Read kirikeni 2 Samụẹl 15 Bible Online

2 Samụẹl 15 - kirikeni bible

2 Samụẹl 15

¹Mịn mị ḅo ḅọrọ se so sịkị, Absalọm ḅe gbọrị kporokporo na, asụn na, pịkị ọ̀ ḅọrọma ye munḅịa owuapụ ḅụ kịnị-a mesi oyi fịnjị nwọ nyana ọ̀ ḅụ pịrịmẹ.

²Dede ḅie goyegoye ọ̀ sịsẹ mun opuama mị onu ḅọkọ ateli mị ḅụ chịẹḅịa. Amanyanaḅọ ḅe kọn ḅịa ḅẹrẹ tomoniḅọ nwọse ḅomẹ ḅẹḅẹ, Absalọm ḅe ori ọ̀ chịn se ò ḅo nyọ se ò gbelaḅịa. Anịsịkị tomoniḅọ ḅe ò sime se ḅo sẹ mị ḍuko ọ̀ pịrịḅịa.

³Absalọm ḅe nwọse ọ̀ ḅẹḅịa, “Ḍiki, ḅẹrẹ mị ị́ ḅara ḅịrịmẹ ọkụma amanyanaḅọ ḅe kiriḅụ sime se ị́ya ḅẹrẹ mị pokiḅịaḅọ ofori-ẹ.”

⁴Ọ̀ pịkị nwọḅẹ ḅịa, “Ị̀rị̀ ḅọrọ ḅẹrẹkọnḅọ-ẹ nwọḅẹ ọkụma! Ḅẹrẹ nyana se ị̀ ḍọkịmaḅo ḅọ goyegoye, àrị iḅiḅẹrẹkọn nụḅọ pịrịḅịa.”

⁵Tomoniḅọ ḅe Absalọm ḅe kpekimaḅo se tịḅịtu ọ̀ pịrịḅịa sịkị, Absalọm ḅe ò be mun ori ọlọchịẹma se ọ̀ ḅịpị nọnjụḅịa.

⁶Kọnḅịa ḅẹrẹ nwọse amanyanaḅọ ḅe damaḅo Izrẹlḅọ goyegoye Absalọm ḅe mị ḅara mị nwọse nụḅọ mịẹḅịa, mị ḅara ḅụ ori inia kuḅie ma fẹ ọ̀ ḅụ pịrịmẹ.

⁷Inein-a kụra ḅọrọ sịkị, Absalọm ḅe nwọse Amanyanaḅọ Devid ḅe ḅẹmẹ, “Ị̀ nyanaḅọ, ye à so Hibrọn mun se à ḅereni ye mị mịẹ Nyanaḅọ Ḅe pịrị.

⁸Siria ḅie sime Gẹshọ ḅie àrị anga sịkị, à yeḅereni Nyanaḅọ Ḅe pịrịmẹ na ò nemikase ị̀ ọkị vinpịkị Jerusalẹm ḅomẹ ḅẹḅẹ à fịrịnwẹngị ọ̀ pịrịḅịa Hibrọn ḅie.”

⁹Amanyanaḅọ ḅe nwọse ọ̀ ḅẹmẹ, “Dein na mun.” Anịẹrẹchị Absalọm ḅe so Hibrọn mun mẹ.

¹⁰Ọkụma ori okumun-apụ seni Izrẹl sẹ mị mgba fịrịma seni nwọse ini ḅẹmẹ, “Ómine oḍu mị fie mị naasa ḅẹḅẹ, ómine oloku, ‘Absalọm ḅe ori amanyanaḅọ sọsam Hibrọn mị ḅie!’”

¹¹Owuapụ ḅụ kịnị oyiasi Jerusalẹm ḅie Absalọm ḅe ḅụsọ mun mẹ ọ̀ chịnḅịpị seni pịrị apụ ḅaraḅụ; ò kuḅie sime ye ini nemikẹ ngịsị, iḅi kuḅie ḅụ ini mun mẹ.

¹²Absalọm ḅe agba mị mịẹarị sịkị, ori oku seni Ahitofẹl ḅe fịrịmamẹ Gilo ama mị ḅie, ori anị tetema seni Amanyanaḅọ Devid ḅe pịrịpịrị apụma ḅụ gbọrịḅọ-ẹ. Ini ḅia koroma amanyanaḅọ ḅe pịrị siye mị sịkị ḅo lasịkị Absalọm ḅe ḅụ apụma inia kịẹnḅịpị ḅo ḅakasam.

¹³Gbọrị okuḅoḅọ ḅo ḍuko Devid ḅe pịrịmẹ, “Izrẹlapụma ini ḅereni nyana Absalọm ḅe pịrịḅịa.”

¹⁴Anịẹrẹchị Devid ḅe nwọse oria tịḅịnị fịrịnwẹngịapụ mamgba ḅẹmẹ, “Ó ye wa be so, wa nemikase Absalọm ḅe ḅara pẹlẹma so ḅimẹ ḅẹḅẹ! Ọ́ sara ma ye! Anị ofori ḅọlọka sịkị ḅụ ò mịju ḅo se wa nẹngịma pịkị opuama mị ḅie ḅọḅọ ḅaasinḅịa!”

¹⁵Ini nwọse ọ̀ pẹkẹrẹmẹ, “Iin, Amanyanaḅọ,” “Ị́rị́ ḍukoye ḍukoye wa ḅụkarakaramamẹ anị mịẹ.”

¹⁶Anịẹrẹchị amanyanaḅọ ḅe na ò furo mị na, pịkị oria tịḅịnị fịrịnwẹngịapụ mamgba na mangịsomẹ, ori oyi-a ịgwa eremeni se koromamẹ ini amanyanaḅọ warị mị ḍikiḍikiḅịa ẹrẹchị.

¹⁷Amanyanaḅọ ḅe na oria tomoni mamgba na opuama mị ḅie pakasoarị sịkị, ini ḅo kuluma warị mị ḅụ dachịẹmẹ.

¹⁸Oria tịḅịnị fịrịnwẹngịapụ mamgba ọ̀ ḅọrọ koro se chịẹmẹ, se amanyanaḅọ koruapụma ọ̀ ḅọrọ se tọrọkọ damẹ. Kịnị ẹndẹ oyiasi fịnjị owunima anị Gat ḅie ò ḍuko apụma sọnị ọ̀ ḅọrọ so tọrọkọ mun mẹ,

¹⁹anị amanyanaḅọ ḅe nwọse Ịtaị inia tịḅịnịḅọ ḅe ḅẹye-ẹ, “Cheye gose ị́ mine na so ḅe? Vinpịkị so mun ịwọ amanyanaḅọ ḅe na sime. Ị́rị́ igoniḅọ-ẹ, jịn sẹ ḅie ị́ ḅo mịanga ḅụ tịḅịkikimamẹ.

²⁰Ma ḅọlọka sịkị ḅụ anị ị́ ḅo mịju angaye-ẹ, anịọkụma cheye ẹrẹchị àrị ị́ ọkị se chụa nwẹngị gelegelema ḅọrọḅe? À mun-arị nyọ sọnị ma à nemika sịkị. Vinpịkịso se ị́ya ama apụma ọkị se chụa so, se Nyanaḅọ Ḅe iḅitọrụ se ó ḍiki pịkị kuḅie se ḅụgbana gbẹịn ḅara se ómine na anga.”

²¹Ọkụma Ịtaị ḅe nwọse ọ̀ pẹkẹrẹmẹ, “Amanyanaḅọ, à Nyanaḅọ Ḅe ẹrẹ mị karịfị se ị́ pịrịmẹ na ị́ munyọ munyọ àrị ị́rị́ na munḅịa, anị ḅọrọ fị-ẹ nwọḅẹ sọnị.”

²²Devid ḅe nwọse ọ̀ ḅẹmẹ, “Iḅimẹ!” “Anịọkụma nwẹngị tarị!” Anịẹrẹchị Ịtaị ḅe na oria owuapụma na pịkị inia chukuḅie sime apụ mamgba na ori na nwẹngị tọrọkọ mun mẹ.

²³Tomonima oloku se owumẹ ini Devid ḅe na ò ḍuko nwẹngịapụma na so ọkụ nwọ ọrị sịkị. Amanyanaḅọ ḅe ḅo Kidrọn kiri mengi mị saḅaḅọrọmẹ, oria owuapụma sọnị ò ḍuko saḅamẹ, se ini gbọrị ḅụḅụ pakaso se tọrụ se piri ele mị da mun mẹ.

²⁴Zadọk, agbamịẹḅọ ḅe ori omi-ẹ, Livaị apụma sọnị pịkịna ori na sime se osi nyana Ọḅọkụ Igbe mị deki waraḅẹ. Ini anị sin koromamẹ, se ḅarị anị dekichịẹmaka nweni bebe tomoni mamgba opuama mị ḅie pakaso sịkị lamẹ. Agbamịẹ Abaịata ḅe sọnị ori omi-ẹ.

²⁵Anịsịkị amanyanaḅọ ḅe nwọse Zadọk ḅe ḅẹmẹ, “Ọḅọkụ Igbe mị deki se vinpịkịso opuama mị mun. Ị̀ya mịẹmịẹye Nyanaḅọ Ḅe ḅụḅẹlẹmẹ ḅẹḅẹ gbọrị ene laḅịa sịkị ọ̀ mịẹse à vinpịkịḅo anị ọrịḅịa anị sime kiri ḅụ.

²⁶Ọkụma nemikase ị̀ya mịẹmịẹye ọ̀ ḅụḅẹlẹkẹ ḅẹḅẹ, mị ị̀rị̀-ẹ, ye ori ọ̀ ḅụḅẹlẹ ḅara nwọse ị̀ mịẹ.”

²⁷Se ọ̀ nwọse Zadọk ḅe ḅẹmẹ, “Ḍiki, ị́ nịa Ahimeaz ḅe na, Abaịata ya Jonatan ḅe na, nwọ ọkị se ini na deinma vinpịkịso opuama mị mun.

²⁸Mịọkụ sakị à tọrụ mị saḅakoro nyọ ḅụ sime ị́ koruḅịa piri ele mị ḅie, ọkịmun àrị ị́ ḅịpị ye na sịkị laḅịa.”

²⁹Anịẹrẹchị Zadọk ḅe na Abaịata ḅe na Ọḅọkụ Igbe mị deki se vinpịkịso Jerusalẹm mị mun, se anịju ḅụ simemẹ.

³⁰Devid ḅe owuma Oliv Tụndụ ma ọgọnọ ḅụ kpọlị ma mun mẹ; papaḅụọ ḅụ, se pịkịna ḅịtẹ seni ọ̀ tịḅị gbẹịnmẹ, kururu ḅụ. Ò ḍuko mun-arị apụ mamgba sọnị ḅịtẹ se inia tịḅị ma gbẹịn se pịkị owumẹ.

³¹Ini ḅo ḍuko Devid ḅe pịrịmẹ na Ahitofẹl ḅe sọnị Absalọm ḅe ḅụ sọ se ḅaa tọn amanyanaḅọ ḅe nwọ pịrịmẹ nwọḅẹ sịkị, ọ̀ tẹkẹmẹ, “Sisi, Nyanaḅọ, Ahitofẹl ḅe oria tetema mị seni papaye mị-ẹ!”

³²Devid ḅe mun chịngị mị ọgọnọju lasịkị, anị ini tẹkẹ tẹkẹ nyọ mị, ò kuḅie se ḅụgbana ikiaḅọ Hushaị, Akaịḅọ ḅe ori na ịrịamẹ, ọ̀ ḅụsime kankan ḅụchụayema na, ọ̀ tịḅị ọgọnọ ò se sara fọn ma na.

³³Devid ḅe nwọse ọ̀ ḅẹmẹ, “Gbọrị ḅarachụa sọnị ị́ nyana ị̀ pịrị ẹkẹ ị́ nemikase ị̀ ḍuko ḅoaḅẹ ḅẹḅẹ,

³⁴ọkụma ị́ ineda ḅarachụa ị̀ pịrịḅịa, anị ị́ vinpịkịso opuama mị munḅịa se ḍuko Absalọm ḅe pịrị na, mịọkụ à fịrịnwẹngịḅọ sọ ị́ pịrịḅịa anị à fịrịnwẹngịḅọ sọ ị́ ḍaḅe pịrị ọkụ mị. Anịsịkị ị́ ineḅịa ọkụ mịẹse Ahitofẹl ḅe pịrịḅịa tetema goyegoye na tụḅụrụ.

³⁵Agbamịẹapụma, Zadọk ḅe na Abaịata ḅe na amanyanaḅọ warị mị ḅieḅụ ini omi-ẹ; amanyanaḅọ warị mị ḅie ị́ naaye naaye ḍuko ini pịrị.

³⁶Inia owuapụ awọma, Ahimeaz ḅe na Jonatan ḅe na, ini na anịju omi-ẹ, ị́ ineda inia ḅụ ḅọrọ se anịju ị́ naaye goyegoye nwọse ị̀ fịrịmaḅịa.”

³⁷Anịẹrẹchị Hushaị, Devid ḅe ori ikiawu ḅe vinpịkịso opuama mị ḅie mun mẹ, anị Absalọm ḅe sọnị opuama mị ḅie sọḅoarị sịkị mị ḅụ.