nyanaye goyegoye fama-ẹkẹ.

¹⁶So-elekima mị soḅuno ma ḅie pakasịkị pakasịkị, àrị anị ọrịḅịa se àrị ómine na pịkị sẹkiri ḅie ḍumo nyanaye goyegoye na fị kuluma nyanaka ọḅọkụ mị se ḅiekoromaḅịa.

¹⁷Anị elekima mị anị à ḅereni sẹkiri ḅie ḍumoaye mamgba pịrịye mị-ẹ.”

¹⁸Noa ḅe, ori na arụ mị ḅie pakaḅo oria owuapụ awọma anị Shẹm, Ham, pịkị Jafẹtị ḅe na-ẹ. (Ham ḅe anị Kenan ḍaḅe-ẹ.)

¹⁹Mịna Noa tẹrẹ-a awọma anị sẹkiri mị ḅie tomonima ḅieju opu-a ḍapụma-ẹ.

²⁰Noa ḅe ozukọrịḅọ-ẹ, ori mị tatarị irumịẹ chịnmgbọlụ ozu ḍipiye-ẹ.

²¹Ori iruḅu sosịkị, iru ọ̀ tọrụ ḅaamẹ, ọ̀ papaḅụsin seni oria ikowarị mị ḅie mọnọmẹ.

²²Kenan ḍa Ham ḅe ọrịmẹ na ḍawu ḅe ọ̀ papaḅusinmẹ, ò mun ḍuko oria mama mịnapụma pịrịmẹ.

²³Anị Shẹm ḅe na Jafẹtị ḅe na gbọrị opu koro ḅụchụaye ọkị seni inia aba gbanaye. Se ọḅụ se nwẹngịmun ikowarị mị ḅie anị seni inia ḍaḅe papaḅụ mị gbẹịnmẹ, ini inia tọrụma sinmẹ mịẹse ini oria papaḅụ mị ọrịẹka ẹrẹchị.

²⁴Noa ḅe, ọ̀ tọrụ ḅo kwein se oria kuluma tọkụ ḅe mịẹye mị naa sịkị,

²⁵ọ̀ nwọḅẹmẹ, “Worinime sime Kenan ḅe pịrị! Ori omoniḅọ sọ oria owuapụ mịnapụma pịrịḅịa.

²⁶Ó tokoni se Nyanaḅọ Shẹm Tamụnọ Ḅe pịrị! Kenan ḅe, Shẹm omoniḅọ nwọ sọ.

²⁷Ye Tamụnọ Ḅe Jafẹtị ḅe mịẹ se ò su! Ye ò furo ḅie pakaḅoḅịa apụma Shẹm tomonima na gboloma anga! Kenan ḅe ọ̀ Jafẹtị omoniḅọ sọḅịa.”

²⁸Opumengi mị ḅọrọso sịkị, Noa ḅe ọ̀ pịkị kụra jieasi na kụra mesi oyi fịnjị lamẹ

²⁹se kụra mẹndẹ sọnọasi fịnjị na kụra mesi oyi fịnjị ọ̀ nwọ lase ọ̀ fịmẹ.